අනිවාර්ය භෞතික පරීක්ෂණයකට ලක් කළ යුතු කන්ටේනර් 323ක් නිසි පිරීක්ෂාවකින් තොරව නිදහස් කිරීම සම්බන්ධයෙන් මතුව ඇති චෝදනාව විමර්ශනයට පත් කළ පාර්ලිමේන්තු තේරීම් කාරක සභාවෙන් තමා ඉල්ලා අස් වන්නේ මෙම විමර්ශනයේ සුජාත භාවය සම්බන්ධව පුංචි හෝ සැකයක් ඇතිවීම වැලැක්වීමේ අභිලාෂයෙන් බව වරාය හා සිවිල් ගුවන්සේවා අමාත්ය අනුර කරුණාතිලක අද (18) පාර්ලිමේන්තුවේ දී ප්රකාශ කළේය.
මේ සිද්ධිය වන වකවානුව තුළ තමන් අදාල අමාත්ය ධූරය නොදැරුව ද මේ ඉල්ලා අස්වීම නිසා සිදුවන විමර්ශන සම්බන්ධව පුංචි හෝ සැකයක් ඇතිවීම වැළැක්වෙනු ඇතැයි ද ඇමතිවරයා පැවසුවේය.
අනතුරුව ඔහු තම ඉල්ලා අස්වීම සභාගත කරමින් මෙසේ කීවේය.
“කන්ටේනර් 323 ගැන සෙවීමට පත් කළ විශේෂ තේරීම් කාරක සභාවෙන් ඉල්ලා අස්වීම සම්බන්ධව කෙටි පැහැදිලි කිරීමක් කරන්න මම අවසර ඉල්ලනවා. කන්ටේනර් බහාලුම් නිදහස් කිරීම හා ඒ සම්බන්ධ කටයුතු සිදුකරනු ලබන්නේ ශ්රී ලංකා රේගුව විසින්. “
“ශ්රී ලංකා රේගුව ක්රියාත්මක වෙන්නේ සම්පූර්ණයෙන්ම මුදල් අමාත්යාංශය හරහා.”
“සිද්ධිය සිදුවන අවස්ථාවේ දී මම වරාය විෂය භාර ඇමතිවරයා ලෙස කටයුතු නොකළා වුනත් සමහර වෙලාවට මේ විශේෂ තේරීම් කාරක සභාවට සහභාගී වීම කෙනෙකුට අර්ථ දක්වන්න පුලුවන් ලබැඳියාවන් අතර ගැටුමක් ඇති වනවා කියලා.”
“ඒ වගේම මේ සභාවේ ක්රියාවලියෙන් ඇතිවන තත්ත්වය කිසියම් කෙනෙකුට දුර්වර්ණ කිරීම සඳහා මා ඒ තේරීම් කාරක සභාවේ කටයුතු කිරීම භාවිතා කරන්න පුලුවන්.”
“ඒ වගේම ඒ මතුවන සත්යයේ සුජාත භාවය කිසියම් කෙනෙක් විසින් ප්රශ්න කරන්න පුලුවන්. ඒ නිසා මම ඒ තේරීම් කාරක සභාවෙන් ඉල්ලා අස් වෙන්න තීරණය කළා. “
“ඒ ඉල්ලා අස්වීම සම්බන්ධව ලිපිය සභාගත කරනවා”.
පාර්ලිමේන්තු විශේෂ කාරක සභාවේ සාමාජිකත්වයෙන් අමාත්ය අනුර කරුණාතිලක ඉවත් වීමෙන් අනතුරුව එම පුරප්පාඩුව සඳහා ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්ය උපාලි පන්නිලගේ පත් කර තිබේ.
