අසේල කුරුළුවංශ
ශ්රී දළදා මාලිගාවේ දියවඩන නිලමේ ධුරය සඳහා පවතින තරඟකාරීත්වය උත්සන්න වීමත් සමඟ මේ වනවිට අපේක්ෂකත්වය ප්රසිද්ධ කර තිබෙන නිලමේවරුන්ට සමාජ මාධ්ය ඔස්සේ මඩ ප්රහාර එල්ල කීරීමේ ක්රමන්ත්රණකාරී වැඩපිළිවෙළක් දියත් වෙමින් තිබෙන බවට බස්නායක නිලමේවරු චෝදනා කරති.
ඒ සම්බන්ධව මේ වනවිට මල්වතු අස්ගිරි උභය මහා විහාරීය මහානායක ස්වාමින්ද්රයන් වහන්සේ දෙනමගේ ද අවධානය යොමුව තිබේ.
අදාළ වැඩපිළිවෙළ තුළ නිලමේවරුන්ගේ පමණක් නොව ඔවුන් ගේ පවුලේ උදවියගේ ද චරිත ඝාතනය කිරිමේ සැළසුමක් ක්රියාත්මක වෙමින් ඇත.
එවැනි සිද්ධියක් සම්බන්ධයෙන් මහනුවර නාථ දේවාලයේ බස්නායක නිලමේ, දියවඩන නිලමේ ධුර අපේක්ෂක ඒ.බබ්ලිව්. එස් බණ්ඩාරනායක මහතා කොළඹ අපරාධ පරීක්ෂණ දෙපාර්තමේන්තුවට ඊයේ (15) පැමිණිල්ලක් ද ඉදිරිපත් කර තිබේ.
තමන්ගේ හා පවුලේ උදවියගේ කීර් ති නාමයට කැළලක් ඇති කිරීමේ අරමුණින් දියත් කර තිබෙන මෙම මඩ ව්යාපාරය පසුපස දියවඩන නිලමේ ධුරය අපේක්ෂාවෙන් පසුවන පුද්ගලයින් සිටින බවට සැක කරන බවත් ඔවුන් කවුරුන්ද යන්න අනාවරණය කර ගැනීමේ අපේක්ෂාවෙන් අදාළ පැමිණිල්ල කළ බවත් ඒ මහතා කීය.
තමන් අභියෝගයක් යැයි සිතන කවුරුන් හෝ මේ පසුපස සිටින බවත් මඩ ප්රහාර තුළින් තමන්ගේ ගමන නතර කළ නොහැකි බවත් හෙතෙම අවධාරණය කළේය.
පිටිසර දේවාල වල බස්නායක නිලමේවරයකෙු ලෙස දශක දෙකක පමණ කාලයක් කටයුතු කර මහනුවර කතරගම දේවාලයේ බස්නායක නිලමේ ධුරයට තමන් පත්වූයේ විශාල අත්දැකීම් ගොන්නක් සමඟ බවත් පරපුරක උරුමය ද සමගින් දළදා මාලිගාවේ දියවඩන නිලමේ ධුරයට තමන් පැමිණීම වැලැක්වීමට කුමන්ත්රණකාරී වැඩපිළිවෙළක් ක්රියාත්මක වෙමින් තිබෙන බවත් බණ්ඩාරනායක මහතා පැවසුවේය.
දියවඩන නිලමේ ධුරයේ ප්රදීප් නිලංග දෑල මහතා වසර 20 ක කාලයක් කටයුතු කළ බවත් තව දුරටත් එකම පුද්ගලයා එම ධුරය නොදැරිය යුතුය යන මතයේ තමන් සිටින බවත් ඒ මහතා කීවේය.
තමන් දියවඩන නිලමේ ධුරයට පත් වූ පසු වසර පහ බැගින් අවස්ථා දෙකක් පමණක් ධුරය දැරිය හැකි ලෙස විහාර දේවාලගම් ආඥා පනතට සංශෝධන ගෙන ඒම සඳහා යෝජනා ඉදිරිපත් කරන බව ද නිලමේවරයා ප්රකාශ කළේය.
වත්මන් දියවඩන නිලමේවරයා ශ්රී දළදා මාලිගාව වෙනුවෙන් හොඳ සේවයක් කළත් ශාසනය වෙනුවෙන් සැලකිය යුතු සේවයක් නොකළ බවත් තමන් පත්වූ පසු දළදා මාලිගාව කේන්ද්ර කර ගනිමින් සුවිශාල ශාසනික සේවයක් සිදු කිරීමට සැළසුම් කර තිබෙන බවත් හෙතෙම පැවසුවේය.
