අසේල කුරුළුවංශ –
මහනුවර දිස්ත්රික්කයේ බාල වයස්කරුවන් 9848 දෙනෙකු අනාරක්ෂිත තත්ත්වයේ පසුවන බව පොලීසියට තොරතුරු ලැබී ඇතැයි මධ්යම පළාත් නියෝජ්ය පොලිස්පති සුදත් මාසිංහගේ පවසයි.
මහනුවර, ගම්පොළ හා තෙල්දෙණිය පොලිස් කොට්ඨාසවල පොලිස් ස්ථානවලට ලැබී ඇති තොරතුරු අනුව පිළිවෙළින් ළමුන් 3456 ක් 3132 ක් හා 3260ක් අනාරක්ෂිත තත්ත්වයේ පසුවන බවත් පරිවාස ගතකර ඇති ඇතැම් දරුවන් එම ස්ථානවලින් පැන යෑමෙන් පසු යළි හිංසාවට ලක්වූ අවස්ථා වාර්තා වන බවත් ඔහු පෙන්වා දෙයි.
මහනුවර දිස්ත්රික් සම්බන්ධීකරණ කමිටුවේ දී නියෝජ්ය පොලිස්පතිවරයා ඊයේ (15) මෙම තොරතුරු අනාවරණය කළේය. දිස්ත්රික් සම්බන්ධීකරණ කමිටුව අමාත්ය කේ.ඩී.ලාල්කාන්ත සහ මධ්යම පළාත් ආණ්ඩුකාර මහාචාර්ය එස්.බී.එස්.අභයකෝන් සම සභාපතීත්වයෙන් මහනුවර දිස්ත්රික් ලේකම් කාර්යාලයේ දී රැස්විය.
එහි දී මධ්යම පළාත් නියෝජ්ය පොලිස්පති සුදත් මාසිංහගේ මහතා මෙසේද පැවසුවේය.
“මේ බාල වයස්කාර අනාරක්ෂිත දරු දැරියන් සම්බන්ධයෙන් රජයේ සෑම ආයතනයකම යම් යම් වගකිව යුතු අංශ තිබෙනවා. මේ අය ලෝක ළමා දිනයට විතරක් මොකක් හරි උත්සවයක් තියලා තමන්ගේ වගකීම එතනින් අවසන් කරනවා.”
“මේ වයසේ අනාරක්ෂිත ගැහැණු ළමුන් බොහෝ විට ලිංගික අතවරවලට අපයෝජනයට ලක්වෙනවා. මේ අය වෛද්ය පරීක්ෂණ සඳහා තෙල්දෙණිය රෝහලට යොමු කළාම වෛද්ය පරීක්ෂණය එහේ කරන්න බැහැ කියලා මහනුවරට යවනවා. මහනුවරට ගියාම වෛද්ය පරීක්ෂණය සඳහා ඇතැම් විට දවස් දෙක තුන ඉන්න වෙනවා. එහෙම වුණාම සමහර අම්මලා වෛද්ය පරීක්ෂණ එපා කියලා දුවව ගෙදර එක්කගෙන යනවා. පසුව තමයි තමන්ගේ දරුවා ගැබිණියක් වෙලා කියලා දැන ගන්නේ. ”
“තවත් අය සමාජ රෝගීන් වෙලා. මේ තත්ත්වය අවම කරන්න අපි කටයුතු කරන්න අවශ්යයයි. මේක අපි සැමගේ වගකීමක්. මාපිය රැකවරණය නොමැතිව භාරකරුවන්ගේ සෙවණේ වැඩෙන දරුවන් අතවරයට ලක්වන අවස්ථා බහුලයි. මේ දරුවන් ආරක්ෂා කර ගැනීම සඳහා නිලධාරීන් මැදිහත් විය යුතුයි. පාසල් දරු දැරියන් දැනුවත් කිරීමේ වැඩසටහන් පැවැත්විය යුතුයි.”
