එක් ජනවර්ගයක් මුල් කරගෙන දේශපාලන පක්ෂයක් බිහිවීම සම්බන්ධව දැඩි විවේචන එල්ල කරන පුද්ගලයින් මුස්ලිම් ජනතාව එතැනට තල්ලු කළ ඉතිහාසය ගැන කතා නොකරන බවත්, ශ්රී ලංකා මුස්ලිම් කොංග්රසය බිහිවූයේ ඉන්දු ලංකා ගිවිසුම මගින් උතුරු නැගෙනහිර ජනතාවට සිදුවූ දැඩි අසාධාරණය පදනම් කරගෙන බවත් මුස්ලිම් කොංග්රස් නායක, හිටපු පාර්ලිමේන්තු මන්ත්රී රවුෆ් හකීම් පැවසුවේය. ඉන්දු ලංකා ගිවිසුම අත්සන් කිරීමට එදා රජය කටයුතු කළේ එවකට නැගෙනහිර පළාත නියෝජනය කළ මුස්ලිම් මන්ත්රීවරු පස් දෙනාගේ විරෝධය නොතකමින් බවද ඔහු පෙන්වා දුන්නේය.
සාම සාකච්ඡා පවතින අතරතුර උතුරු නැගෙනහිර සඳහා පාර්ලිමේන්තුවක් පිහිටුවීමට තමන්ට ද එක්වන ලෙස ප්රභාකරන් දැනුම් දුන් බවත් රවුෆ් හකීම් හිටපු මන්ත්රීවරයා කීවේය. රවුෆ් හකීම් මේ බව සඳහන් කළේ දශක තුනක කාලයක් පාර්ලිමේන්තුව නියෝජනය කරමින් ඔහු සිංහල, දෙමළ හා ඉංග්රීසි භාෂාවන් ගෙන් පාර්ලිමේන්තුවේ කළ කතා ඇතුළත් වොයිස් ඔෆ් රීසන් (A Voice of Reason) ග්රන්ථය එළිදැක්වීම නිමිත්තෙන් ඊයේ (09) මහනුවර කරළිය සම්මන්ත්රණ ශාලාවේ පැවති උත්සවය අමතමිනි. එහිදී හිටපු පාර්ලිමේන්තු මන්ත්රී රවුෆ් හකීම් මෙසේද පැවසුවේය.
“එක් ජන වර්ගයක් පදනම් කර ගනිමින් දේශපාලන පක්ෂයක් නිර්මාණය වීම සම්බන්ධයෙන් අදටත් යම් යම් පිරිස් විවේචන එල්ල කරනවා. මේවා කියන කවුරුවත් මේ පක්ෂය ඒ ආකාරයෙන් බිහිවීමට මූලික හේතුව ගැන දන්නේ නැහැ. මේ ගිවිසුම මගින් උතුරු නැගෙනහිර මුස්ලිම් ජනතාව දැඩි කොන් කිරීමකට ලක්වුණා. ඒ අවස්ථාවේ ඔවුන් ගේ ප්රශ්නය ගැන කතා කරන්න අපේ පක්ෂය පෙරමුණ ගත්තා. රජය සහ එල්.ටී.ටී.ඊ සංවිධානය අතර සාම සාකච්ඡා ක්රියාත්මක වෙත් දී රජයේ නියෝජිතයෙකු ලෙස එයට සම්බන්ධ වූ මටත් නොදන්වා උතුරු නැගෙනහිරට අන්තර්පාලනයක් ලබාදීම සඳහා නෝර්වේජියානු දූත පිරිස රජය සහ එල්.ටී.ටී.ඊ සංවිධානය සමඟ රහසිගත සාකච්ඡාවක් පැවැත් වූවා. එරික් සෝල්හයම් වරක් අන්තර් පාලන ව්යුහය පිළිබඳ කෙටුම්පත තමන්ට හා ජ්යෙෂ්ඨ නිතීඥ ෆායිස් මුස්තාපා මහතා ට පෙන්වූවා. එය ක්රියාත්මක වූයේ නම් උතුරු නැගෙනහිර මුස්ලිම් ජනතාවට දැඩි අසාධාරණයක් සිදු වෙනවා.
එල්.ටී.ටී.ඊ සංවිධානය හා ශ්රී ලංකා රජය සාම සාකච්ඡා පවත්වත් දී රජය පාර්ශවයෙන් සාකච්ඡාවලට මමත් රජයේ දූත කණ්ඩායමේ සාමාජිකයෙකු ලෙස එක් වුණා. උතුරු නැගෙනහිරට වෙනම පාර්ලිමේන්තුවක් පිහිටුවීම සඳහා එක්වන ලෙස ප්රභාකරන් මට පෞද්ගලිකව අරාධනා කළා. මම ඒ පිළිබඳව වහාම අගමැති රනිල් වික්රමසිංහ දැනුවත් කරමින් සාම සාකච්ඡා ක්රියාත්මක වූවත් ප්රභාකරන් ගේ මතය මෙය යැයි දැනුම් දුන්නා.
නීතිපති දෙපාර්තමේන්තුව, පොලිස් දෙපාර්තමේන්තුව වැනි ආයතන වලට දේශපාලන ඇඟිල් ගැසීම් හා බලපෑම් වලින් තොරව ස්වාධීනය ක්රියාත්මක වීමට අවකාශ තිබිය යුතුයි. එසේ නොවුනහොත් වත්මන් ආණ්ඩුව බරපතළ ලෙස කතා කරන වංචාව දූෂණය නැති කිරීමක් වචන වලට පමණක් සීමා වෙනවා. මෙම ආයතන වලට ස්වාධීනව ක්රියාත්මක වීමට අවස්ථාව ආණ්ඩුක්රම ව්යවස්ථාව මගින් ලබා දී තිබුණත් දේශපාලන ඇඟිල් ගැසීම් නිසා මේවාහි ස්වාධීනත්වය කෙලෙසුණා. වත්මන් ආණ්ඩුව දුෂණය හා වංචාව පිටු දකින්නට කටයුතු කරන්නේ නම් සියල්ලට පෙර මෙම ආයතන වල ස්වාධීනත්වය තහවුරු කිරීම අතිශයින් වැදගත් වෙනවා.
මෙම අවස්ථාවට හිටපු පාර්ලිමේන්තු මන්ත්රීවරුන් වන ඉමිතියාස් බාකිර් මාකර්,තිළිණ බණ්ඩාර තෙන්නකෝන්, ජනාධිපති නීතීඥ ෆායිස් මුස්තාපා, පේරාදෙණිය විශ්වවිද්යාලයේ හිටපු උපකුලපති මහාචාර්ය උපුල් දිසානායක යන මහත්වරු ඇතුළු පිරිසක් සහභාගි වූහ
