ලෝක සාමය පිළිබඳ සිහිනය බිඳවැටෙන ලකුණු… පළමු ගිනි පුපුර අවුලවමින් ඊශ්‍රායලයෙන්  ඉරානයට ප්‍රහාරයක්!..

කපිල කේ හීනටියන –

• ඉරාණ උත්තරීතර නායක අයතුල්ලා අලි කමේනිගේ කාර්යාලය අසල ප්‍රදේශයටත් ප්‍රහාරයක් එල්ල වෙයි… කමේනි ආරක්ෂක ස්ථානයකට යවලා…

කලාපීය නොසන්සුන්තාව දැඩි ලෙස උත්සන්න කරමින්, ඇමරිකා එක්සත් ජනපදයේ ද සම්බන්ධීකරණය ඇතිව ඊශ්‍රායලය ඉරානයට එරෙහිව හමුදා ප්‍රහාරයක් දියත් කර ඇති බව ඊශ්‍රායල බලධාරීන් ප්‍රකාශ කරයි.   

මෙම ප්‍රහාරය    තමන්ට එරෙහිව ඉතා ආසන්න මොහොතක ප්‍රහාරයක් එල්ල කිරීමට සූදානම් වන බවට පැහැදිලි තොරතුරු හෝ සාක්ෂි ලැබුණු විට, එම සතුරු ප්‍රහාරය වළක්වා ගැනීම සඳහා කල්තියා   එල්ල කරන ප්‍රහාරය  “Preemptive Strike” ප්‍රහාරයක් ලෙස ඊශ්‍රයාලය විසින් ප්‍රකාශ කර ඇත.

මෙය හුදෙක්”Preemptive Strike”  ප්‍රහාරයක් නම් එහි ඇත්තේ  ආක්‍රමණයක් නොව, තමන්ට එල්ල වීමට නියමිත විනාශය වළක්වා ගැනීමට ගන්නා පූර්ව ආරක්ෂිත පියවරකි.

එහෙත්  විදෙස් මාධ්‍ය වාර්තා කරන කතාව තැති ගන්වන සුළුය.  ලැබෙන තොරතුරු අනුව  ටෙහෙරානය පුරා පිපිරුම් කිහිපයක් වාර්තා වී තිබේ. ඉන් එකක් එල්ල වී ඇත්තේ  ඉරානයේ උත්තරීතර නායක අයතුල්ලා අලි කමේනිගේ කාර්යාලය පිහිටි ප්‍රදේශයේය.  මධ්‍යම දිස්ත්‍රික්කවලින් දුමාරයක් මතුවනු දකින ආකාරය විදෙස් ඒජන්සි පවසයි.

වාර්තා වලට අනුව, මෙම ප්‍රහාර ආරම්භ වී ඇත්තේ ඉරාන දේශීය වේලාවෙන් සෙනසුරාදා අලුයමය.  එනම් එරට සතියේ වැඩ කරන දින ආරම්භයත් සමඟය. ඊශ්‍රායල ආරක්ෂක අමාත්‍ය ඊශ්‍රායල් කැට්ස්   මෙම මෙහෙයුම නිවේදනය කරමින් කියා සිටියේ, ඊශ්‍රායලයට එල්ල වීමට තිබූ ආසන්න තර්ජන ඉවත් කිරීම මෙහි අරමුණ වූ බවයි.

ඉරානයෙන් එල්ල විය හැකි ප්‍රතිප්‍රහාර අපේක්ෂාවෙන් ඊශ්‍රායල හමුදාව එරට පුරා හදිසි තත්ත්වයක් ප්‍රකාශයට පත් කර ඇති අතර, අධ්‍යාපන කටයුතු, විශාල රැස්වීම් සහ අත්‍යවශ්‍ය නොවන සේවා ස්ථාන තහනම් කර ඇත. මේ අතර ඊශ්‍රායලය පුරා ගුවන් ප්‍රහාර පිළිබඳ අනතුරු ඇඟවීමේ සංඥා ද නාද වෙමින් පවතී.

ෆාර්ස් (Fars) පුවත් ඒජන්සිය සහ තස්නිම් (Tasnim) ඇතුළු ඉරාන රාජ්‍ය මාධ්‍ය සහ අර්ධ රාජ්‍ය මාධ්‍ය ආයතන, ටෙහෙරානයේ විශ්වවිද්‍යාල වීදිය (University Street), ජොම්හූරි (Jomhouri) ප්‍රදේශය සහ උතුරු සෙයිඩ් ඛන්ඩාන් (Seyyed Khandan) දිස්ත්‍රික්කය ඇතුළු ස්ථාන කිහිපයක පිපිරුම් සිදුවූ බව තහවුරු කර ඇත. ටෙහෙරානයේ සිටින ඇසින් දුටුවන් පවසන්නේ අතිවිශාල පිපිරුම් හඬවල් ඇසුණු බවත්, නගරයේ අහස  පුරා දුම් වලාකුළු දක්නට ලැබුණු බවත්ය. මීට අමතරව තබ්රිස් (Tabriz) ඇතුළු අනෙකුත් ඉරාන නගරවලට ද ප්‍රහාර එල්ල වූ බවට වාර්තා ලැබෙමින් ඇත. තහවුරු කළ විදෙස් මාධ්‍ය වාර්තාවල දැක්වෙන්නේ ඉරාන ආරක්ෂක අමාත්‍යාංශය, පරමාණුක බලශක්ති ඒජන්සිය සහ ‘පර්චින්’ (Parchin) හමුදා සංකීර්ණය වැනි උපායමාර්ගික ස්ථාන රැසකට හානි සිදුව ඇති බවය. . මේ වන විට ඉරාන ගුවන් කලාපය සම්පූර්ණයෙන්ම වසා දමා තිබේ.

