ඉඳුනිල් කහටපිටිය –
පාස්කු ඉරුදින ත්රස්ත ප්රහාර සිද්ධිය සම්බන්ධයෙන් සිදුකරන විමර්ශනවලට අදාළව තමන්ව අත්අඩංගුවට ගැනීම වළක්වාලන රිට් නියෝගයක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ ඉදිරිපත් කළ පෙත්සමේ වැඩිදුර කරුණු දැක්වීම් ලබන ජූලි මස 06 වනදා දක්වා කල් තබා තිබේ.
මෙම පෙත්සම අද (24) අභියාචනාධිකරණ සභාපති විනිසුරු රොහාන්ත අබේසූරිය සහ සරත් දිසානායක යන ද්විපුද්ගල විනිසුරු මඩුල්ල ඉදිරියේ දෙවන දිනටත් කැඳවනු ලැබීය. එහිදී ගෝඨාභය රාජපක්ෂ වෙනුවෙන් ජනාධිපති නීතිඥ රොමේෂ් ද සිල්වා වැඩිදුර කරුණු දැක්වීම් සිදු කළේය.
2019 අප්රේල් 21 වනදා සිදුවූ පාස්කු ඉරුදින මරාගෙන මැරෙන බෝම්බ ප්රහාර මාලාව වළක්වා ගැනීමට අපොහොසත් වීම සහ ඊට පෙර පැවති බුද්ධි තොරතුරු නොසලකා හැරීම සම්බන්ධයෙන් එවකට ආරක්ෂක අමාත්යාංශයේ හිටපු ලේකම්වරයකු ලෙස කටයුතු කළ තමන්ව අත්අඩංගුවට ගැනීමට අපරාධ පරීක්ෂණ දෙපාර්තමේන්තුව (CID) ඇතුළු විමර්ශන කණ්ඩායම් සූදානම් වන බව පවසමින් හිටපු ජනාධිපතිවරයා මෙම පෙත්සම ගොනු කර තිබුණි.
පාස්කු ප්රහාරය සම්බන්ධයෙන් සොයා බැලූ ජනාධිපති පරීක්ෂණ කොමිෂන් සභා වාර්තාවේ ඇතැම් නිර්දේශ පදනම් කරගනිමින් තමන්ට එරෙහිව නීතිමය පියවර ගැනීම වළක්වන ලෙසත්, දේශපාලන පළිගැනීමේ චේතනාවෙන් සිදුකෙරෙන අත්අඩංගුවට ගැනීම්වලින් තමන්ට ආරක්ෂාව සපයන ලෙසත් පෙත්සම්කරු අභියාචනාධිකරණයෙන් ඉල්ලා සිටියි.
අද දින පෙත්සම්කාර පාර්ශවයේ කරුණු දැක්වීම් සලකා බැලූ විනිසුරු මඩුල්ල, එහි වැඩිදුර විභාගය ජූලි 06 වනදා දක්වා කල් තැබීමට නියෝග කළේය.
