අසේල කුරුළුවංශ –
පොලිස්පතිවරයා විසින් තොරතුරු ලබා දීම සඳහා පොලිස්පතිවරුන්ගේ දුරකථන අංක ප්රසිද්ධ කළ පසු දකුණු පළාත භාර ජ්යෙෂ්ඨ නියෝජ්ය පොලිස්පතිවරයට පමණක් මේ වනවිට මත්ද්රව්ය ජාවාරම සම්බන්ධ තොරතුරු 2000කට වැඩි ප්රමාණයක් ලැබී ඇතැයි මහජන ආරක්ෂක ඇමති ආනන්ද විජේපාල සඳහන් කළේය.
ඇමතිවරයා අද (28) මේ බව ප්රකාශ කළේ පේරාදෙණිය හන්දෙස්ස මාම්පිටිය ප්රදේශයේ ඉදි කිරීමට යෝජිත මත්ද්රව්ය වලට යොමු වූවන්ට ප්රතිකාර ලබාදීමේ හා පුනරුත්ථාපනය කිරීමේ මධ්යම පළාත් මධ්යස්ථානය සඳහා මුල්ගල් තැබීමේ උත්සවයේ ය අමතමිනි.
ඔහු මෙසේ ද පැවසුවේය.
පොලිස්පතිවරයා මෑතක තොරතුරු දෙන්න කියලා නියෝජ්ය පොලිස්පතිවරුන්ගේ දුරකතන අංක ප්රසිද්ධ කළා.දකුණු පළාත් භාර ජ්යෙෂ්ඨ නියෝජ්ය පොලිස්පතිවරයා කතා කරලා කිව්වා මේ වනවිට 2000 කට අධික තොරතුරු ප්රමාණයක් දකුණු පළාතින් විතරක් ඇවිල්ලා තිබෙනවා කියලා.
දකුණු පළාතින් විතරක් 2000 ක් ආවා නම් අනෙක් පළාතුත් ගත්තම කොතරම් ව්යාප්තියක් මේකේ තිබෙනවාද කියලා අවබෝධ කර ගන්න පුළුවන්. හිටපු පාලකයෝ මේ සඳහා පිළියම් යෙදුවද නැද්ද කියලා මම අමුතුවෙන් ඔබට කියන්න ඕන නැහැ.
අනතරායකර ඖෂධ පාලක ජාතික මණ්ඩලයේ ධාරිතාව 200 යි. පුනරුත්ථාපන කොමසාරිස් ජනරාල් කාර්යාලයේ යටතේ කන්දකාඩු, සේනපුර වගේ පුනරුත්ථාපන මධ්යස්ථාන තිබෙනවා. ඒවාගේ ධාරිතාව 1500 ක් විතර. තවත් පෞද්ගලික ආයතන 10-15 ක් තිබෙනවා. මත්ද්රව්ය ව්යාප්තියත් එක්ක පුනරුත්ථාපන කොහෙත්ම ප්රමාණවත් නැහැ.
රටේ අනාගත දරු පරපුර ආරක්ෂා කර ගැනීම සඳහා වන බරපතළ අභියෝගයක් ආණ්ඩුවට පැවරී තිබෙනවා. ඒ අභියෝගය අපි බාරගෙන තිබෙනවා. මත්ද්රව්ය රට තුළට ගලා එන එක වැලැක්වීම වගේම අනෙක් පැත්තෙන් මත්ද්රව්ය සඳහා තිබෙන ඉල්ලුම අඩු කිරීම කළ යුතුයි. මත්ද්රව්ය රට තුළට ගලා ඒම වැලැක්වීම සඳහා තිබෙන ආයතන අතර ප්රධානතම ආයතනය පොලීසියයි. අපි තීන්දුවක් ගත්තා මත්ද්රව්ය ජාලය කෙසේ හෝ අඩපණ කරන්න. මේ මත්ද්රව්ය ජාලය සමඟ සංවිධානාත්මක අපරාධකරුවන් ඍජුවම සම්බන්ධයි. ඒ දෙක වෙන් කරලා ගන්න අමාරුයි. රජයක් ලෙස තීන්දු කළා කොපමණ අභියෝග තිබුණත් මේක පාලනය කිරීම ප්රමුඛ කාර්ය ලෙස සලකා කටයුතු කරන්න. ඒකට වැඩපිළිවෙළක් ඉදිරි සතියේ දී ක්රියාත්මක කරනවා.
