රංජිත් රාජපක්ෂ –
නුවරඑළියේ දී භෞත චිකිත්සකවරිය ඝාතනය කිරීමේ සිද්ධිය සම්බන්ධයෙන් බන්ධනාගාරගත කර සිටි ප්රධාන සැකකරු, ඔහුගේ බිරිඳ සහ ඝාතනයට සහය දුන් බව කියන අනෙක් සැකකරුවන් දෙදෙනා ඇතුළු සිව්දෙනා අද (09) යළිත් නුවරඑළිය මහේස්ත්රාත් අධිකරණය වෙත ඉදිරිපත් කරනු ලැබීය.
සැකකරුවන් අධිකරණයට ඉදිරිපත් කළ අවස්ථාවේදී නුවරඑළිය පොලිසියේ මූලස්ථාන ප්රධාන පොලිස් පරීක්ෂකවරයා අධිකරණයෙන් ඉල්ලීමක් කර සිටියේ ඝාතනයේ ප්රධාන සැකකරුගේ රුධිර සාම්පලයක් ලබා ගැනීමට අවශ්ය බැවින් ඔහුව විශේෂඥ අධිකරණ වෛද්යවරයා වෙත යොමු කරන ලෙසය.
ඒ අනුව මහේස්ත්රාත්වරියගේ නියෝගය මත, බන්ධනාගාර සහ පොලිස් නිලධාරීන්ගේ දැඩි ආරක්ෂාව මධ්යයේ ප්රධාන සැකකරු නුවරඑළිය දිස්ත්රික් මහ රෝහල වෙත රැගෙන ගොස් රුධිර සාම්පල ලබා ගැනීමට පියවර ගැනුණි.
ඉන් අනතුරුව සැකකරුවන් සිව්දෙනා යළි මහේස්ත්රාත්වරිය වෙත ඉදිරිපත් කිරීමෙන් පසු එළඹෙන (16) වනදා දක්වා අඛණ්ඩව රක්ෂිත බන්ධනාගාරගත කිරීමට නියෝග කෙරුණි.
මෙසේ රක්ෂිත බන්ධනාගාරගත කෙරුණේ ඝාතනයේ ප්රධාන සැකකරු, ඔහුගේ බිරිඳ, ඝාතනයට සහයෝගය ලබා දුන් බව කියන කුණ්ඩසාලේ ප්රාදේශීය සභාවේ රියදුරා සහ මැණික්හින්න පොලිසියේ හිටපු ස්ථානාධිපති ප්රධාන පොලිස් පරීක්ෂකවරයායි.
