තැලිසීමියා රෝගය තිබූ අනෙකුත් රටවල් එම රෝගය සම්පූර්ණයෙන්ම පාලනය ක තිබියදී ශ්‍රී ලංකාවේ ජනගහනයෙන් 3%ක් තැලසීමියා වාහකයින් බවට අනාවරණය වී ඇති බවත් දශමයකින්වත් තැලසීමියා රෝගීන් බිහිවීම වළක්වා ගැනීමට ශ්‍රී ලංකාවට නොහැකි වී ඇති බවත් කැලණිය විශ්වවිද්‍යාලයේ වෛද්‍ය පීඨ ඒකකයේ ළමා රෝග පිළිබඳ මහාචාර්ය වෛද්‍ය සචිත් මෙත්තානන්ද කියා සිටියේය.
තැලිසීමියා රෝගීන් බිහි වීම වළක්වා ගැනීමට කළ යුතු එකම දේ වන්නේ තැලසීමියා වාහක දෙදෙනෙකු අතර විවාහය නැවැත්වීම බවත් හැමකෙනෙකුම තමන්ගේ විවාහයට පෙර තැලසීමියා වාහකයෙක් ද නැද්ද කියන එක අනිවාර්යයෙන්ම සොයා ගත යුතු බවත් වෛද්‍යවරයා කීවේය. විවාහයට පෙර තැලසීමියා රෝගියෙක් ද යන්න හඳුනා ගැනීම නොමිලයේ පහසුවෙන් කළ හැකි පරීක්ෂණයකින් හඳුනා ගත හැකි බවත් වෛද්‍යවරයා තවදුරටත් කීවේය.
“ලෝකයේ තැලසීමියාව බහුල රටවල් අතරින් එකක් තමා ශ්‍රී ලංකාව. තැලසීමියාව බහුල අනෙක් රටවල් ගත්තොත් ග්‍රීසිය, ඉතාලිය, සයිප්‍රසය වගේ ඒ රටවලට පුළුවන්කම ලැබිලා තියෙනවා තැලසීමියා රෝගීන් බිහිවීම සම්පූර්ණයෙන්ම වළක්වා ගන්න. අපේ සෞඛ්‍ය සේවයට පහසුවෙන් ජනතාව අතරට යන්න පුළුවන්. එහෙම වෙලත් අපිට දශමයකින්වත් මේ තැලසීමියා රෝගීන් බිහිවීම වළක්වා ගන්න බැරිවෙලා.” යැයිද වෛද්‍යවරයා පැවසීය.
තැලසීමියා රෝගීන් දෙදෙනෙක් අතර විවාහයක දී 25%කට පමණ මහා තැලසීමියාව සහිත දරුවන් ඉපදිය හැකි බවත් 50%ක් තැලසීමියා වාහක දරුවන් බිහි විය හැකි බවත් 25%ක් නිරෝගී බවත් කුරුණෑගල ශික්ෂණ මහ රෝහලේ තැලසීමියා ඒකකයේ වෛද්‍ය මානෙල් රත්නායක කියා සිටියාය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
“මෙතැන තියෙන්නේ ඇත්තටම සම භාවිතාවයක්. මහා තැලසීමියා දරුවෙක් ඉන්න පවුල්වල සමහර වෙලාවට වැරදි මතයක් තියෙනවා ඊළඟ දරුවා හදාගත්තොත් ඉතුරු කොටස්වලින් දරුවෝ ඉඳිවි කියලා. එහෙම වෙන්නේ නෑ. තැලසීමියා වාහක සහ තැලසීමියා නැති විවාහයක් 50%ක් දරුවන් තැලසීමියා වාහක වෙන්න පුළුවන්. ඒ වගේම 50%ක් තැලසීමියා වාහක නෙමෙයි. එතකොට අපි දන්නවා කිසිම වේලාවක මෙැවනි විවාහවලදී මහා තැලසීමියා රෝගී දරුවන් බිහිවෙන්නේ නෑ. කේන්දර ගළපා ගන්නවා ට වඩා විද්‍යාත්මක පදනමක් ඇති තැලසීමියා පොරොන්දම බලමින් විවාහයට යොමුවෙන්න.” යැයිද වෛද්‍යවරිය මාධ්‍යට කියා සිටියාය.