බංග්ලාදේශයේ පළමු කාන්තා අගමැතිනි කලීඩා සියා අද උදෑසන 06ට පමණ දිවි සැරියෙන් සමු ගත්තාය. ඇය දිගු කලක් සිටියේ රෝගාතුරවය. මිය යන විට ඇය 80 හැවිරිදි වියේ පසුවූවාය.
“අපේ ප්රියතම නායිකාව තවදුරටත් අප සමඟ නැත. ඇය අද උදෑසන 6 ට අප හැර ගියාය.” සියාගේ බංග්ලාදේශ ජාතිකවාදී පක්ෂය (BNP) ෆේස්බුක් හි නිවේදනය කළේය.
සඳුදා රාත්රියේ වෛද්යවරු පවසා තිබුණේ සියාගේ තත්වය “අතිශයින්ම අසාධ්ය” බවයි. ඇයට ජීවිතාරක්ෂක ආධාරක සවි කර තිබුණද, ඇගේ වයස සහ සමස්ත දුර්වල සෞඛ්ය තත්ත්වය හේතුවෙන් එකවර ප්රතිකාර කිහිපයක් ලබා දීමට නොහැකි බව ද ඔවුහු පැවසූහ.
වසර 20 කට පසු රටේ පැවති පළමු ප්රජාතන්ත්රවාදී මැතිවරණයෙන් BNP ජයග්රහණය කරා මෙහෙයවීමෙන් පසු 1991 දී සියා බංග්ලාදේශයේ පළමු කාන්තා අගමැතිනිය බවට පත්වූවාය.
සියා 2001 දී අගමැති ධුරයට නැවත පැමිණි අතර, 2006 ඔක්තෝම්බර් මාසයේදී මහ මැතිවරණයකට පෙර ඉල්ලා අස්වූවාය.
දූෂණ චෝදනා සහ පසුගිය වසරේ අගමැති ධුරයෙන් නෙරපා හරින ලද අවාමි ලීග් නායිකා ෂෙයික් හසීනා සමඟ දිගුකාලීන දේශපාලන එදිරිවාදිකම් හේතුවෙන් ඇගේ දේශපාලන ජීවිතය විනාශ වී තිබුණි.
බංග්ලාදේශයේ දිවංගත ජනාධිපති සියාඋර් රහ්මාන්ගේ බිරිඳ වූ සියා, 2018 දී දූෂණය සම්බන්ධයෙන් වසර පහකට සිරගත කරනු ලැබුවාය.
