කපිල කේ හීනටියන –
ලෙබනනයේ බෙයිරූට් අගනුවර සහ දකුණුදිග ප්රදේශ ඉලක්ක කර ගනිමින් ඊශ්රායලය එල්ල කළ දරුණු ගුවන් ප්රහාරවලට ප්රතිචාර දැක්වීමක් වශයෙන් ඉරානය විසින් ඊශ්රායලයේ ප්රධාන පෙළේ ගුවන් හමුදා කඳවුරක් වෙත බැලිස්ටික් මිසයිල ප්රහාරයක් එල්ල කර තිබේ.
ඉරාන ඉස්ලාමීය විප්ලවීය ආරක්ෂක බලකාය (IRGC) නිල වශයෙන් ප්රකාශ කළේ ඊශ්රායලයේ ‘රමත් ඩේවිඩ්’ (Ramat David) ගුවන් හමුදා කඳවුර ඉලක්ක කර ගනිමින් මෙම ප්රහාරය දියත් කළ බවය. ලෙබනනයේ ටයර් සහ නබතියේ යන ප්රදේශවල සිවිල් වැසියන් විශාල පිරිසක් ඝාතනයට ලක්වීම සහ අවතැන්වීමට ඊශ්රායල ආක්රමණයන් වගකිව යුතු බවත්, මෙම මිසයිල ප්රහාරය ඊට එරෙහිව සිදු කළ දැඩි අනතුරු ඇඟවීමක් බවත් ඉරානය පවසයි.
ආරක්ෂක පද්ධති ක්රියාත්මකයි – හානි අවමයි: ඊශ්රායලය කියයි
ඉරානයෙන් මිසයිල ප්රහාරයක් එල්ල වූ බව ඊශ්රායල ආරක්ෂක හමුදාව (IDF) ද තහවුරු කර ඇත. කෙසේ වුවද, රට පුරා වහාම ක්රියාත්මක වූ Arrow, David’s Sling සහ Iron Dome යන ගුවන් ආරක්ෂක පද්ධති මගින් පැමිණි මිසයිලවලින් බහුතරයක් ගුවනේදීම විනාශ කිරීමට සමත් වූ බව ඔවුහු පවසති. මේ හේතුවෙන් මෙතෙක් රට තුළින් කිසිදු බරපතළ ජීවිත හෝ දේපළ හානියක් වාර්තා වී නොමැත.
පවත්නා තත්ත්වය පිළිබඳව මාධ්ය වෙත අදහස් දක්වමින් ඊශ්රායල ආරක්ෂක හමුදා ප්රකාශක බ්රිගේඩියර් ජෙනරාල් එෆී ඩෙෆ්රින් ප්රකාශ කළේ ඉරානය සිදු කළේ “ගැඹුරු සහ බරපතළ වැරදීමක්” බවය. ඊශ්රායල හමුදා ප්රධානීන් මේ වන විට ඉදිරි මෙහෙයුම් සහ සූදානම පිළිබඳව තත්ත්ව ඇගයීමක නිරත වන අතර, ලෙබනනය තුළ පවතින හමුදා ක්රියාමාර්ග තවදුරටත් අඛණ්ඩව ඉදිරියට ගෙන යන බවද ඔහු අවධාරණය කළේය.
ගාසා දේශසීමා වැසෙයි – ටෙහෙරාන් ගුවන් ගමන් අත්හිටුවයි
ඉරාන මිසයිල ප්රහාරයෙන් අනතුරුව කලාපීය ආරක්ෂාව තද කිරීමට දෙපාර්ශවයම පියවර ගෙන ඇති බව ජාත්යන්තර මාධ්ය වාර්තා කරයි. ඊශ්රායල මිලිටරි සම්බන්ධීකරණ ආයතනයක් වන COGAT ආයතනය නිවේදනයක් නිකුත් කරමින් කියා සිටියේ ආරක්ෂක පියවරයන් ශක්තිමත් කිරීමක් ලෙස ගාසා තීරයට ඇතුළුවන සියලුම දේශසීමා ද්වාර වසා දැමීමට කටයුතු කළ බවය. ඒ අනුව කෙරෙම් ෂාලෝම් (Kerem Shalom) සහ රෆා (Rafah) යන ප්රධාන දේශසීමා හරස් මාර්ග නැවත දැනුම් දෙනතුරු වසා තැබීමට ඊශ්රායලය පියවර ගෙන තිබේ.
මේ අතර, ඊශ්රායලයෙන් එල්ල විය හැකි ප්රතිප්රහාර සලකා බලමින් ඉරානය ද සිය ගුවන් කලාපයේ ආරක්ෂාව වෙනුවෙන් පියවර ගෙන ඇත. ඉරාන මාධ්ය වාර්තාවලට අනුව ටෙහෙරාන් නුවර පිහිටි ඉමාම් කොමේනි ජාත්යන්තර ගුවන් තොටුපළේ (Imam Khomeini International Airport) සියලුම ගුවන් ගමන් කටයුතු නැවත දැනුම් දෙනතුරු තාවකාලිකව අත්හිටුවීමට ඉරාන බලධාරීන් කටයුතු කර තිබේ.
