මනම්පිටිය නිමල් ජයරත්න –
රජයට අයවිය යුතු විශාල බදු මුදලක් පැහැර හැර පරිසර අමාත්යංශය යටතේ පාලනය වන මනම්පිටිය පෞද්ගලික වැලි සමාගමෙන් ටිපර් රථවලට සීමාව ඉක්මවා වැලි පටවා ප්රවාහනය කිරීම අත්හිටුවීමට පොළොන්නරුව දිස්ත්රික් සංවර්ධන කමිටු රැස්වීමේ දී තීරණය කළ ද එම තීන්දුව නොතකා උක්ත ජාවාරම දිගින් දිගටම සිදුකරන බව වාර්තා වේ.
රජයට ලැබිය යුතු විශාල බදු මුදලක් වංචා කරමින් මෙම ජාවාරම දිගටම පවත්වාගෙන යන්නේ එම තීන්දුව සෑම මංකඩකම ප්රදර්ශනය කර තිබියදී බව මේ සම්බන්ධව ලංකාසරට අදහස් දැක්වූ ටිපර් රථ හිමිකරුවන් සහ මංකඩ ලාභිහු සඳහන් කළහ.
පසුගිය මැයි 30 වෙනිදා පොළොන්නරුව දිස්ත්රික් සංවර්ධන කමිටු රැස්වීමේදී නිවාස නියෝජ්ය අමාත්ය ටී.බී සරත්ගේ ධානත්වයෙන් පැවැති අතර එහිදී දිස්ත්රික් ලේකම් සුජන්ත ඒකන්නයක , විසින් වැලි ටිපර් රථවලට සීමාව ඉක්මවා වැලි පැටවීමෙන් විශාල බද්දක් රජයට අහිමිවන බව අනාවරණය කළේය.
මෙලෙස සීමාව ඉක්මවා වැලි ප්රවාහනය කිරීම හේතුවෙන් මාර්ග ද දැඩි ලෙස විනාශ වන බව පෙන්වා දී මෙම ක්රියාවලිය තහනම් කිරීමට තීන්දු කළ ද මනම්පිටිය වැලි සමාගමේ ඇතැම් පුද්ගලයන් අල්ලස් ලබාගෙන සීමාව ඉක්මවමින් ටිපර් රථ සඳහා වැලි පටවන බවද ටිපර් රථ රියදුරෝ පෙන්වා දුන්හ.
මේ ආකාරයට දිනකට ටිපර් රථ තුන් හාරසියකට මනම්පිටිය වැලි මංකඩ හරහා වැලි පැටවීමේදී රජයට විශාල මුදලක් අහිමි කරමින් දැවැන්ත ජාවාරමක් සිදුවන බව මනම්පිටිය වැලි ටිපර් රථ සංගමයේ සභාපති අජිත් ගමගේ මහතා අප කළ විමසීමේදී පැවසීය.
පොළොන්නරුව ප්රාදේශීය කැණීම් ඉංජිනේරු එච්.එම්.සී.කේ. ඩබ්ලිව්. බණ්ඩාර ගේ අත්සනින් යුතුව මනම්පිටිය වැලි සමාගම අසල එම දැන්වීම ප්රදර්ශනය කරමින්, සීමාව ඉක්මවා වැලි ප්රවාහනය කලහොත් වැලි ප්රවාහනය කරන ටිපර් රථය අසාධු ලේඛනගත කරන බවත්, වැලි කැණීම් බලපත්රය තාවකාලික අත්හිටුවීමට පියවර ගන්නා බවත් සඳහන් කර ඇත.
පොළොන්නරුව දිස්ත්රික් සංවර්ධන කමිටු රැස්වීමේ ගත් තීරණය හෑල්ලුවට සහ අභියෝගයට ලක් කරමින් ඉක්මවා වැලි ප්රවාහනය කිරීම බරපතල වරදක් බවත්, වත්මන් රජය ගන්නා තීරණය ඇතැම් නිලධාරීන් තුට්ටුවකටත් මායිම් නොකරන බවද වැලි මංකඩලාභීන් සහ ටිපර් රථ රියදුරෝ සඳහන් කරති.
අප මේ පිළිබඳව විමසීමට මනම්පිටිය වැලි සමාගමේ ස්ථාන භාර කළමනාකාරවරයා දුරකථනයෙන් සම්බන්ධ කර ගැනීමට අවස්ථා කිහිපයක් උත්සාහ ගත්තද එය අසාර්ථක විය.
