වැලිගම W15 හෝටලයට වෙඩි තියන්නට ගොස් වැලිගම පොලිස් වෙඩි පහරින් ජීවිතක්ෂයට පත්වූ කොළඹ අපරාධ කොට්ඨාසයේ සැරයන්වරයාට පොලිස් ඉතිහාසයේ වාර්තාගත වන්දි මුදලක් ලබා දීමට කටයුතු කිරීම සහ මරණයෙන් පසු ඔහුව උප පොලිස් පරීක්ෂක ධූරයට උසස් කිරීම සම්බන්ධව නොගැලපෙන තැන් රාශියක් ඇතැයි පොලිසියේ අභ්යන්තර ආරංචි මාර්ග හෙළිදරවු කරයි.
මරණයක දී වන්දි මුදලක් ගෙවීම අතිශය මානුෂික ක්රියාවක් වුවද මෙම නිලධාරියා නීති විරෝධී ක්රියාවක් යැයි සැක සහිත, විමර්ශනයකට යටත්ව ඇති සිද්ධියකට අදාලව මරණයට පත් වී තිබිය දී මෙවැනි සිද්ධියක දී සිදු නොවන ආකාරයට ඔහුට ලක්ෂ 59ක වන්දි මුදලක් ලබා දීම ප්රශ්න සහගත බව පොලිස් ආරංචි මාර්ග පවසයි.
මිය ගිය සැරයන්වරයාගේ පවුලට ඒවකට ජනාධිපතිවරයාව සිටි රනිල් වික්රමසිංහ විසින් රුපියල් මිලියන 2.5ක් ද, මහජන ආරක්ෂක ඇමතිවරයා මිලියන 1.7ක් ද, එවකට සිටි පොලිස්පති දේශබන්දු මිලියන 1.7ක් ද ලෙස මිලියන 5.9ක් ද ලෙස මෙම මුදල් ලබා දී ඇතැයි වාර්තා වේ.
මෙම ප්රදානයන් ලබා දුන්නේ ජනාධිපති අරමුදලින් ද, පොලිස් තෑගි අරමුදලින් ද, අමාත්යාංශයේ ප්රතිපාදනවලින් ද යන්න අතිශය අපැහැදිලි බව ද මෙම මුදල් ලබා දුන් ආකාරය සම්බන්ධව විගණනයක් සිදුකිරීම ඉතාම වැදගත් බව ද පොලිසියේ අභ්යන්තර ආරංචි මාර්ග පෙන්වා දෙන්නේ මුදල් ලබා දී යම් කිසි සිද්ධියක් යටපත් කිරීමට දරන උත්සාහයක් ඇතිදැයි සැකයක් මතුවන නිසා බවය.
කෙසේ වෙතත් මේ වනවිට මෙම සිද්ධියට අදාල ප්රධාන පුද්ගලයා ලෙස සැලකෙන කොළඹ අපරාධ කොට්ඨාසයේ පොලිස් පරීක්ෂකවරයෙක් රටින් පැන ගොස් ඇතැයි විමර්ශන ආරංචි මාර්ග හෙළි කරයි. ඔහු රටින් පැන්නා ද පැන්නුවාද යන්න පිළිබඳවත් සැක සහිත බව වාර්තා වේ.
එමෙන්ම මේ වනවිට සේවය අත්හිටවූ පොලිස්පති දේශබන්දු තෙන්නකෝන්ට ඒරෙහිව විදෙස් ගමන් තහනමක් පනවා තිබේ. මහජන ආරක්ෂාව පිළිබඳ නියෝජ්ය ඇමති නීතිඥ සුනිල් වටගල ඊයේ පාර්ලිමේන්තුවේ දී පැවසුවේ දේශබන්දු තෙන්නකෝන් ද ආගිය අතක් නැති බවය. ඔහු සොයමින් සිටින බව ද නියෝජ්ය ඇමතිවරයා පැවසුවේය.
