මනම්පිටිය නිමල් ජයරත්න –
ඓතිහාසික දිඹුලාගල ආරණ්ය සේනාසනයේ ශ්රී මහා කාශ්යප මහ පිරිවෙනේ ඉගෙනුම ලබන සාමනේර භික්ෂූන් වහන්සේලාට සහ දහම් පාසල් ආචාර්යවරුන්ට මෙන්ම සිසුන්ට ඉගෙනුම් උපකරණ සහ පාසල් පොත් බෑග් පරිත්යාග කිරීම යුද හමුදාපති ලුතිතන් ජෙනරාල් ලසන්ත රුද්රිගෝ ගේ සහ යුද හමුදාවේ උසස් නිලධාරීන්ගේ සහභාගිත්වයෙන් ඓතිහාසික දිඹුලාගල ආරණ්ය සේනාසනයේදී අද (20) සිදුවිය.
ඓතිහාසික දිඹුලාගල ආරණ්ය සේනාසනාධිපති දිඹුලාගල රාහුලාලංකාර නාහිමියන්ගේ අනුශාසකත්වයෙන් පැවැති මෙම උත්සවයේදී, ශ්රී මහා කාශ්යප පිරිවෙනේ ගුරුවරුන් දහදෙනකු සහ සාමනේර භික්ෂූන් වහන්සේලා පනස්හත් නමක් සඳහා ඉගෙනුම් උපකරණ සහ පොත්පත් ලබාදීමට මෙහිදී යුධ හමුදාපතිවරයා කටයුතු කළේය.
මීට අමතරව ප්රදේශයේ දහම් පාසල් කිහිපයක දහම් පාසල් ආචාර්යවරුන් දොළොස් දෙනෙකු සඳහාද ත්යාග පිරිනැමූ යුද හමුදාපති ලුතිතන් ජෙනරාල් ලසන්ත රුද්රිගෝ දහම් පාසල් දරු දැරියන් 140 ක් සඳහාද පාසල් පොත් සපත්තු වව්චර් මෙන්ම බෑග් පිරිනැමීමද සිදු කළේය.
දිඹුලාගල ශ්රී මහා කාශ්යප මහ පිරිවෙනේ ප්රධානාචාර්ය මහනුවර විචිත්රාලංකාර නායක ස්වාමීන් වහන්සේගේ ඉල්ලීම පරිදි, ශ්රී ලංකා යුද හමුදාවේ සේවා වනිතා ඒකකය මගින් මෙම වැඩසටහන සංවිධානය කර තිබුණි.
මෙම අවස්ථාවට දිඹුලාගල ශ්රී මහා කාශ්යප මහ පිරිවෙනි ගරුතර මහා සංඝරත්නය, නැගෙනහිර ආරක්ෂක සේනාංකාධිපති මේජර් ජෙනරාල් ජනක පල්ලේකුඹුර, 23 වන පාබල සේනාංකාධිපති මේජර් ජෙනරාල් ප්රියංක කුලතිලක, 231 පාබල බලසේනා මූලස්ථානයේ බලසේනාධිපති බ්රිගේඩියර් අනුර මලන්දෙණිය ඇතුළු යුද හමුදාවේ උසස් නිලධාරීන්, දහම් පාසල් ආචාර්යවරුන්, සිසු දරු, දැරියන්, සහ ඔවුන්ගේ දෙමාපියන් විශාල පිරිසක් ද මේ අවස්ථාවට සහභාගි වී සිටියහ.
