දිනසේන රතුගමගේ –
උතුරු නැගෙනහිර තරුණ තරුණියන් තුළ සංවර්ධන කටයුතු පිළිබඳව දැඩි උනන්දුවක් ඇති බවත් ඉතා ඉහළ අධ්යාපනයක් ලබා සිටින එවැනි තරුණ තරුණියන්ගෙන් මේ රටට ඵලදායී ප්රයෝජනයක් ගන්නා ලෙසත් ටෙලෝ සංවිධානයේ නායක හා හිටපු පාර්ලිමේන්තු මන්ත්රී සෙල්වම් අඩෙයිකලනදන් ජනාධිපතිවරයාගෙන් ඉල්ලීමක් කොට තිබේ.
ලිපියක් යවමින් මේ ගැන සඳහන් කරණ ටෙලෝ නායකයා වසර ගණනාවක යුද්ධය නිසා උතුරු නැගෙනහිර තරුණ කොටස්වලට රටේ සංවර්ධන කටයුතු සදහා දායක වීමට නොහැකි වූ බව උදාහරණ සහිතව පෙන්වා දී තිබේ.
මේ නිසා එම පළාත්වල උගත් තරුණ තරුණියන් තුළ දැඩි මානසික කම්පනයක් හටගෙන ඇති බවත් මේ පළාත් දෙකේම රැකියා විරහිත උපාධිධාරීන් හා ඩිප්ලෝමාධාරීන් 9000 කට වඩා වැඩි පිරිසක් සිටින බවත් අඩෙයිකලනාදන් හිටපු මන්ත්රීවරයා ජනාධිපතිවරයාට පෙන්වා දී ඇත.
වැරදි ආකල්ප හා ප්රතිපත්ති ළඟ තබා ගෙන මෙම ප්රදේශ වලින් දේශපාලනයේ නිරත වන දෙමළ දේශපාලනඥයින් ඔවුන්ගේ දේශපාලන කටයුතු සදහා මේ තරුණ තරුණියන් එක් කරගෙන සිටින බවත් එහි ප්රතිපල අනාගතයේදී ඉතා භයානක විය හැකි නිසා ජනාධිපතිවරයා මැදිහත් වී එම තරුණ තරුණියන්ගෙන් රටේ සංවර්ධනයට දායකත්වයක් ලබා ගත යුතු බවත් හිටපු මන්ත්රීවරයා පෙන්වා දී තිබේ.
