ආදරණීය සහෘදයෙක්, ජනතාවාදී කලාකරුවෙක් මෙන්ම දයාබර රසිකයෙක් වු ප්රවීන රංගන ශිල්පී නලීන් ප්රදීප් උඩවෙල දිවිසැරියෙන් සමුගත් බව ඉතාම සංවේගයෙන් ලියා තබමු.
නලීන් 56 වැනි වියෙන් සිය දිවි ගමන අකාලයේ නිමා කරන්නේ අද (23) උදෑසන 5.45ට පමණ මහරගම අපේක්ෂා රෝහලේ ප්රතිකාර ලබමින් සිටිය දී ය.
නලීන් කලාකරුවෙක් වශයෙන් පමණක් නොව තමන් අදහන දේශපාලනය වෙනුවෙන් ජීවිත වරප්රසාද කැප කර ඉදිරිපත් වූ දේශපාලනඥයෙකි. 2014 පළාත් සභා මැතිවරණයේ දී හෙතෙම පළාත් සභා මන්ත්රීවරයෙක් ලෙස බස්නාහිර පළාත් සභාවට තේරී පත් වන්නේය. ඒ මහින්ද රාජපක්ෂ දේශපාලනයට එරෙහි දේශපාලනයක් කළ සරත් ෆොන්සේකා ගේ නායකත්වය සහිත ප්රජාතන්ත්රවාදී පක්ෂයෙනි.
නලීන් උපත ලබන්නේ 1969 මාර්තු 30 වැනිදා ය. සිනමාව වේදිකාව මෙන්ම ටෙලි නාට්ය තුළ ද ඔහු ප්රකට කළ ප්රතිභාත්මක රංගනය බොහෝ විචාරක පැසසුමට ලක් විය. නලීන් සිය සිනමා ජීවිතය ආරම්භ කරන්නේ 1998 දී ජැක්සන් ඇන්තනි විසින් අධ්යක්ෂණය කළ ජුලියට්ගේ භූමිකාව චිත්රපටයෙනි. ඔහුගේ වඩාත් ජනප්රිය සිනමා රංගන භූමිකාවන් තාරකා මල්, පරාවර්තන සහ ආසයි මං පියාඹන්න චිත්රපටවලින් ප්රකාශ විය.
ජූරිය, කැලණි පාලම, මේඝ, මෝදර මෝල, මී හරක්, නව හුණුවටයේ කතාව, සෙවනැලි ඇද මිනිස්සු, සුද්දෙක් ඔබ අමතයි වේදිකා නාට්යවල නලීන් ප්රදීප් උඩුවෙල දැක්වූ විශිෂ්ට රංග කෞෂල්ය සහෘද රසවතුන්ට කවදාවත් අමතක නොවනු ඇත. බට්ටී, බාලොලි, ඇත්කඳ ලිහිණි, ඉර අවර, ඉසුරු පවුර, මිල්ලෑව වලව්ව, ඇතුළු ටෙලි නාට්ය 42කට වැඩි ප්රමාණයක ඔහු රංගනයෙන් දායක වුනේය. එමෙන්ම ඔහු අවස්ථා ගණනාවක දේශීය සම්මාන උළෙලවල සම්මානයට පාත්ර වූයේය.
මේ ආදරණීය මිනිසාට නිවන් සුව ප්රාර්ථනා කරමු.
