විදේශ ප්රතිපත්ති අර්බුදයක් සම්බන්ධයෙන් හිටපු එක්සත් ජනපද ජනාධිපතිවරයෙක් වූ බැරක් ඔබාමා විසින් දුර්ලභ ප්රකාශයක් සිදු කර තිබේ.
ඊශ්රයාලයේ යුද මූලෝපාය මිනිස් පිරිවැය නොතකා හරින්නේ නම් එය නැවත ඊශ්රායාලයටම විනාශයක් ලඟා කර දෙනු ඇති බවට බැරක් ඔබාමා අනතුරු අඟවා ඇත.
ලිඛිත ප්රකාශයක් නිකුත් කරමින් ඔහු පවසන්නේ ඊශ්රයාලය ගාසා තීරය තුළ සිදු කරන සිවිල් ජීවිත හානි සීමා කරන ලෙසය.
මේ සිදුකරන විනාශය පලස්තීනුවන්ගේ පරම්පරා ගණනක් ලෝකයෙන් දුරස් කරනු ඇති බවත් ඉන් ගෝලීය සහයෝගය ඛාදනය වී දිගු කාලීන සාම ප්රයත්නයන් වලක්වනු ඇති බවත් බැරක් ඔබාමා වැඩි දුරටත් ඊශ්රයාලයට දන්වා සිටින්නේය.
“දැනටමත් ගාසා තීරයට එල්ල වූ බෝම්බ ප්රහාරයෙන් පලස්තීනුවන් දහස් ගණනක් මිය ගොස් ඇත. ඔවුන්ගෙන් බොහෝ දෙනෙක් කුඩා දරුවන් ය. ලක්ෂ සංඛ්යාත ජනතාවක් තම නිවෙස්වලින් පිටමං කර ඇත,” ඔබාමා කීවේය.
“වහල් වූ සිවිල් ජනතාවකට ආහාර, ජලය සහ විදුලිය කපා හැරීමට ඊශ්රායල රජය ගත් තීරණය, වර්ධනය වන මානුෂීය අර්බුදය තවත් නරක අතට හැරීමට පමණක් නොව තර්ජනයක් ද නිර්මාණය කරයි,” ඔහු තවදුරටත් පැවසීය.
ඔහු මේ බව ප්රකාශ කරන්නේ හමාස් සටන් කරුවන්ගේ ප්රහාරය හෙළා දකිමින් ඊශ්රායලයට තමන්ව ආරක්ෂා කර ගැනීමට ඇති අයිතියට තම සහයෝගය යළිත් අවධාරණය කරන අතරය.
ඔබාමා මේ ප්රකාශය කරන්නේ එක්සත් ජනපදයේ ජනාධිපති වූ ජෝ බයිඩන් සමඟ තම ප්රකාශය පිළිබඳ සම්බන්ධීකරණයෙන්ද යන්න ගැන පැහැදිලි නැති බවත් මෙම ප්රකාශයට අදහස් දැක්වීම සඳහා කරන ලද ඉල්ලීමකට ධවල මන්දිරය වහාම ප්රතිචාර දැක්වූයේ නැති බවත් රොයිටර් වාර්තා කරයි.
