කීර්ති ප්‍රනාන්දු –
කිරින්ද මහා රාවනා ප්‍රදීපාගාරයට නාවික සැතපුම් 480ක් නැගෙනහිර දෙසින් මුහුදේ ගිනිගැනීමට ලක්ව ඇති එම්.එස්.සී.මෙසීනා බහාලුම් නෞකාවේ කාර්ය මණ්ඩල සාමාජිකයෙක් අතුරුදන් වී ඇති බවට තොරතුරු ලැබී ඇතැයි නාවික හමුදා මාධ්‍ය ප්‍රකාශක අංශය පැවසුවේය.
මෙම නෞකාවේ කාර්ය මණ්ඩලයේ සාමාජිකයන් 28ක් පමණ සිට ඇති බවත් අතුරුදන් වී ඇත්තේ එම පිරිසෙන් අයෙක් බවත් පැවසේ.
දිගින් මීටර 300ක් හා පළලින් මීටර 37ක් වූ මෙම නෞකාව 1995 වර්ෂයේ දී නිශ්පාදනය කරන ලද්දක් බව වාර්තා වේ.
මීට දින 03කට පෙර කොළඹ වරායෙන් පිටත්ව සිංගප්පූරුව බලා ගමන් ආරම්භකර ඇති මෙම නෞකාව තුළ මෙම ගින්න හටගෙන ඇත්තේ ජාත්‍යාන්තර මුහුදේ දී බව ද නාවික හමුදාව පැවසුවේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මෙම නැව ගිනිගැනීමට ලක්ව ඇති මුහුදු කලාපය ශ්‍රී ලංකා ගලවා ගැනීමේ කලාපයට අයත් බැවින් සෑම අංශයක්ම මේ වනවිට දැනුවත් කර ඇති බව ද නාවික හමුදා මාධ්‍ය අංශය පැවසුවේය.
ගිනිගත් නෞකාවේ කපිතාන්වරයා නැවේ ඇන්ජින් කාමරයේ ගින්නක් හටගෙන ඇති බව අද අලුයම නාවික හමුදාව වෙත දැනුම් දී තිබිණි.
මේ අතර ගිනි ගැනීමට ලක් වූ බහාලුම් නෞකාවට නුදුරින් ගමන්කරමින් තිබූ වෙළෙඳ නෞකාවක් ගිනි ගෙන ඇති නෞකාව ඇසලට යොමු කිරීමට පියවර ගත් බවද නාවික හමුදාව පවසයි.
