අනුරාධපුර – පර්සි කුරුනේරු –
උතුරුමැද පළාතේ පාසල්වල පැවැති ගුරු පුරප්පාඩු පිරවීම සඳහා ගුරු පත්වීම් 1444 ක් පිරිනැමීමේදී ඇතැම් පත්වීම්ලාභීන්ගෙන් එම පළාත් සභාවේ රාජ්ය නිලධාරින් අල්ලස් වශයෙන් මුදල් ලබාගෙන ඇති බවට උතුරුමැද පළාතේ ගුරු විභාගය සමත් රැකියා විරහිත උපාධාරීන්ගේ සංගමය චෝදනා කර සිටිති.
උතුරු මැද පළාතේ ගුරු විභාගයේ දෙවන අදියරේ සිදුවූ අක්රමිකතා මැයෙන් එම පළාත් ආණ්ඩුකාර වසන්ත ජිනදාස මහතා වෙත බාර දුන් ලිපියක මේ බව සඳහන් කොට ඇත.
එම රැකියා විරහිත උපාධිධාරීන්ගේ සංගමයේ උතුරු මැද පළාත් සභාපති ඒ.එම්.එස්.ප්රියංකරගේ අත්සනින් යුත් එම ලිපිය රැකියා නොලද උපාධිධාරින් පිරිසක් විසින් පසුගියදා ආණ්ඩුකාරවරයා වෙත භාර දී තිබේ.
එම ගුරු විභාගයට ඉදිරිපත්ව මෙතෙක් ගුරු පත්වීම් නොලැබ අගතියට පත්ව සිටින ඉතිරි රැකියා විරහිත උපාධිධාරීන් නව සියයකට ආසන්න පිරිසකට සාධාරණ තීන්දුවක් ගෙන ඔවුන්ටද සම්මුඛ පරීක්ෂණයකට පෙනී සිටීමේ අවස්ථාව ලබාදෙන ලෙසත්
නොඑසේ නම් එකී ලිඛිත ගුරු විභාගයේ සමස්ත ක්රියාවලිය ඉතා පිරිසිදුව සාධාරණ මෙන්ම විනිවිද භාවයකින් යුතුව සිදුකර ඇති බව සනාථ කිරීමට සියලු අපේක්ෂකයින්ගේ ප්රශ්න පත්රවල ලකුණු අපක්ෂපාතී අධීක්ෂණ මණ්ඩලයක් යටතේ නැවත පරීක්ෂා කරවා ඔවුන්ගේ සත්ය ලකුණු අනාවරණය කරන ලෙසත් ඔවුන් සිය ලිපියෙන් පළාත් ආණ්ඩුකාරවරයාගෙන් ඉල්ලීමක් කොට ඇත.
මේ වසරේ මාර්තු 09 වැනි දින පැවැති ගුරු විභාගයේ ප්රතිඵල නිකුත් කිරීමට පෙර කිසිදු විනිවිද භාවයකින් තොරව තෝරාගත් විභාග අපේක්ෂකයින් එක දහස් නවසිය තිස් එක් දෙනකු පමණක් සම්මුඛ පරීක්ෂණයට කැඳවීම සම්බන්ධයෙන් තමන් උතුරු මැද පළාත් රාජ්ය සේවා කොමිසමේ ලේකම්වරියගෙන් විමසීම් කළ අවස්ථාවේදී විභාගයට පෙනී සිටි ඉතිරි සියළු අපේක්ෂකයන් විභාගය අසමත් බව ප්රකාශ කර සම්මුඛ පරීක්ෂණයට කැඳවීම් නොකළ බවත් ප්රකාශකොට තිබේ.
විභාගය සමත් ඉතිරි විභාග අපේක්ෂකයින් විභාගය අසමත් බව පැවසූ ඇය තමන් නොමග යවා ඇති බවත් උතුරු මැද පළාතේ ගුරු විභාගය සමත් රැකියා විරහිත උපාධිධාරීන්ගේ සංගමයේ සභාපතිවරයා සිය ලිපියෙන් අවධාරණය කර සිටී.
මේ අතර තමන්ගේ ලකුණු දැන ගැනීමේ අරමුණින් විවිධ ආකාරයෙන් ඉල්ලීම් සිදු කිරීමට පෙළඹුණු බවත් අවසානයේ රැකියා විරහිත උපාධිධාරීන් විසි තුන් දෙනෙකු පොලිස් අත්අඩංගුවට ගැනීම දක්වා අසරණ තත්වයකට ඇද දැමීමට වගකිවයුතු රාජ්යය නිලධාරීන් කටයුතු කළ බවත් ආණ්ඩුකාර අසන්ත දිනදාස මහතා වෙත බාරදී ඇති ලිපියේ සඳහන් කොට තිබේ.
තම ඉල්ලීම් දිනා ගැනීමට විවිධ අයුරින් ක්රියාකාරකම්වල යෙදීමේ ප්රතිඵලයක් ලෙස අවසානයේ උතුරු මැද පළාත් රාජ්ය සේවා කොමිසම මගින් සමස්ත අපේක්ෂකයින්ගේ අවසන් ලකුණු නිකුත් කළ බවත් එහිදී එම කොමිසමේ ලේකම්වරිය කලින් කර තිබූ ප්රකාශය ව්යාජ බවත් එම ලිපියේ සඳහන්වේ.
මේ අතරින් එම ගුරු විභාගයේ ප්රතිඵල නිකුත් කිරීම සිදු නොකොට කිසිදු විනිවිද භාවයකින් තොරව විභාග අපේක්ෂකයින් සම්මුඛ පරීක්ෂණ කැඳවීමේදී හා ගුරු පත්වීම් ලබාදීමේදී එවකට පැවති දේශපාලන මැදිහත්වීම් මත ගුරුවරුන් බඳවා ගැනීම සිදුකර ඇතැයි එම සංගමය චෝදනා කරයි.
මේ අතර ඇතැම් උපාධිධාරීන් අදාල සම්මුඛ පරීක්ෂණවලට කැඳවීමේදී හා බඳවා ගැනීමේදී පළාත් රාජ්ය නිලධාරීන් අල්ලස් වශයෙන් මුදල් ලබා ගෙන සම්මුඛ පරීක්ෂණවලට කැඳවීම් නොලද විභාගය සමත් අපේක්ෂකයින්ගේ ලකුණු අඩුකර සම්මුඛ පරීක්ෂණ සඳහා කැඳවීම් ලද සහ පත්වීම්ලාභීන්ගේ ලකුණු ඊට සරිලන පරිදි වැඩිකර ඇති බවත් ඔවුහු චෝදනා කර සිටිති.
එමෙන්ම මෙම ගුරු විභාගය සඳහා පෙනී නොසිටි හා සම්මුඛ පරීක්ෂණ සඳහා කැඳවීම් නොලඳ පුද්ගලයින්ටද ගුරු පත්වීම් ලබා දී ඇති බවත් එම සංගමය සිය ලිපියෙන් පෙන්වා දී තිබේ.
එම ලිපිය පහත දැක්වේ.
