චීන ආරක්ෂක අමාත්‍යවරයා මෙරට සංචාරය සඳහා පැමිණි අවස්ථාවේදී පූර්ව දැනුම් දීමකින් තොරව පොලීසිය මාර්ග වසා දැමුවේ රාජ්‍ය නායකයෙක් මෙරට සංචාරය කරන අවස්ථාවකදී මෙන් අතුරු මාර්ග සියල්ලක්ම මුද්‍රා තබමිනි. අඩුම තරමින් පා ගමනින් වත් පුද්ගලයෙකුට මාර්ගය හරහා ගමන් කිරීමට ආරක්ෂක අංශ ඉඩ දුන්නේ නැත.
චීන ආරක්ෂක ඇමතිවරයා රැගත් යානාව ඉක්තු 27 වෙනිදා රාත්‍රියේ කටුනායක ගුවන් තොටුපොළය ගොඩබස්වා ඔහු ගුවන් යානයෙන් පිටතට අඩිය තැබූ මොහොතේම ඔහු කටුනායක සිට කොළඹ නවාතැන් ගන්නා හෝටලය වෙත ගමන් ගන්නා සියළුම මාර්ග සෙසු වාහන ධාවනයට වසා දැමුවේය. මාර්ගයේ ගමන් කිරීමට අවසරය හිමිවන්නේ චීන ආරක්ෂක ඇමතිවරයාගේ රථවාහන සහ ඔහුගේ ආරක්ෂක රථවලට පමණි.
පූර්ව දැනුම්දීමකින් තොරව සිදුවූ මෙම මාර්ග වසා දැමීම ගැන කිසිවක් නොදත් බොහෝ අය සිතුවේ ජනාධිපති හෝ අගමැතිවරයා හෝ අපේ රටේ ඇමතිවරයෙක් වෙනුවෙන් මෙසේ මාර්ගය වසා දමා ඇති බවකි. පොලීසිය සමග ගැටීමට නොහැකි නිසා බොහෝ රියදුරන් මාර්ගය දැන් විවෘත කරනු ඇතැයි සිතමින් පොලීසියටද අම්මා මුත්තා නොමැතිව හිතෙන් බැන වදිමින් සිටියහ.
එහෙත් බොරැල්ලේ සිරවී සිටි තරුණ රියදුරෙක්ට නම් විනාඩි 15 ක් 20 ක් ගිය තැන ඉවසුම් නොමැති විය. ඔහු දැඩිව පොලීස් නිලධාරීන්ට දෝෂාරෝපනය කරමින් සෙසු රියදුරන් පොළඹවන්නට වූයේ වාහනවල නලා නාදකරමින් විරෝධය දක්වන්නටය. එය ඔහු සජීවීව සිය මුහුණු පොත ඔස්සේ රටටම කීවේය. එදා මාර්ගය වසා දැමීමෙන් පීඩනයට ලක්ව සිටි රියදුරන් සිය ගණනක් නලා නාදකරමින් පොලීසියට සිය විරෝධය දැක්වූයේ ඔහුගේ බහට අවනත වෙමිනි.
දැන් චීන විදේශ ඇමති මෙරටින් පිටවගොස් දිනක් දෙකක් ගතවී හමාරය. සමාජ මාධ්‍යෙය් අර වීඩියෝව උණු කැවුම් මෙන් හුවමාරුවන්නේ සමාජය තුළ යම් කථිකාවතක්ද ඇතිකරමිනි. ඒත් එක්කම කළබලවන පොලිස් ලොක්කන් බොරැල්ල පොලීසියට නියෝගයක් දෙන්නේ අදාල තරුණයාව සොයා අත්අඩංගුවට ගෙන පොලිස් රාජකාරියට බාධා කළ බවට චෝදනා එල්ලකරමින් අධිකරණයට ඉදිරිපත් කරන ලෙසටය.
ඒ අනුව බොරුල්ල පොලීසියේ නිලධාරීන් ඒ තරුණයා කවුරුන්දැයි සොයා ගත්තේය. 32 හැවරදි වියේ පසුවන එම තරුණයා බත්තරමුල්ල පැලවත්තේ පදිංචිකරුවෙකි. පොලීසිය ඊයේ 29 එම තරුණයාව අත්අඩංගුවට ගත්තේය. සොයා බැලීමකදී අනාවරණය වන්නේ වසර 10 කට වැඩි කායක් ඔහු ඕස්ට්‍රේලියාවේ අධ්‍යාපනය ලබා මෙරටට පැමිණ සිටින්නෙක් බවය. රැකියාවක තවමත් නිරත නොවන ඔහු සිටින්නේ නැවතත් ඕස්ට්‍රේලියාව බලා යන්නටය. අද 30 මේ තරුණයාව පොලීසිය අධිකරණයට ඉදිරිපත් කරන්නට නියමිතව සිටින්නේ රාජකාරියට බාධා කිරීමේ චෝදනාවන්ටය. එම චෝදනාවට ඔහු වරදකරුවුවහොත් සිදුවන්නේ ඕස්ට්‍රේලියා යාමේ අවස්ථාව ඔහුට අහිමිවී යාමය.
එහෙත් කිසිම පූර්ව දැනුම් දීමකින් තොරව ප්‍රධාන මාර්ගයක් වසා දමන්නේ කෙසේ දැයි ඔහු පොලිසියෙන් ප්‍රශ්න කරන්නේය. මේ තර්කය හමුවේ පොලිසිය ද නිරුත්තරය.
පොලිස් පොඩ්ඩන්ට කළ හැකි දෙයක් නැත. ඔවුන්ට සිදුව ඇත්තේ තමන්ට ඉහළින් ලැබෙන අණ පිළිපදින්නටය. නීතිය ඔවුන්ට අවශ්‍ය හැටියටය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
තමන් විරෝධය පලකළේ චීන ආරක්ෂක ඇමතිට බව පාරේ හිර වී සිටි මිනිසුන් දැනගෙන සිටියේ නැත. එහෙත් ඒ විරෝධය දැක්වූයේ චීන අගමැතිට බව මේ රටේ ලොක්කන් හිතනවා නම්… ඔවුන් කැමති කිසිවෙකුට එරෙහිව අපට අපේ වාහනයේ හෝන් එකවත් ගහන්නට බැරිය.