තමන් කම්කරු හා මහජන සම්බන්ධතා අමාත්යවරයාව සිටියදී උපයා ගත් ආකාරය හෙළි කළ නොහැකි අන්දමේ රුපියල් කෝටි පහළොවකට අධික දේපළ සහ මුදල් සන්තක කරගත් හිටපු අමාත්යය මර්වින් සිල්වාට එරෙහිව අල්ලස් කොමිසම කොළඹ මහාධිකරණය හමුවේ අද (27) නඩු පවරමින් අධි චෝදනා ගොනු කළේය.
අල්ලස් පනතේ 23 (1) ආ වගන්තිය යටතේ අයථා දේපළ උපයා ගනිමින් වරද සිදුකිරීම යන අධි චෝදනා 03ක් යටතේ මෙම නඩුව පවරා තිබිණි.
මර්වින් සිල්වා කම්කරු හා මහජන සම්බන්ධතා අමාත්යවරයා ලෙස කටයුතු කරමින් 2010 මාර්තු මස 31 වැනිදා සිට 2012 මාර්තු මස 31 වැනිදා අතර කාලය තුළ විත්තිකාර හිටපු අමාත්යවරයා තම වැටුපින් උපයා ගත නොහැකි මුදලක් යොදවා අති සුඛෝපභෝගී වාහන ඉඩම් දේපල මිලදී ගෙන ඇති බව අල්ලස් කොමිසම අධිකරණයට දැනුම් දුන්නේය. ( මේ කෝටි 15ක වත්කම් උපයා ගන්නේ මීට අවුරුදු 15- 12 අතර කාලයකට පෙරය.)
ඒ අනුව අල්ලස් කොමිසම මෙසේ මේ දූෂණ අධිකරණයට ඉදිරිපත් කළේය.
- ඇමතිවරයා රාජ්ය හා පුද්ගලික බැංකුවල පවත්වාගෙන ගිය බැංකු ගිනුම් 48ක් මගින් කඩවත දළුපිටිය ප්රදේශයේ ඉඩමක් මිලදී ගැනීම සඳහා එක් කෝටි තිස් නව ලක්ෂ අනු නව දහසක මුදලක් වැය කර තිබේ.
- කොළඹ හත හර්නට්ස් ද සිල්වා මාවතේ ඉඩමක් මිලදී ගැනීම සඳහා හත් කෝටි දහතුන් ලක්ෂ අනූ නව දහසක මුදලක් වියදම් කර තිබේ.
- හිටපු අමාත්යවරයාගේ පුත් මාලක සිල්වාට සුඛෝපභෝගී රථයක් මිලදී ගැනීම සඳහා තුන් කෝටි විසි තුන් ලක්ෂ හැත්තෑ පන් දහසක මුදලක් වැය කර තිබේ.
- තවත් මෝටර් රථයක් මිලදී ගැනීමට රුපියල් ලක්ෂ පනස් පහකට අධික මුදලක් වැය කිරීම
- ඩිෆෙන්ඩර් රථයක් මිලදී ගැනීම සඳහා රුපියල් අසූ අට ලක්ෂ පනස් පන් දහසක මුදලක් වැය කිරීම
- සමස්ථයක් ලෙස රුපියල් පහලොස් කෝටි, තිස් හතර ලක්ෂ හැත්තෑ නව දහස් පන්සිය දා හතයි ශත හැට හතරක (153479571.64 ) මුදලක් අයථා ඉපයීම සම්බන්ධයෙන් මෙම නඩුව පැවරී තිබිණි.
