දෙහිවල – බොරලැස්ගමුව මාර්ගයේ බෙල්ලන්විල ඇවිදින මංතීරුව අසල පිහිටි අවන්හලක් ඉදිරිපිටදී පෙරේදා (ජූලි 25) රාත්රියේ සිදුවූ වෙඩි තැබීමෙන් එහි හිමිකරු ඝාතනය කිරීමේ සිද්ධියේ සුලමුල අනාවරණය කර ගැනීමට පොලිසිය සමත්ව තිබේ. සිද්ධියට සම්බන්ධ සැකකරුවන් දෙදෙනා ඝාතනය සිදුවූ දින රාත්රියේදීම නවගමුවේදී පොලිස් උගුලකට හසු කරගෙන ඇත.
මෙම වෙඩි තැබීමෙන් බරපතළ තුවාල ලබා කළුබෝවිල ශික්ෂණ රෝහලට (දකුණු කොළඹ ශික්ෂණ රෝහල) ඇතුළත් කිරීමෙන් පසු මියගොස් ඇත්තේ මල්ලව ආරච්චිගේ නෙල්සන් සුදත් අමරසිංහ නමැති 55 හැවිරිදි අවන්හල් හිමිකරුවෙකි. පොලිස් විමර්ශනවලදී හෙළි වී ඇත්තේ ඔහු සංවිධානාත්මක අපරාධකරුවෙකු වන “කොස් මල්ලී” නමැත්තාගේ ඥාතියෙකු වන බවයි. ප්රතිවිරුද්ධ අපරාධ පාර්ශ්වයකින් මෙහෙයවන ලද සැලසුමකට අනුව මෙම ඝාතනය සිදුකර ඇති බවට පොලිසිය සැක කරයි.
සැකකරුවන් කොටු කරගත් ආකාරය වෙඩි තැබීම සිදු කිරීමෙන් පසු සැකකරුවන් ස්කූටර් වර්ගයේ යතුරුපැදියකින් පලාගොස් ඇති අතර, ඒ පිළිබඳව ලද ක්ෂණික තොරතුරු මත පොලිසිය දැඩි සෙදිවිල්ලෙන් පසු විය. ඒ අනුව නවගමුව, නිස්සරණ සිත්බිම පොදු සුසාන භූමිය අසලදී යතුරුපැදිය නවතා තමන් ඇඳ සිටි මුහුණු ආවරණ සහ අත්වැසුම් ගලවමින් සිටි සැකකරුවන් දෙදෙනා නවගමුව පොලිස් නිලධාරීන් විසින් ලුහුබැඳ ගොස් වටලා අත්අඩංගුවට ගෙන තිබේ.
අත්අඩංගුවට පත් සැකකරුවන් බකමූණ ප්රදේශයේ පදිංචි වයස අවුරුදු 28 සහ 37 යන වයස්වල පසුවන්නන් වන අතර, ඔවුන් පලා යාමට භාවිතා කළ යතුරුපැදිය ද පොලිස් භාරයට ගෙන ඇත. අත්අඩංගුවට ගන්නා අවස්ථාවේදී ඔවුන් සන්තකයේ තිබී අයිස් මත්ද්රව්ය (පෙර වාර්තාවල හෙරොයින් ලෙස ද සඳහන් විය) සොයාගෙන ඇති අතර, බෙල්ලන්විල ඝාතන සැලසුමට අදාළ වැදගත් හඬපට කිහිපයක් ද සැකකරුවන්ගේ ජංගම දුරකථනවල තිබී පොලිසිය විසින් සොයාගෙන තිබේ.
වෙඩික්කරු යුද හමුදාවෙන් පලාගිය අයෙක් පොලිස් ප්රශ්න කිරීම්වලදී අනාවරණය වී ඇත්තේ ඝාතනය සිදුකළ ප්රධාන වෙඩික්කරු ලෙස සැක කෙරෙන පුද්ගලයා මින්නේරිය යුද හමුදා කඳවුරෙන් ගිනිඅවි පැන්නීමේ සිද්ධියකට ද සම්බන්ධ, දැනට හමුදාවෙන් පලාගොස් සිටින අයෙකු බවයි.
සිද්ධිය බොරලැස්ගමුව පොලිස් බලප්රදේශය තුළ සිදු වුවද, සැකකරුවන් කොටු කරගත් නවගමුව පොලිසිය මෙම ඝාතනයේ ඉදිරි විමර්ශන කටයුතු සහ ඊට සම්බන්ධ සෙසු අපරාධකරුවන් සොයා පුළුල් පරීක්ෂණ පවත්වයි.
