හිටපු පොලිස්පති පූජිත් ජයසුන්දරට සහ හිටපු ආරක්ෂක ලේකම් හේමසිරි ප්රනාන්දුට එරෙහිව පාස්කු ඉරුදින ප්රහාරය සම්බන්ධයෙන් නීතිපතිවරයා විසින් පනවා තිබූ නඩුවේදී විත්තියේ සාක්ෂි කැඳවීමකින් තොරව ඔවුන් නිදහස් කිරීම සඳහා කොළඹ ත්රිපුද්ගල මහාධිකරණය විසින් ලබා දුන් තීන්දුව බලරහිත කරමින් අද ( 05) ශ්රේෂ්ඨාධිකරණය තීන්දුවක් නිකුත් කළේය.
උක්ත විත්තිකරුවන් පිළිබඳව වහාම නැවත නඩු විභාගයක් ආරම්භ කර විත්තියේ සාක්ෂි විභාගය පවත්වන ලෙස නියෝග කළ ශ්රේෂ්ඨාධිකරණය පාස්කු ප්රහාරය සම්බන්ධව නිසි බුද්ධි තොරතුරු ලැබී තිබිය දී එය නවත්වා ගැනිමට පියවර නොගත්තේ කුමක් නිසාදැයි යන්න පිළිබඳව විත්තියේ සාක්ෂි කැඳවා විමසා සිටිය යුතුව තිබුණු බව දන්වා සිටියේය.
බුද්ධි තොරතුරු තිබෙද්දී එම ප්රහාරය වළක්වා නොගෙන රාජකාරි වගකීම් පැහැර හැරීම ඇතුළු චෝදනා 855 බැගින් ගොනු කරමින් නීතිපතිවරයා විසින් විත්තිකරුවන් වෙත වෙන් වෙන්ව නඩු දෙකක් ගොනු කර තිබිණි. නඩු විභාගය ආරම්භ කළේ මහාධිකරණ විනිසුරුවරුන්වන ආදිත්ය පටබැඳිගේ, නාමල් බණ්ඩාර බලල්ලේ සහ මොහොමඩ් ඉර්ෂඩීන් යන ත්රිපුද්ගල මහාධිකරණ විනිසුරු මඩුල්ලය. එම විනිසුරු මඩුල්ල 2022.12.02 දින සිය තීන්දුව නිකුත් කරමින් විත්තිකරුවන් නිදහස් කරන්නේය. ඒ පැමිණිල්ලේ සාක්ෂි විභාගයෙන් අනතුරුව විත්තිය ඉදිරිපත් කළ මූලික විරෝධතා සලකා බලමිනි. එම තීන්දුව අභියෝගයට ලක් කරමින් නීතිපතිවරයා විසින් මෙම අභියාචනාව ශ්රේෂ්ඨාධිකරණයට ගොනු කරනු ලැබුවේය. එම අභියාචනාව අද විභාගයට ගෙන තිබුණේ ප්රීති පද්මන් සූරසේන, යසන්ත කෝදාගොඩ, අර්ජුන ඔබේසේකර, කුමුදිනී වික්රමසිංහ සහ මහින්ද සමයවර්ධන යන පංච පුද්ගල ශ්රේෂ්ඨාධිකරණ විනිසුරු මඩුල්ල විසිනි.
පංච පුද්ගල විනිසුරු මඩුල්ලෙන් ලැබුනේ බෙදුනු තීන්දුවකි. විනිසුරු මඩුල්ලේ සභාපති විනිසුරු ප්රීති පද්මන් සූරසේන යසන්ත කෝදාගොඩ, අර්ජුන ඔබේසේකර, කුමුදිනී වික්රමසිංහ එක් තීන්දුවක් ප්රකාශ කර තිබුණු අතර විනිසුරු මහින්ද සමයවර්ධන වෙන්ව තීන්දුවක් ලබා දුන්නේය. නමුත් සෙසු විනිසුරුවරුන් සිවු දෙනා ලබා දුන් තීන්දුවේ මූලික හරයන්ට මහින්ද සමයවර්ධන විසින් සිය තීන්දුවෙන් එකඟතාවය පල කර තිබිණි.
