දිට්වා සුළි කුණාටුව හේතුවෙන් නිවාස අහිමිව සුරක්ෂිත මධ්යස්ථාන, කුඩාරම් සහ ඥාති නිවාසවල රැඳී සිටින පවුල් 1,000ක් වෙනුවෙන් අන්තර්කාලීන නිවාස ඉදිකර දීමේ ව්යාපෘතියක් ආරම්භ කිරීමට රජය තීරණය කර තිබේ.
ආරක්ෂක අමාත්යවරයා වශයෙන් ජනාධිපතිවරයා ඉදිරිපත් කළ මෙම යෝජනාවට අමාත්ය මණ්ඩල අනුමැතිය හිමි වූ බව කැබිනට් මාධ්ය ප්රකාශක අමාත්ය නලින්ද ජයතිස්ස අද (28) පැවති මාධ්ය හමුවේදී ප්රකාශ කළේය.
දිට්වා සුළි කුණාටු තත්ත්වය හේතුවෙන් දිවයින පුරා පූර්ණ නිවාස හානි 6,088 ක් සහ අර්ධ නිවාස හානි 115,179 ක් වාර්තා වී ඇත. මෙලෙස අවතැන් වූ පවුල් අතරින් පවුල් 494ක් මේ වන විටත් දිස්ත්රික්ක 04ක පවතින සුරක්ෂිත මධ්යස්ථාන 20ක රැඳී සිටින අතර තවත් පිරිසක් තාවකාලික කුඩාරම්වල පදිංචිව සිටිති.
නායයෑම් සහ ගංවතුර නිසා නිවාස අහිමි වූවන්ට ස්ථිර නිවසක් ඉදිකර ගන්නා තෙක් මාසිකව රුපියල් 25,000ක කුලී දීමනාවක් ලබා දීමට රජය මීට පෙර පියවර ගෙන තිබුණි. එහෙත් එම ප්රදේශවලින් කුලී නිවාස සොයාගැනීමේ දුෂ්කරතාවක් පවතින බව නිරීක්ෂණය වීම හේතුවෙන් මෙම අන්තර්කාලීන නිවාස ව්යාපෘතිය ක්රියාත්මක කිරීමට තීරණය කර තිබේ.
ඒ අනුව ජාතික ගොඩනැගිලි පර්යේෂණ ආයතනයේ (NBRO) නිවාස සැලසුම්වලට අනුව ශ්රී ලංකා යුද හමුදාවේ ශ්රම දායකත්වය ඇතිව මෙම නිවාස ඉදිකිරීම් සිදු කෙරේ. කෑගල්ල, මහනුවර, නුවරඑළිය සහ බදුල්ල යන දිස්ත්රික්කවල දැනට අසීරු තත්ත්ව යටතේ දිවි ගෙවන පවුල් 1,000ක් සඳහා ස්ථිර නිවාස ලැබෙන තෙක් මෙම අන්තර්කාලීන නිවාස ලබා දීමට නියමිතය.
