සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
එංගලන්ත සංචාරයේ දී ජෛව බුබුල කඩාගෙන අයාලේ ගොස් වසරක තරග තහනමකට ලක් වූ කුසල් මෙන්ඩිස්, ධනුෂ්ක ගුණතිලක , නිරෝෂන් දික්වැල්ල යන ක්‍රීඩකයින් තිදෙනා ශ්‍රී ලංකා ක්‍රිකට් ගැන කලකිරී ඇමරිකානු ක්‍රිකට් කණ්ඩායමේ ක්‍රීඩා කිරීම සඳහා ඇමරිකාව බලා යාමට නියමිත බව ඇතැම් සමාජ ජාලාවල පසුගියදා හදිසියේ ප්‍රචාරය කෙරුණු පුවත සැලසුම් සහගත බොරුවක් බව හෙළි වී තිබේ.
මෙම ක්‍රීඩකයන් වෙනුවෙන් උක්ත ප්‍රචාරය ලබා ගැනීම සඳහා ෆේස් බුක් පේජ් ඇඩ්මින්වරුන් ගණනාවක් අමතා මුදල් ගෙවා ඇතැයි ද වාර්තා වේ.
මේ පිළිබඳව කළ විමසීමක දී ක්‍රිකට් ආරංචි මාර්ග පැවසුවේ ඇමරිකාව වැනි රටක ජාතික කණ්ඩායමට ක්‍රීඩා කිරීම සඳහා මොන අනාරාධිතව යන ක්‍රීඩකයෙකුට වසර තුනක කාලයක් එම රට තුළ ලීග් ක්‍රිකට් ක්‍රීඩා කිරීම අනිවාර්ය බවය.
එමෙන්ම ඇමරිකාවේ ලීග් ක්‍රිකට් සඳහා විශාල වෙළෙඳපලක් නිර්මාණය වී ඇති බවත් දැනට පකිස්තානු, බටහිර ඉන්දීය කොදෙව් දක්ෂ තරුණ ක්‍රීඩකයන් රැසක් එම වෙළෙඳපල සඳහා තරග කරමින් සිටින බවත් එම ආරංචි මාර්ග කියයි.
එමෙන්ම සාපේක්ෂව විශාල මුදලක් එවැනි ක්‍රීඩකයෙකුට නොගෙවන බවත් එක් ක්‍රීඩා වාරයක් සඳහා ගෙවීම ඇමරිකානු ඩොලර් 35000කට නොවැඩි බවත් වාර්තා වේ.
මෙම වැඩපිළිවෙළ දියත් කළ ඔවුන්ගේ කළමනාකරුම පසුව ඔවුන් ඇමරිකාවට යෑමට කිසිසේත් නොසිතන බවත් මෙවන් ප්‍රචාර ගෙනියන්නේ මේ ක්‍රීඩකයන් අපහසුතාවට පත් කරන පිරිසක් බවත් එක්තරා යූ ටියුබ් කරුවකු ලවා කියවාගෙන ඇතැයි වාර්තා වේ.