ශ්රී ලංකාවේ රග්බි ප්රවර්ධනය කිරීමේ මුවාවෙන් ඉන්දීය සමාගමක් වන ‘ක්රිෂ්’ වෙතින් රුපියල් මිලියන 70ක මුදලක් ලබාගැනීමෙන් පාර්ලිමේන්තු මන්ත්රී නාමල් රාජපක්ෂ මුදල් විශුද්ධිකරණය වැළැක්වීමේ පනත යටතේ වරදක් සිදු කළ බවට චෝදනා කරමින් නීතිපතිවරයා නඩුව ගොනුකර තිබේ.
මේ වනවිට නාමල් රාජපක්ෂ පාර්ශවය පවසන්නේ මෙම මිලියන 70 වියදම් වූ ආකාරය පිළිබඳව සවිස්තර වාර්තාවක් පොලිස් දෙපාර්තමේන්තුවට ලබා දී ඇති බවය.
නමුත් පොලිසිය එම සම්පූර්ණ වියදම් වාර්තාව අස්ථානගත කරගෙන ඇතැයි එම පාර්ශවයෙන් චෝදනා කරන අතර එය නීතිපති දෙපාර්තමේන්තුවට ලබාදී නැති බවද පවසයි. නාමල් රාජපක්ෂ පාර්ශවය දැන් කියන්නේ වියදම් වාර්තාව අස්ථාන ගත කරගෙන පොලිසිය ඉදිරිපත් කර ඇත්තේ විස්තර වාර්තාව නොමැතිව ආවරණ ලිපිය ලිපිය පමණක් බවය.
කෙසේ වෙතත් රගර් ක්රීඩාවේ ප්රවර්ධනය සඳහා ක්රිෂ් ට්රාන්ස්වර්ක් ප්රයිවට් ලිමිටඩ් නමැති ඉන්දියානු සමාගම විසින් ලබාදුන් රුපියල් මිලියන 70ක මුදලක් සාපරාධි පරිහරණය කිරීමේ චෝදනාව යටතේ පාර්ලිමේන්තු මන්ත්රී නාමල් රාජපක්ෂ එරෙහිව පවරා ඇති නඩුවේ පූර්ව නඩු විභාග සම්මන්ත්රණය ලබන දෙසැම්බර් 18 වැනිදා ආරම්භ කිරීමට කොළඹ මහාධිකරණ විනිසුරු නදී අපර්ණා සුවදුරුගොඩ ඊයේ (26දා) දින නියම කර ඇත.
එකී චෝදනාවලට පාදකව කොටුව මහෙස්ත්රාත් අධිකරණය හමුවේ පැවැති මූලික විමර්ශනවලට අදාළ නඩු ගොනුව වහාම තම අධිකරණයට කැඳවීමට ද විනිසුරුවරිය නියෝග කළාය.
එයට අමතරව විත්තිය විසින් ඉල්ලා ඇති නඩුවට අදාළ ලේඛනවල පිටපත් ඉදිරි දිනයට පෙර විත්තියට ලබාදීමට පියවර ගන්නා ලෙසටද විනිසුරුවරිය නීතිපතිවරයාට නියෝග කළාය.
එම නඩුව ඊයේ (26දා) විවෘත අධිකරණය හමුවේ කැඳවූ අවස්ථාවේදී විත්තිය වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් කරුණු දක්වමින් තමන් විසින් පැමිණිල්ලෙන් ඉල්ලා ඇති ලේඛන බහුතරයක් විත්තියට ලබාදී ඇතත් තවත් ලේඛන රැසක අඩුපාඩුවක් පවතින බව විවෘත අධිකරණය හමුවේදී පෙන්වා දුන්නේය.
සාධාරණ නඩු විභාගයකට මුහුණදීම සඳහා විත්තියට එකී ලේඛන අවශ්ය වන්නේ යැයිද ජනාධිපති නීතිඥවරයා අධිකරණයට එහිදී වැඩිදුරටත් පැවසීය.
මෙකී නඩුකරයට අදාළ වූ ලේඛන බහුතරයක් පැමිණිල්ල විසින් විත්තියට ලබාදී ඇති බවත් විත්තිය ඉල්ලා ඇති සමහර ලේඛන මෙම නඩුවට පාදක නොවන එම විත්තිකරුට එරෙහිව කොළඹ ප්රධාන මහෙස්ත්රාත් අධිකරණයට වාර්තා කොට ඇති මේ වනවිටත් විමර්ශන අවසන් නොමැති සිද්ධියකට අදාළ ඒවා වන බැවින් එකී ලේඛන ලබාදීමේ හැකියාවක් නොමැති බවත් නීතිපතිවරයා වෙනුවෙන් පැමිණිල්ල මෙහෙය වන නියෝජ්ය සොලිසිටර් ජනරාල් වසන්ත පෙරේරා අධිකරණයට පැවසීය.
කෙසේ නමුත් මෙකී අධිචෝදනා පත්රයට අදාළ කාලසීමාව සම්බන්ධයෙන් යම් ලේඛනයක් ලබාදීමට ඇත්නම් ඒවාද නොපමාව ලබාදීමට පියවර ගන්නේ යැයි ද නියෝජ්ය සොලිසිටර් ජනරාල්වරයා අධිකරණයට දැනුම් දුන්නේය. දෙපාර්ශ්වය විසින් ඉදිරිපත් කළ සියලු කරුණු සලකා බැලූ මහාධිකරණ විනිසුරුවරිය පෙරකී නියෝගය කළාය.
රජයේ අධිනීතිඥ අකිලා දල්පදාතු සමග නියෝජ්ය සොලිසිටර් ජනරාල් වසන්ත පෙරේරා මහතා නීතිපතිවරයා වෙනුවෙන් පැමිණිල්ල මෙහෙය වූ අතර නීතිඥ නිශ්ශංක පීරිස්, අතුල ද සිල්වා, අනුරාධ වේරගොඩ යන මහත්වරුන් සමග ජනාධිපති නීතිඥ සම්පත් මෙන්ඩිස් විත්තිය නියෝජනය කළහ.
