සංවිධානාත්මක අපරාධ කල්ලි සාමාජිකයෙක් වූ පියුම් හස්තික නොහොත් “පියුමා ” ලබන 15 වනදා දක්වා තවදුරටත් රක්ෂිත බන්ධනාගාර ගත කරන ලෙස කොළඹ කොටුව මහෙස්ත්රාත් ඉසුරු නෙත්ති කුමාර අද ( 02) නියෝග කළේය.
සූම් තාක්ෂණය ඔස්සේ අධිකරණයට ඉදිරිපත් කළ මෙම සැකකරු ත්රස්තවාදය වැළැක්වීමේ පනත යටතේ බන්ධනාගාරගත කර සිටින පුද්ගලයෙකි.
ඔහුට එරෙහිව සිදුකරන විමර්ශන සම්බන්ධව ඉදිරිපත් වූ කරුණු සලකා බැලූ මහෙස්ත්රාත්වරයා මෙම සැකකරු ලබන 15 වනදා දක්වා රක්ෂිත බන්ධනාගාර ගත කිරීමට නියම කළේය.
පසුගිය වසරේ පෙබරවාරි මස 15 වැනිදා ඩුබායි රාජ්යයේ සිට මෙරටට රැගෙන පැමිණි පියුම් හස්තික හෙවත් පියුමා පානදුරේ කුඩු සළිඳුගේ සමීපතම ගෝලයෙකි. 2021 වසරේ ජනවාරි 25 වැනිදා මාවතගේ ලක්ෂාන් සඳරුවන් නැමැති ධීවර කාර්මිකයා වෙඩි තබා ඝාතනය කළ වෙඩික්කරු ඝාතනය සඳහා රැගෙන ගිය පැදිකරු පියුමාය.
එමෙන්ම 2022 වසරේ ජූනි මස 29 වැනිදා මොරටුව කටුබැද්ද මංසන්ධිය අසලදී නිලන්ත කුමාර සහ මොහොමඩ් සාවුඩ් මොහොමඩ් සම්සාඩ් යන දෙදෙනාට වෙඩි තබා ඝාතනයන් ද පියුමා විසින් මෙහෙයවා ඇති බව විමර්ශන අංශ අනාවරණය කරගෙන තිබිණි. තවද මත්ද්රව්ය ජාවාරම් සම්බන්ධව ඔහුට එරෙහිව පැමිණිලි ගණනාවක් අධිකරණවල විභාග වෙමින් ඇත.
