විපතේ පීඩාව මැද තුර්කි ජනතාව කුළල් කා ගනිති

භූමිකම්පාවෙන් පසු හයවන දිනය වනවිට තුර්කි භූමිය තුළ බෙහෙවින්ම ව්‍යාකූල තත්ත්වයක් වර්ධනය වෙමින් ඇතැයි විදෙස් ප්‍රවෘත්ති ඒජන්සි පවසයි.
සෙනසුරාදා, දකුණු තුර්කියේ හටායි පළාතේ නම් නොකළ කණ්ඩායම් අතර ඇති වූ ගැටුම් හේතුවෙන් ජර්මානු සහ ඔස්ට්‍රියානු හමුදාවන් සිය ගලවා ගැනීමේ මෙහෙයුම් නවත්වා ඇත.
ආහාර සැපයුම් අඩුවීමත් සමඟ ආරක්ෂාව නරක අතට හැරෙනු ඇතැයි අපේක්ෂා කරන බව ගලවා ගැනීමේ කණ්ඩායම් අනතුරු අඟවා ඇත.
මේ අතර ඔස්ට්‍රියානු ලුතිනන් කර්නල් Pierre Kugelweis පවසන්නේ තුර්කියේ කණ්ඩායම් අතර ආක්‍රමණ වැඩි වෙමින් පවතින බවය
දකුණු තුර්කියේ ඇති වී තිබෙන නොසන්සුන්තාව හේතුවෙන් ඇතැම් ස්ථානවල මුදාගැනීමේ කටයුතු නැවත ආරම්භ කිරීමට සිදුවී ඇත්තේ තුර්කි හමුදාවේ ආරක්ෂාව යටතේය.
දකුණු තුර්කිය සහ උතුරු සිරියාව පුරා මිලියන සංඛ්‍යාත ජනතාවකට මේ වනවිට නිවාස අහිමි වී තිබේ. කලාපයේ රාත්‍රී උෂ්ණත්වය සෙල්සියස් අංශක 0ට පහළ ඍණ අගයක් දක්වා පහත වැටී ඇත.
800,000 කට වැඩි පිරිසක් ප්‍රමාණවත් ආහාර නොමැතිව සිටින බවට එක්සත් ජාතීන් අනතුරු අඟවා තිබේ. එමෙන්ම භූමිකම්පාවෙන් මියගිය සංඛ්‍යාව දැනට වාර්තා වූ සංඛ්‍යාව මෙන් දෙගුණයක් විය හැකි බවට භූමියේ සිටින ආධාර ඒජන්සිය අනතුරු අඟවා ඇත.
සිරියාවේ, මරණ සංඛ්‍යාව දැන් 3,500 ඉක්මවා ගොස්ය. නමුත් සිකුරාදා සිට නව මරණ සංඛ්‍යා ප්‍රකාශයට පත් කර නොමැත. ඉරිදා වනවිට තුර්කියේ මියගිය සංඛ්‍යාව 29,000 කට වඩා වැඩි විය.
සෙනසුරාදා තුර්කියේ කහරමන්මාරස් ප්‍රාන්තයේ සිටි එක්සත් ජාතීන්ගේ ආධාර ප්‍රධානියා කීවේ “මෙම කලාපයේ වසර 100 කට පසු සිදු වූ දරුණුතම සිදුවීම” මෙය ලෙසය.