ආසියානු කුසලාන ක්රිකට් තරගාවලියේ මූලික වටයේ ලීග් තරගවල දී ඉන්දියාව හා පාකිස්තානයට අතර පැවති තරගයෙන් පසු ‘පහල්ගම්’ ප්රහාරය හා ඊට සම්බන්ධ සින්ධූර් මෙහෙයුම ගැන අදහස් දැක් වූ ඉන්දීය නායක සූර්යකුමාර් යාදව්ට එරෙහිව ICCය දඩ නියමකර ඇති බව වාර්තා වේ.
ඒ අනුව ඔහුගේ තරග ගාස්තුවෙන් 30%ක දඩයක් නියමවනු ඇත.
මේ මස ඉකුත් 14 වනදා මෙම තරගය පැවති අතර, එම තරගයෙන් පාකිස්තානය කඩුලු 7කින් පරාජය කිරීමට ඉන්දීය කණ්ඩායම සමත් විය.
තරගයෙන් අනතුරුව පැවති මාධ්ය සාකච්ඡාවේ දී ඉන්දීය නායකයා පවසා සිටියේ, එම ජයග්රහණය ඉන්දීය සන්නද්ධ හමුදාවන්ට වෙනුවෙන් කැපකරන බවය.
එමෙන්ම ‘පහල්ගම්’ ත්රස්ත ප්රහාරයෙන් විපතට පත්වූවන් සහ ඔවුන්ගේ පවුල් සමග එම ජයග්රහණය බෙදාගන්නා බවය.
එම ප්රකාශයට එරෙහිව පකිස්ථානය ICCයට පැමිණිළි කරනු ලැබීය.
ඒ අනුව ICC තරග තීරක රිචී රිචඩ්සන්ගේ ප්රධානත්වයෙන් පැවති විධිමත් සොයාබැලීමකින් අනතුරුව මෙම දඩ පැනීමේ අවසන් තීරණය ගෙන ඇති බව වාර්තා වේ. කෙසේ වෙතත් මෙම දඬුවමට එරෙහිව ඉන්දියාව ද අභියාචනයක් ඉදිරිපත් කර ඇති බව සඳහන්ය.
කෙසේ නමුත් තරග ගාස්තුවට අමතරව වෙනත් දඬුවමක් පනවනවාද යන්න පිළිබඳ අවසන් තීරණය හෙට (28) පැවැත්වෙන ආසියානු කුසලාන අවසන් මහා තරගයෙන් පසුව ප්රකාශයට පත්කිරීමට නියමිතව ඇති බවද වාර්තා වේ.ෙ එමෙන්ම තරගවලියේ අතරතුරදී යළි දේශපාලනික අර්ථ දැක්වීම් හැඟවෙන කිසිදු ප්රකාශයක් සිදු නොකරන ලෙසද සූර්යකුමාර් යාදේව් වෙත දන්වා තිබේ.
පහල්ගම් ප්රහාරය මුල්කරගනිමින් ඉන්දීය කණ්ඩායම කාසියේ වාසිය උරගා බැගීමේ සිට තරගය අවසන් වීම දක්වා කිසිදු අවස්ථාවදී පාකිස්තාන ක්රීඩකයින් සමග සාම්ප්රදායික අතට අත දීමෙන්ද වැළකී සිටියේය.
වර්ධනය වූ තත්ත්වය – පකිස්ථාන ක්රීඩකයනුත් දණ්ඩනයට…
අනතුරුව තත්ත්වය තවත් වර්ධනය වූ අතර පකිස්ථාන වේග පන්දු යවන ක්රීඩක හරිස් රවුෆ්ට ද එවැනිම දඬුවමක් ICC වෙතින් නියම විය. ඉරිදා තරඟය අතරතුර ගුවන් යානා වැටීම සමච්චලයට ලක් කිරීම සඳහා “අපවාදාත්මක භාෂාවක්” සහ “අත් අභිනයන්” භාවිතා කිරීම ඇතුළු ඔහුගේ ප්රකෝපකාරී ක්රියාවන් සඳහා රවුෆ්ට මෙම දඬුවම නියම විනි.
රවුෆ් කියා සිටියේ ඔහුගේ ක්රියාවන්හි කිසිදු දේශපාලනික අර්ථයක් නොමැති නමුත් ඒවා තරඟ තීරක විසින් “අපවාදාත්මක සහ ආක්රමණශීලී” ලෙස සලකනු ලැබ ඇති බවය.
එමෙන්ම සහිබ්සාඩා ෆර්හාන් සිය ලකුණු 50 ලබා ගැනීම සැමරුම් කරමින් දැක්වූ වෙඩි තැබීමේ අභිනය සම්බන්ධව ද සිකුරාදා විමර්ශනයක් දියත් කිරීමට ICC ය කටයුතු කළේය. එහෙත් ෆර්හාන් සිය කිසිදු හැසිරීමකින් නීති උල්ලංඝනයක නොකළ බව ප්රකාශ කළේය. ඉරිදා ඔහුගේ අර්ධ ශතකයෙන් පසු ඔහු කළ වෙඩි තැබීමේ සැමරුම “ඔහුගේ වාර්ගික පක්තුන් ගෝත්රයේ සැමරීමේ සාම්ප්රදායික ක්රමයක්” බව ෆර්හාන් පැවසුවේය.
පකිස්ථාන ක්රීඩකයින්ගේ විමර්ශනය තරග තීරක රිචී රිචඩ්සන් විසින් කණ්ඩායම රැඳී සිටි හෝටලයේදී පවත්වන ලදී. ඔවුන් විසින් ලබා දුන් පිළිතුරු ලිඛිතව තිබුණද රවුෆ් සහ ෆර්හාන් තමන් ඉදිරියේ පෞද්ගලිකව කැඳවීමට තරග තීරකවරයා කටයුතු කළේය. ඔවුන් සමඟ කණ්ඩායම් කළමනාකරු නවීඩ් අක්රම් චීමා ද සිටියේය.
අනතුරුව ප්රකාශයක් කළ තරග තීරක රිචී රිචඩ්සන් පැවසුවේ මෙම කාරණයේ සංවේදීතාව සැලකිල්ලට ගෙන තරඟාවලිය අවසන් වන තුරු ICCය පැනවීමට නියමිත සම්බාධක පිළිබඳ කිසිදු නිල නිවේදනයක් නිකුත් නොකරනු ඇති බවය.
බොහෝ විට මෙම දඬුවම් හෙට අවසන් මහා තරගය අවසන් වූ පසු සඳුදා ප්රකාශයට පත් විය හැකි බව වාර්තා වේ.
ඉන්දියාවේ ජනප්රිය සංචාරක ප්රදේශයක් වන දකුණු කාශ්මීරයේ පහල්ගම්හි ඉකුත් අප්රේල් මස ඉස්ලාමීය බෙදුම්වාදී කණ්ඩායමක් විසින් සිදුකළ වෙඩිතැබීමකින් පුද්ගලයින් 26 දෙනෙකු ජීවිතක්ෂයට පත්විය.
කෙසේ නමුත් මෙම ප්රහාරය පිටුපස පාකිස්තානය සිටින බවට ඉන්දියාව චෝදනා කළේය.
ඒ හේතුවෙන් එම රටවල් දෙක අතර වෙඩි හුවමාරු කිහිපයක් සිදු වූ අතර, යුද්ධයක්ද ඇතිවීමට ගොස් අවසන් මෙහොතේ දෙරටම නිහඬ විය.
