අනුර හරිනි ආණ්ඩුවේ පළමු දඩයම ලෙස හිටපු අමාත්ය අනුර යාපා සහ ඔහුගේ බිරිඳ අත්අඩංගුවට ගත් නමුත් ජනතාව බලා සිටියේ අර්ජුන මහේන්ද්රන් අල්ලා බැදුම්කර වංචාවට වගකිවයුතු පාර්ශ්වයන්ට දඩුවම් ලබාදෙන තෙක් යැයි එක්සත් ජනරජ පෙරමුණේ නායක පාර්ලිමේන්තු මන්ත්රී චම්පික රණවක පැවසුවේය.
මාස 10ක් පාස්පොට් එකක් ගන්න බැරි කරපු ඊ වීසා වංචාවෙන් කෝටි 320ක් රටට අහිමි කල දේශපානඥයින්ට , නිලධාරීන්ට, එරෙහිව ආණ්ඩුව පියවර නොගෙන දැනට මාස 4ක් ගෙවී ගොස් අවසන් යැයි ද මන්ත්රීවරයා සඳහන් කළේය.
එවැනි පරික්ෂණ කිසිවක් සිදු නොකර අනුර යාපා සහ එම මැතිණියව දඩයම් කිරීමට හේතුව වී ඇත්තේ දේශපාලනය යැයිද හෙතෙම අවධාරණය කළේය.
පසුගිය කාලය තුල ශ්රී ලංකා පොදු පෙරමුණ, ශ්රී ලංකා නිදහස් පක්ෂය, හා ඒහා බැදුණු කණ්ඩායම් අලුතින් ප්රතිසංවිධානය වී නව නායකත්වයක් ලෙස අනුර යාපා තෝරාගෙන ඒ හරහා ප්රබල දේශපාලන සන්ධානයක් ගොඩනැගීමට කටයුතු කරමින් සිටින විට මෙම ප්රහාරය එල්ල වුණ බවත් මෙයින් පෙනී යන්නේ සංවිධානාත්මක විපක්ෂයකට ආණ්ඩුව කොතරම් බියට පත්ව තිබෙන්නේද යන්න බවත් චම්පික රණවක කීවේය.
හාල් ඇටයක් දෙන්නට, පොල් ගෙඩියක් දෙන්නට, බෙහෙත් ටිකක් දෙන්නට බැරිකම, තෙල් බද්ද අඩුකරන්නට, ලයිට් බද්ද අඩුකරන්නට, පැකිලි පැකිලී සිටින ගොත ගසා සිටින ආන්ඩුව දැන් හදන්නේ මෙවැනි ක්රියාවන් හරහා ජනප්රිය වන්න යැයිද හෙතෙම විමසුවේය.
ආණ්ඩුවට ලැබුණු ජනවරමෙන් කල යුත්තේ නියම අපරාධකරුවන් සොයා යෑම, සහ රට බංකොලොත් කල පිරිස් වලට නීතිය ක්රියාත්මක කිරිම බවත් ආණ්ඩුව එසේ නොකළහොත් ප්රබල මහජන විරෝධයක් ඇති කරන්නට කටයුතු කරන බවත් මන්ත්රිවරයා අවදාරණය කළේය.
