ශ්රී ලංකාවට ගිනිකොණ දෙසින් බෙංගාල බොක්ක මුහුදු ප්රදේශයේ ස්ථාපිතව පවතින පීඩන අවපාතය ඉදිරි පැය 12 තුළ ගැඹුරු පීඩන අවපාතයක් දක්වා තවදුරටත් වර්ධනය වීමට බොහෝ දුරට හැකියාව පවතින බව කාලගුණ විද්යා දෙපාර්තමේන්තුව නිවේදනය කරයි.
ඊයේ (07) රාත්රී 11.30 වන විට මෙම පද්ධතිය පොතුවිල් සිට 490 km ක් ගිනිකොණ දෙසින්, අක්ෂාංශ 5.3°N සහ දේශාංශ 86.0°E ආසන්නයේ කේන්ද්රගතව පැවතුනි.
එය බටහිරට බරව වයඹ දෙසට ගමන් කරමින් ඉදිරි පැය 24 තුල ගැඹුරු පීඩන අවපාතයක් බවට වර්ධනය වෙමින් දිවයිනේ නැගෙනහිර වෙරළ වෙත ලගාවනු ඇතැයි අපේක්ෂා කෙරේ.
දිවයිනේ බොහෝ ප්රදේශවල අහස වලාකුළින් බරව පවතී.
උතුරු, උතුරු-මැද, නැගෙනහිර, ඌව, මධ්යම සහ දකුණු පළාත්වල විටින් විට වැසි හෝ ගිගුරුම් සහිත වැසි ඇතිවේ.
සෙසු ප්රදේශවල පස්වරු 1.00 න් පමණ පසුව තැනින් තැන වැසි හෝ ගිගුරුම් සහිත වැසි ඇති විය හැක.
නැගෙනහිර සහ ඌව පළාත්වල ඇතැම් ස්ථානවලට මි.මී. 100 ට වැඩි තද වැසි ඇති විය හැකි අතර දිවයිනේ සෙසු ප්රදේශවල ඇතැම් ස්ථානවලට මි.මී. (50-75) ක පමණ තරමක තද වැසි ඇති විය හැක.
මධ්යම කඳුකරයේ නැගෙනහිර බෑවුම් ප්රදේශවලත්, උතුරු, උතුරු-මැද, වයඹ සහ නැගෙනහිර පළාත්වලත්, හම්බන්තොට, ගම්පහ, කොළඹ සහ මොනරාගල දිස්ත්රික්කවලත් විටින් විට හමන පැ.කි.මී. (50-60) පමණ තද සුළං ඇති විය හැක. ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්ය පියවර ගන්නා කාලගුණ විද්යා දෙපාර්තමේන්තුව ඉල්ලා සිටී.
මේ අතර කාලගුණ පුරෝකථන උපුටා දක්වමින් ආපදා කළමනාකරණ මධ්යස්ථානයේ, අධ්යක්ෂ ජනරාල් සම්පත් කොටුවේගොඩ පවසන්නේ උතුරු පළාතේ මුලතිව්, යාපනය, වව්නියාව, මන්නාරම, කිලිනොච්චිය යන ප්රදේශවලට මි.මී 75 – 100ත් අතරත්, උතුරු මැද පළාතේ අනුරාධපුර සහ පොළොන්නරුව ප්රදේශවලට මි.මී 50 – 75ත් අතරත් නැගෙනහිර පළාතේ ත්රිකුණාමලය, අම්පාර සහ මඩකලපුව යන ප්රදේශවලට ගිගුරුම් සහිත වැසි හෝ මි.මී 100ට වැඩි වර්ෂාපතනයක් ඇති විය හැකි බවටත් නිරීක්ෂණය කර ඇති බවය.
එසේම සබරගමුව පළාතේ රත්නපුර සහ කෑගල්ල ප්රදේශවලට රාත්රී කාලයේ ගිගුරුම් සහිත වැසි ඇති විය හැකි අතර, බස්නාහිර පළාතේ කොළඹ, කළුතර සහ ගම්පහ යන ප්රදේශවලට සවස් කාලයේ හෝ රාත්රී කාලයේ ගිගුරුම් සහිත වැසි ද දකුණු පළාතේ ගාල්ල, මාතර සහ හම්බන්තොට යන දිස්ත්රික්කවලට සවස් කාලයේ ගිගුරුම් සහිත වැසි ද ඌව පළාතේ මොනරාගල සහ බදුල්ල යන දිස්ත්රික්කවලට විටින් විට ගිගුරුම් සහිතව මි.මී 100ක පමණ වැසි ඇති විය හැකි බවද පුරෝකථනය කර ඇති බවය.
මධ්යම පළාතේ මහනුවර, මාතලේ දිස්ත්රික්කවලට මි.මී 75 – 100ත් අතර වැස්සක් අද, හෙට සහ අනිද්දා යන තෙදින තුළම බලාපොරොත්තු විය හැකි බව ආපදා කළමනාකරණ මධ්යස්ථානයේ අධ්යක්ෂ ජනරාල් සම්පත් කොටුවේගොඩ කියයි.
මේ අනුව බදුල්ල මොණාරාගල සහ මධ්යම පළාතට මේ තද වැසි ඇතිවන්නේ දිත්වා සුළි කුණාටුවෙන් දැඩිව බලපෑ පසුබිමක් තුළය.
වාරිමාර්ග දෙපාර්තමේන්තුව මඟින් කළමනාකරණය කරනු ලබන වැව් සහ ජලාශවල ජලය 80%ක් – 90ක් අතර ප්රමාණයක් පිරී ඇති බවත් ඒ අනුව අම්පාර, මඩකලපුව, පොළොන්නරුව, අනුරාධපුරය, ත්රිකුණාමලය, වව්නියාව හා යාපනය දිස්ත්රික්කවල පිහිටි ගංගා ද්රෝණිවල ගංවතුර තත්ත්වයක් ඇති වීමේ අවදානමක් පවතින බවත් ඒ ආපදා කළමනාකරණ මධ්යස්ථානය පවසයි.
මේ අතර ජාතික ගොඩනැඟිලි පර්යේෂණ සංවිධානය විසින් නායයෑම් රතු නිවේදන නිකුත් කර ඇති ස්ථානවල ජීවත්වන ජනතාව ආරක්ෂිත ස්ථානවෙත ගමන් කරන ලෙසත් අධ්යක්ෂ ජනරාල්වරයා ඉල්ලා සිටී.
මෙම තත්ත්වය තුළ යම් ආපදාවක් ඇති වුවහොත් යුද හමුදා කණ්ඩායම් 80ක්, නාවික හමුදා බෝට්ටු සහ ගුවන් හමුදාව විසින් වීරවිල, පලාවි, රත්මලාන, හිඟුරක්ගොඩ, අනුරාධපුර යන ස්ථානවල හෙළිකොප්ටර් යානා ස්ථානගත කර ඇතැයි ද පැවසු සම්පත් කොටුවේගොඩ මහතා මීට අමතරව ශ්රී ලංකා පොලීසිය සහ සිවිල් ආරක්ෂක දෙපාර්තමේන්තුව ද හදිසි අවස්ථාවක් සඳහා සුදානමින් සිටින බවද පැවසීය.