ඊශ්රායල ප්රතිප්රහාර වැළැක්වීමට ට්රම්ප් මැදිහත් වෙයි
මෙම යුදකාමී තත්ත්වය තවදුරටත් උත්සන්න වීම වැළැක්වීම සඳහා ඇමෙරිකානු ජනාධිපති ඩොනල්ඩ් ට්රම්ප් සෘජුවම මැදිහත් වී ඇති බව විදෙස් වාර්තා සනාථ කරයි. ජනාධිපති ට්රම්ප් ඊශ්රායල අග්රාමාත්ය බෙන්ජමින් නෙදන්යාහු අමතමින්, ඉරානයේ මෙම මිසයිල ප්රහාරයට ප්රතිප්රහාර එල්ල කිරීමෙන් වැළකී උපරිම සංයමයකින් කටයුතු කරන ලෙස ඉල්ලා ඇතැයි Axios වෙබ් අඩවිය සහ ඊශ්රායලයේ චැනල් 12 නාලිකාව වාර්තා කර තිබේ.
Axios වාර්තාකරු බරක් රවිඩ් (Barak Ravid) වෙත අදහස් දක්වමින් ජනාධිපති ට්රම්ප් ප්රකාශ කර ඇත්තේ මෙම ගැටුම ස්ථිර වශයෙන්ම අවසන් කිරීම සඳහා ඉරානය සමග එකඟතාවකට පැමිණීමට තමන් ඉතා ආසන්නව සිටින බවය. එම නිසා, නැවත වතාවක් ප්රහාර එල්ල කර ගනිමින් මෙම රාජ්ය තාන්ත්රික ප්රයත්නයන් පීලි පැනීමට ලක් නොකරන ලෙස ඔහු ඉල්ලා සිටී. ඉරාන ප්රහාරවලින් කිසිවෙකුටත් හානියක් සිදුව නොමැති බැවින් ඊශ්රායලය මීට ප්රතිප්රහාර එල්ල නොකරනු ඇතැයි තමන් බලාපොරොත්තු වන බවත්, නෙදන්යාහු විසින් ප්රතිප්රහාරයක් දියත් කළහොත් එය ගැටුම් චක්රය නිමාවකට පත් කිරීම වෙනුවට තවදුරටත් දිගු කිරීමට හේතුවනු ඇති බවත් ජනාධිපති ට්රම්ප් අනතුරු අඟවා ඇත.
කලාපීය සාමයට එල්ල වූ දැඩි තර්ජනයක්
මෙම ප්රහාරය ඊශ්රායලය සහ හෙස්බොල්ලා සංවිධානය අතර පැවැති ආරක්ෂක එකඟතාවන් සහ ගිවිසුම් බිඳවැටීමේ සෘජු ප්රතිඵලයක් ලෙස වාර්තා වේ. පසුගිය පෙබරවාරි මාසයේ සිට වර්ධනය වෙමින් පවතින ඉරාන-ඊශ්රායල නොසන්සුන්තාව සහ ජූනි මාසයේ ඇරඹි ලෙබනන් ගැටුම් මැද, ඉරානය විසින් ඊශ්රායල භූමිය වෙත සෘජු මිසයිල ප්රහාරයක් එල්ල කළ පළමු අවස්ථාව මෙයය.
විදෙස් මාධ්ය විශ්ලේෂණයන්ට අනුව, මෙම නව තත්ත්වය මැදපෙරදිග සාම ක්රියාවලිය සම්පූර්ණයෙන්ම අර්බුදයකට ලක් කර තිබේ. විශේෂයෙන්ම ඇමෙරිකානු ජනාධිපති ඩොනල්ඩ් ට්රම්ප්ගේ මැදිහත්වීමෙන් කලාපීය ස්ථාවරත්වය වෙනුවෙන් ගනු ලැබූ රාජ්ය තාන්ත්රික උත්සාහයන්ට ද මෙයින් දැඩි බාධා එල්ල වී ඇත. මේත් සමගම ගෝලීය වෙළෙඳපොළේ බොරතෙල් මිල ද සීඝ්රයෙන් ඉහළ යමින් පවතින අතර, එය ලෝක ආර්ථිකයට ද බලපෑම් එල්ල කරමින් තිබේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
ඉරානය අනතුරු අඟවා ඇත්තේ ඊශ්රායලය නැවතත් ආක්රමණශීලී ලෙස කටයුතු කළහොත් කලාපයේ පවතින ඇමෙරිකානු සහ ඊශ්රායල ඉලක්ක සියල්ල ආවරණය වන පරිදි මීට වඩා දරුණු ප්රතිප්රහාර එල්ල කරන බවය. ඊශ්රායලය ද ඕනෑම මොහොතක ප්රතිප්රහාරයකට සූදානමින් සිටින බැවින්, මැදපෙරදිග කලාපය පුරා පවතින්නේ දැඩි යුදකාමී නොසන්සුන්කාරී වාතාවරණයකි.
