උසස්පෙළ සිසුවෙකුට පහරදුන්නැයි නුවරඑළිය ගාමිණී මධ්‍යමහා විද්‍යාලයේ විදුහල්පති, ගුරුමණ්ඩලයේ හිමිවරු දෙනමක් සහ ගුරුවරු තිදෙනෙක් අත් අඩංගුවට…

හැටන් රංජිත් රාජපක්ෂ –

• කොණ්ඩෙ වවාගෙන ඇඩ්මිෂන් ගන්න ඇවිත්… වරද පෙන්නුවාම විදුහල්පති එක්ක බහින්බස් වෙලා… විදුහල්පති පහරක් ගහනකොට විදුහල්පති එක්ක ගහගන්න ගිහින්…

• විදුහල්පතිගෙන් බේරෙන්න දරුවා අත් ඉස්සූ බව කියා දෙමව්පියන් පොලිසියට පැමිණිලි කරලා… විදුහල්පති ඇතුළු ගුරුමණ්ඩලයේ හයක් අත් අඩංගුවට… හිමිවරු දෙනමක් ඒ අතර…

නුවරඑලිය ගාමිණි ජාතික පාසලේ උසස් පෙළ අංශයේ අධ්‍යාපනය ලබමින් සිටින සිසුවෙකුට පහර දුන්නේ යැයි කියන සිද්ධියකට සම්බන්ධ එම පාසලේ විදුහල්පතිවරයා, ගුරු මණ්ඩලයේ භික්ෂුන් වහන්සේ දෙනමක් සහ ගුරුවරුන් තිදෙනෙක් ඇතුළු සැකකරුවන් හයදෙනෙක් (08) දින සැකපිට අත්අඩංගුවට ගත් බව නුවරඑලිය පොලිසිය පැවසිය.

2024 වසරේ උසස් පෙළ විභාගයට පෙනී සිටීම සඳහා අයදුම්පත් ලබා ගැනිමට ඉකුත් (03) දින එම සිසුවා පාසලට ගිය අවස්ථාවේ සිසුවාගේ කොණ්ඩය අධික ලෙස වැවි තිබු නිසා විදුහල්පතිවරයා කොණ්ඩය කපා පැමිණෙන ලෙසට පහර දි ඇති බවත්, විදුහල්පතිවරයාගේ පහරින් බේරිමට සිසුවා අත ඔසවා සිටි අවස්ථාවේ පාසලේ ගුරුවරුන් වශයෙන් සේවය කරන භික්ෂුන් වහන්සේ දෙපල සහ ගුරුවරුන් තිදෙනා සිසුවාට පහර දී ඇති බවත් සදහන් කරමින් සිසුවාගේ දෙමව්පියන් විසින් නුවරඑලිය පොලිසියට පැමිණිල්ලක් කර ඇත.

දෙමව්පියන්ගේ පැමිණිල්ල අනුව එම විදුහලේ විදුහල්පතිවරයා , ගුරුවරුන් පස්දෙනා අද (08) දින නුවරඑලිය පොලිසිය විසින් අත්අඩංගුවට ගෙන නුවරඑලිය මහෙස්ත්‍රාත් ප්‍රබුද්ධිකා ලංකාන්දි වෙත ඉදිරිපත් කිරිමෙන් අනතුරුව සැකකරුවන් හයදෙනාට සිසුවාට කිසිදු බලපැමක් සිදු නොකරන ලෙසට දැඩි ලෙස අවවාද කර ලක්ෂයේ ශරිර ඇප 12 ක් මත නිදහස් කර, යලිත් මෙම නඩුව ලබන මස (26) දින කැඳවීමට මහෙස්ත්‍රාත්වරිය නියෝග කලාය.