රජයේ පුළුල් ආර්ථික සහ නියාමන ප්රතිසංස්කරණවලට අදාළව ශ්රී ලංකා රේගු දෙපාර්තමේන්තුව හා දේශීය ආදායම් දෙපාර්තමේන්තුව තුළ ආදායම් ඉපැයීම සහ මෙහෙයුම්වල කාර්යක්ෂමතාව වැඩි දියුණු කිරීම සඳහා වූ උපායමාර්ගික සැලසුම් පිළිබඳව සාකච්ඡා කිරීමට ජනාධිපති අනුර කුමාර දිසානායක සහ ශ්රී ලංකා රේගු දෙපාර්තමේන්තුවේ හා දේශීය ආදායම් දෙපාර්තමේන්තුවේ ජ්යෙෂ්ඨ නිලධාරීන් අතර හමුවක් ඊයේ (09) ජනාධිපති කාර්යාලයේ දී සිදු වී තිබේ .
ෙආදායම් කළමනාකරණය සහ බදු එකතු කිරීමේදී තමන්ට මුහුණ පෑමට සිදු වන අභියෝග පිළිබඳව මෙහිදී දෙපාර්තමේන්තු දෙකෙහිම නිලධාරීන් විසින් ජනාධිපතිවරයාව දැනුවත් කරන ලද බවත්, එම ගැටලුවලට ඵලදායී ලෙස මුහුණ දීම සඳහා දේශීය ආදායම් දෙපාර්තමේන්තුව සහ රේගු දෙපාර්තමේන්තුව අතර ශක්තිමත් සම්බන්ධීකරණයක් ඇති කර ගැනීමේ වැදගත්කම එහිදී අවධාරණය කෙරුණු බවත් මේ හමුව සම්බන්ධව නිවේදනයක් නිකුත් කරන ජනාධිපති මාධ්ය අංශය පවසයි.
බදු නීති මනා සම්බන්ධීකරණයකින් යුතුව වඩාත් ශක්තිමත්ව ක්රියාත්මක කිරීම සහතික කරමින්, බදු පැහැර හැරීම් වැළැක්විමට සහ ආදායම් එකතු කිරීම තවදුරටත් වැඩි දියුණු කිරීමට කටයුතු කිරීමේ අවශ්යතාව පිළිබඳව ද මෙහිද වැඩිදුරටත් අවධානය යොමු වී ඇත.
ශ්රී ලංකා රේගු දෙපාර්තමේන්තුව නියෝජනය කරමින් රේගු අධ්යක්ෂ ජනරාල් පී.බී.එස්.සී. නෝනිස්, අතිරේක රේගු අධ්යක්ෂ ජනරාල්වරුන් වන එච්.ඩබ්ලිව්.එස්.පී.කරුණාරත්න, සී.එස්.ඒ චන්ද්රසේකර, ඩබ්ලිව්.එස්.අයි සිල්වා, එස්. පී. අරුක්ගොඩ, ජේ. එම්. එම්. ජී. විජේරත්න බණ්ඩාර, ජ්යෙෂ්ඨ නියෝජ්ය අධ්යක්ෂ ඒ. ඩබ්ලිව්. එල්.සී. වීරකෝන්, ප්රධාන මූල්ය නිලධාරී එම්. ආර්.ජී.ඒ.බී. මුතුකුඩ ඇතුළු නිලධාරීන් මෙම සාකච්ඡාවට එක් වී ඇත.
එසේම දේශීය ආදායම් දෙපාර්තමේන්තුව නියෝජනය කරමින් එහි කොමසාරිස් ජනරාල් ඩබ්ලිව්.එස්. චන්ද්රසේකර, නියෝජ්ය කොමසාරිස් ජනරාල්වරුන් වන බී.කේ.එස්. ශාන්ත, ජේ.ඒ.ඩී.ඩී.බී.කේ සිරිවර්ධන, ජේ.ඩී. රණසිංහ, ඩී.එම්.එන්.එස්.බී. දිසානායක, එච්.එච්.එස් සමන්ත කුමාර, ජ්යෙෂ්ඨ කොමසාරිස් ටී.එම්.එස් තෙන්නකෝන් යන කණ්ඩායම සාකච්ඡාවට එක්ව තිබේ
