එක්සත් ජනපද නව තීරු බදු ක්රමය පිළිබඳව ගතයුතු ක්රියාමාර්ග සොයා බලා රජයට නිර්දේශ ඉදිරිපත් කිරීම සඳහා පත් කළ කමිටුව සහ ජනාධිපති අනුර කුමාර දිසානායක අතර සාකච්ඡාවක් ජනාධිපති ලේකම් කාර්යාලයේදී පැවැත් වුනේය.
මෙම තීරු බදු පැනවීම හමුවේ රටක් ලෙස ක්රියා කළ යුතු ආකාරය සහ ගත යුතු ඉදිරි ක්රියාමාර්ග පිළිබඳව කමිටුව විසින් ඉදිරිපත් කර තිබෙන යෝජනා මෙහිදී පුළුල්ව සාකච්ඡාවට ලක් කර තිබිණි.
එමෙන්ම මේ හමුවේ ලබාගත හැකි සහන පිළිබඳ ශ්රී ලංකා රජය හැකි ඉක්මණින් එක්සත් ජනපද රජය සමඟ සාකච්ඡා පැවැත්වීමටද නියමිතය.
කමිටුව නියෝජනය කරන ජනාධිපති ජ්යෙෂ්ඨ ආර්ථික උපදේශක දුමින්ද හුලංගමුව, මුදල් අමාත්යාංශයේ ලේකම් මහින්ද සිරිවර්ධන, මහබැංකු අධිපති ආචාර්ය නන්දලාල් වීරසිංහ වෙළෙඳ අමාත්යාංශයේ ලේකම් ඒ. විමලනෙත්තිරාජා, අපනයන සංවර්ධන මණ්ඩලයේ සභාපති මංගල විජේසිංහ, විදේශ කටයුතු අමාත්යාංශයේ ආර්ථික කටයුතු පිළිබඳ අධ්යක්ෂ ජනරාල් දර්ශන පෙරේරා,
ශ්රී ලංකා වාණිජ මණ්ඩලයේ ප්රධාන ආර්ථික ප්රතිපත්ති උපදේශක ශිරාන් ප්රනාන්දු, බ්රැන්ඩික්ස් ආයතනයේ සමූහ ප්රධාන විධායක නිලධාරී අශ්රොෆ් ඔමාර්, මාස් හෝල්ඩිංග් සම නිර්මාතෘ ෂෙරාඩ් අමලීන්, හෙලිස් සමූහ ව්යාපාරයේ සභාපති මොහාන් පණ්ඩිතගේ, ආනන්ද කල්දේරා ය මෙම සාකච්ඡාවට එක්ව සිටියහ.
එමෙන්ම මෙම සාකච්ඡාව සඳහා කම්කරු අමාත්ය සහ ආර්ථික සංවර්ධන නියෝජ්ය අමාත්ය අනිල් ජයන්ත ප්රනාන්දු, මුදල් හා ක්රමසම්පාදන නියෝජ්ය අමාත්ය හර්ෂණ සූරියප්පෙරුම ද සහභාගි වී ඇත.