ඇමරිකානු මැදිහත්වීම සහ “Shield of Judah” (ජූදාගේ පලිහ) මෙහෙයුම

ඇමරිකානු බලධාරීන් මෙම ප්‍රහාර සඳහා තම දායකත්වය ලබා දුන් බව පිළිගෙන ඇති අතර, ජනාධිපති ඩොනල්ඩ් ට්‍රම්ප් ද ඉරානය තුළ “ප්‍රධාන පෙළේ සටන් මෙහෙයුම්” (major combat operations) ආරම්භ කර ඇති බව තහවුරු කර ඇත.  “Shield of Judah” (ජූදාගේ පලිහ) යනු 2026 පෙබරවාරි මස අගභාගයේදී ඉරානයේ හමුදා සහ යටිතල පහසුකම් ඉලක්ක කර ගනිමින් ඊශ්‍රායලය විසින් දියත් කරන ලද දැවැන්ත හමුදා මෙහෙයුමට ලබා දී ඇති කේත නාමයයි.  අද ප්‍රහාරයේ ඉලක්කය වී ඇත්තේ  ටෙහෙරානය ඇතුළු ප්‍රධාන ඉරාන නගරවල පිහිටි මිසයිල මධ්‍යස්ථාන, යුද උපකරණ නිෂ්පාදනාගාර සහ උපායමාර්ගික වැදගත්කමක් සහිත රජයේ ආයතනය. මේ එල්ල වී ඇත්තේ ගුවන් ප්‍රහාර මාලාවකි.

මේ ප්‍රහාරය සමඟ ඉරානය පුරා සන්නිවේදන ජාලයන්ට දැඩි බලපෑම් එල්ල වී ඇති බව වාර්තා වේ. විශේෂයෙන්ම ටෙහෙරානයේ නැගෙනහිර සහ බටහිර ප්‍රදේශවල ජංගම දුරකථන සේවා සම්පූර්ණයෙන්ම ඇනහිට ඇති අතර, එරට ප්‍රධාන අන්තර්ජාල යටිතල පහසුකම් ඉලක්ක කර ගනිමින් සයිබර් ප්‍රහාර (Cyberattacks) එල්ල වී ඇති බවට විශ්වාස කෙරේ.

මෙහි නවතම තත්ත්වය වන්නේ ඊශ්‍රායල හමුදා මෙම ප්‍රහාරය ‘දවල් කාලයේ’ (daylight strikes) එල්ල කිරීමට තීරණය කිරීමය. සාමාන්‍යයෙන් මෙවැනි ප්‍රහාර රාත්‍රී කාලයේදී එල්ල වුවද, සතුරා පුදුමයට පත් කිරීම සඳහා මෙවර දවල් කාලය තෝරාගෙන ඇති බවත්, මෙම මෙහෙයුමේ පළමු අදියර දින හතරක් පුරා ක්‍රියාත්මක වනු ඇති බවත් ආරක්ෂක අංශ පවසයි.

ඉරාන බලධාරීන් මෙම ප්‍රහාරයට එරෙහිව ප්‍රබල ප්‍රතිප්‍රහාරයක් එල්ල කරන බවට ප්‍රතිඥා දී ඇති අතර, මේ වන විට එරට ගුවන් ආරක්ෂක පද්ධති ක්‍රියාත්මක කර ඇත. එසේම, ඉරානයේ උත්තරීතර නායක කමේනි ආරක්ෂිත ස්ථානයක් කරා යොමු කර ඇති බවට ද වාර්තා පළ වේ.

මේ දක්වා ටෙහෙරානයට සිදුව ඇති හානියේ ප්‍රමාණය නිශ්චිතව පැහැදිලි නැතත්, විදුලිය බිඳවැටීම් සහ ප්‍රහාරයට ලක්වූ ප්‍රදේශවල ආරක්ෂාව දැඩි කිරීම හේතුවෙන් එදිනෙදා කටයුතුවලට බාධා පැමිණ ඇති බව නගර වැසියෝ පවසති. මෙම  තත්ත්වය හමුවේ ලෝක වෙළඳපොළේ අස්ථාවරත්වයක් නිර්මාණය වී ඇති අතර, ගැටුම තවදුරටත් ව්‍යාප්ත වේ යැයි පවතින බිය නිසා ජාත්‍යන්තර නායකයින් ඉවසීමෙන් කටයුතු කරන ලෙස සියලු පාර්ශවයන්ගෙන් ඉල්ලා සිටියි.

මේ ප්‍රහාර එල්ල වන්නේ ලෝක සාමය සම්බන්ධ සාධනීය බලාපොරොත්තුවක් සහිත සාකච්ඡා මාලාවක් ඕමානයේ මැදිහත්වීම තුළ සිදුවෙමින් ඇති අවස්ථාවක වීම මෙහිදී අවධාරණය කළ යුතුව තිබේ.