ශ්රියානි විජේසිංහ –
-
අද දිනය තුළ දී රෝහල් 31ක් එක් වෙයි… වර්ජනයට හේතුව බස්නාහිර පලාත් සෞඛ්ය සේවා අධ්යක්ෂකවරිය වරියගේ අත්තනෝමතික හැසිරීම බව වර්ජකයෝ කියති!
බස්නාහිර පළාත් සභාවට අයත් සියලු රෝහල්වල පරිපූරක වෛද්ය වෘත්තිකයන් අද (21 වෙනිදා) උදෑසන 8 සිට අඛණ්ඩ වර්ජනය ආරම්භ කිරීමට තීරණය කර ඇත.
අද රාත්රියේ රැස්වූ පරිපූරක වෛද්ය වෘත්තීයවේදීන්ගේ ඒකාබද්ධ බල මණ්ඩලයේ නායකයන් සහ බස්නාහිර පළාත් සභා රෝහල්වල සියලුම සාමාජිකයන්ගේ සාකච්ඡාවේදී මෙම තීරණයට එලඹි බවත් ඒ අනුව ඊයේ (20) උදෑසන 8.00ට ගම්පහ දිස්ත්රික් මහ රෝහලෙහි ආරම්භ කළ මෙම වර්ජනයට අද (21) දිනය තුළදී රෝහල් 31ක් සහභාගි වන බව පරිපූරක වෛද්ය වෘත්තීයවේදීන්ගේ ඒකාබද්ධ බලමණ්ඩලයේ ලේකම් චානක ධර්මවික්රම පැවසුවේය.
මෙම වර්ජන ක්රියාමාර්ගය ට අවතීර්ණය වීමට සිදුවූයේ බස්නාහිර පලාත් සෞඛ්ය සේවා අධ්යක්ෂකවරිය විසින් විනිවිදභාවයකින් තොරව අත්තනෝමතික ලෙසින් නිලධාරීන් රෝහල් වලින් ස්ථානමාරු කිරීමට ගත් ක්රියාමාර්ගය හේතුවෙන් යැයි ලේකම්වරයා පවසා සිටියි.
බස්නාහිර පළාත් සෞඛ්ය සේවා අධ්යක්ෂවරියගේ ක්රියා කලාපය සම්බන්ධයෙන් වගකිවයුතු සියලු පාර්ශවයන් මේ වන විට දැනුවත් කර ඇති අතර මෙම නිලධාරීනිය ඇතුලු සමහර නිලධාරීන් සෞඛ්ය වෘත්තිකයන් නොසන්සුන් කොට වර්ජන වලට පොළඹවා රෝගීන්, රජය සහ වෘත්තිකයන් අපහසුතාවයට පත්කරන බව හෙතෙම පෙන්වා දුන්නේය.
මෙම වර්ජනය අඛණ්ඩ ක්රියාමාර්ගයක් ලෙස ආරම්භ කරන අතර ජීවිතාරක්ෂක සේවා ආවරණය අදාල රෝහල් අධ්යක්ෂකවරුන් ලබා දෙන සහයෝගය මත සිදුකිරීමට සාමාජිකයන් වෙත උපදෙස් ලබා දී ඇත.
ගැටලුවට විසඳුමක් ලැබෙන ඕනෑම අවස්ථාවක වර්ජනය අවසන් කිරීමට සූදානම් අතර විසඳුම් නොලැබේ නම් තවදුරටත් ක්රියාමාර්ග දැඩි කිරීමට මේ වන විට සියලු සාමාජිකයන් පූර්ණ එකගතාව ලබා දී ඇතැයිද පැවසේ.
වර්ජනය හේතුවෙන් සියලු විකිරණ පරීක්ෂණ සේවා, CT පරීක්ෂණ සේවා, සියළු රසායනාගාර පරීක්ෂණ සේවා , ඖෂධ නිකුත් කිරීම, බෙදාහැරීම ඇතුලු පරිපූරක වෛද්ය වෘත්තීයවේදීන්ගේ විසින් සිදුකරන සියළු සේවා අඩාල වෙන බව බලමණ්ඩලය අවධාරණය කරයි.
