ජනතාව ප්රතික්ෂේප කිරීමෙන් අනතුරුව විහිළු සැපයීම නතරකර පරාජය භාරගෙන පාඩුවේ ජීවත්වන ලෙස ජනතා විමුක්ති පෙරමුණේ ලේකම් ටිල්වින් සිල්වා අද රනිල් වික්රමසිංහගෙන් ඉල්ලා සිටියේය.
ඔහු මෙම ඉල්ලීම කළේ අද උදේ (04) කොළඹ දී පැවති විශේෂ මාධ්ය හමුවක් අමතමිනි. ව්යවස්ථාව උගන්වන්නට කතා කරන රනිල් වික්රමසිංහගෙන් ඉගෙන ගත හැක්කේ ව්යවස්ථාව නොව, ව්යවස්ථාව කඩන ආකාරය බව පැවසූ ටිල්වින් සිල්වා පෙන්වා දුන්නේ ආසන්නම උදාහරණය ලෙස පළාත් පාලන ඡන්දය නොතබා ව්යවස්ථාව උල්ලංඝනය කළ ආකාරය ගත හැකි බවය.
ව්යවස්ථා විරෝධීව නැවැත්වූ ඡන්දය යළි පැවැත්විය යුතු බවට අධිකරණ තීන්දුවක් ලබා දුන් විනිසුරුවරුන් පාර්ලිමේන්තුවට ගෙන්වා ප්රශ්න කිරීමට උත්සාහ කළ රනිල් වික්රමසිංහගෙන් ඉගෙන ගත යුත්තේ කුමණ ආකාරයේ ප්රජාතන්ත්රවාදයක්ද, කුමණ ආකාරයේ ව්යවස්ථාවක් ද යන්න ලේකම්වරයා ප්රශ්න කර සිටියේය.
මෙයා ද අපට ව්යවස්ථාව සහ ප්රජාතන්ත්රවාදය කියා දෙන්න එන්නේ. අපි කියනවා රනිල් වික්රමසිංහට මුල සිට ව්යවස්ථාව සහ ප්රජාතන්ත්රවාදය ඉගෙන ගන්නේ කියලා. එයාගෙන් ලංකාවට දෙයක් ඉගෙන ගන්න නෑ.
1977 ඉඳන් ජීවත් වුනේ මහජන මුදල්වලින්. ඒ නිසා දේශපාලනයෙන් ඉවත් වුනාට පස්සෙත් ජනතා මුදලින් යැපෙන්න හදනවා.”
“මේ දේශපාලනයේ තියන ඉතාම විලිලජ්ජා නැති දෙයක් තියනවා. ප්රතිපත්තිමය වශයෙන් විවේචනය කරගන්නවා වෙනුවට නිර්මාණය කරන ලද බොරු සමාජගත කිරීම. ඉනුත් නරකම එක තමයි සමාජගත කළ බොරු මිනිස්සුන්ගේ සංවේදී තැන්වන ජාතික සහ ආගම ගැන නම් ඉතාම බරපතලයි. අපි ආගම අතර ජාතීන් අතර විරසක හදලා සැක හදලා ඉතිහාසයක් පුරා වේදනා වින්ද රටක්. තවමත් ආගම් අතර වෛරය වපුරනවා නම්, බොරු හදනවා නම්, අසත්ය තොරතුරු නිර්මාණය කරලා කියනවා නම් ඒක සමාජය තුළ තියෙන්න ඕන නැති දෙයක්. බොරු නිර්මාණය කරන අයත් සමාජය තුළ බොරු වපුරන අයත් එ්කට වග කියන්න ඕන. මේක ඉතාම බරපතල තත්ත්වයක්.
ඒ නිසා හැම ජන කොටසකගෙන්ම ඉල්ලා සිටිනවා මෙවැනි බොරු කියන අයට අවස්ථාව දෙන්න එපා. මෙවැනි බොරු පිලිගන්න එපා. මෙවැනි ආගම් පටලා බොරු කියමින් යන අයට දේශපාලනයේ කිසිදු අවස්ථාවක් දෙන්න එපා. මේ මතවාද දේශපාලන වශයෙන් පරාද කළ යුතුයි. තවත් බොරු කියාවි. ඒ අසත්ය නිර්මාණ පිලිගන්නේ නැතිව ඇත්ත තෝරගන්නා ලෙස ඔබට ආරාධනා කරනවා.
මාධ්යවේදීන් ඇසූ ප්රශ්නවලට පිළිතුරු දෙමින් ටිල්වින් සිල්වා පෙන්වා දුන්නේ ජාතික ජන බලවේගය විසින් ඉදිරිපත් කර ඇති කණ්ඩායම පාර්ලිමේන්තුවට අලුත් වුවද, පළාත් සභාවල, ප්රාදේශීය සභාවල, ඉන් හැරුණු විට භූමිය තුළ දශක ගණනාවක් දේශපාලනය කළ ඒ වෙනුවෙන් කැපවුන පිරිසක් බවය. බිම් මට්ටමේ දේශපාලනය කළ පිරිසක් බවය. දේශපාලන අත්දැකීම් ඇති පිරිසක් බවය.
“පළපුරුද්ද තියනවා කියන අය මොකද කරලා තියෙන්නේ. මහජන මුදල් නාස්ති කිරීම සහ හොරකම් කිරීම. ඒකට ඔය කියන හැම දෙනාම පළපුරුදුයි. ඔය හැම දෙනාම සම්බන්ධයි. ඔය කියන හැම දෙනාම පළවෙනි පාර පාර්ලිමේන්තුවට ඇවිත් තියෙන්නේ එල් බෝඩ් ගහන් තමයි. හැබැයි අපි නිවැරදි දේ කරලා පෙන්වලා තියනවා. කලින් අමාත්යාංශ 28ක් තිබුණා. ඒක 25කට අඩුකරලා දැන් 03කට අකුලගෙන කරන්නෙ. කරදරයක් නැතිව වැඩේ කරනවා. මේ වැඩේ කරන්න ඇමති, නියෝජ්ය ඇමති, රාජ්ය ඇමති වගේ ඇමතිවරු හැට ගණනක් හිටියා. ”
“මේ තියෙන්නේ මොකක්වත් නෙමෙයි. මාලිමාවට විරුද්ධව කියන්න දේවල් නැති වුනාම එක එක දේවල් කියැවීම. ඒ අයගෙ මතය ප්රතික්ෂේප කරලා ජනතාව ඡන්දය දීලා තියනවා. රනිල් වික්රමසිංහ ගැන නම් කියන්න තියෙනේ ඔහු දැන් පැරදිලා දරාගන්න බැරිව දොඩවනවා. ඉස්සර අපේ ගම්වල ඉන්නේ එහෙම වයසක කට්ටිය. ඔහේ කටට ආවට දොඩවනවා. මාධ්ය අවස්ථාවක් තියනවා. එයා කියවනවා. ”
ඉදිරියේ දී තවත් බොරු නිර්මාණය වන්නට ඉඩකඩ ඇති බවත් ඒ කිසිම අවලාදයකට නොසැලී මාලිමාවේ රජය ශක්තිමත් කිරීමට පාර්ලිමේන්තු බලය ලබා දෙන ලෙසත් ටිල්වින් සිල්වා ඉල්ලා සිටියේය.
