රුපියල් මිලියන 110කට ආසන්න වටිනාකමක් සහිත කොකේන් තොගයක් ශ්රී ලංකාවට රැගෙන ආ 79 හැවිරිදි ස්පාඤ්ඤ ජාතික කෘෂිකර්ම ඉංජිනේරුවරයෙකු කටුනායක ගුවන් තොටුපොළේදී අත්අඩංගුවට ගැනීමට ශ්රී ලංකා රේගුවේ මත්ද්රව්ය පාලන ඒකකය සමත්ව තිබේ.
මෙම ස්පාඤ්ඤ ජාතිකයා පසුගිය 22 වැනිදා කටාර් එයාර්වේස් ගුවන් සේවයට අයත් QR654 ගුවන් යානයෙන් මෙරටට පැමිණ ඇත. ඔහු සියෙරා ලියෝන් රාජ්යයේ සිට අඩිස් අබාබා සහ දෝහා හරහා මෙම ගුවන් ගමන සිදුකර ඇති බව විමර්ශනවලදී අනාවරණය විය.
ගුවන් තොටුපොළට පැමිණි දින මොහු සන්තකයේ තිබූ අත් බෑගයේ සැකකටයුතු කිසිවක් නොතිබීම හේතුවෙන් ඔහු ගුවන්තොටුපොළෙන් පිටව ගොස් ඇත. ඔහුගේ අනෙක් ගමන් මල්ල වෙනත් ගුවන් යානයකින් මෙරටට පැමිණීමට නියමිතව තිබීම ඊට හේතුවයි.
පසුව මෙරටට ළඟා වූ, ප්රමාද වූ ගමන් මල්ල භාර ගැනීම සඳහා සැකකරු ඊයේ (24) පස්වරු 6.30ට පමණ කටුනායක ගුවන් තොටුපොළේ පැමිණීමේ පර්යන්තය වෙත පැමිණ තිබේ. එහිදී රේගු නිලධාරීන් විසින් අදාළ ගමන් මල්ල පරීක්ෂාවට ලක් කළ අතර, එහි තිබූ සැකකටයුතු ඇසුරුම් කිහිපයක් හේතුවෙන් එය භෞතික පරීක්ෂාවකට ලක් කර ඇත.
එම සෝදිසි කිරීමේදී ගමන් මල්ල තුළ තිබූ ලිපිගොනු රඳවන (File Covers) දෙකක් තුළ ඉතා සූක්ෂම ලෙස සඟවා තිබූ මෙම කොකේන් තොගය සොයා ගැනීමට රේගු නිලධාරීන්ට හැකි විය.
අත්අඩංගුවට ගත් කොකේන් තොගයේ මුළු බර කිලෝග්රෑම් 2.198ක් වන අතර, එහි දළ වීථි වටිනාකම රුපියල් මිලියන 109.9ක් (රුපියල් 109,900,000) පමණ වන බවට තක්සේරු කර තිබේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
සිද්ධිය සම්බන්ධයෙන් ශ්රී ලංකා රේගුව මූලික විමර්ශන ආරම්භ කර ඇති අතර, සැකකරු සහ අත්අඩංගුවට ගත් කොකේන් තොගය ඉදිරි නීතිමය කටයුතු හා වැඩිදුර විමර්ශන සඳහා පොලිස් මත්ද්රව්ය නාශක කාර්යාංශය (PNB) වෙත භාරදීමට නියමිතය.
