යාපනය, පේරියවිලාන් ප්රදේශයේදී ඉඩම් ආරවුලක් අතරතුර ගිනි අවියක් පෙන්වා කාන්තාවකට මරණීය තර්ජනය කිරීමේ චෝදනාව මත අත්අඩංගුවට ගත් පාර්ලිමේන්තු මන්ත්රී රාමනාදන් අර්ජුනා ලබන 29 වනදා දක්වා රිමාන්ඩ් බන්ධනාගාර ගත කිරීමට මල්ලකම් මහේස්ත්රාත් අධිකරණය අද (27) නියෝග කළේය.
අද උදෑසන ඉලවාලෙයි පොලීසිය මගින් අත්අඩංගුවට ගත් මන්ත්රීවරයා අධිකරණයට ඉදිරිපත් කිරීමෙන් අනතුරුව මෙම නියෝගය පනවා ඇත.
මෙම සිද්ධියට මුල් වී ඇත්තේ පසුගිය අප්රේල් 25 වනදා යාපනය පේරියවිලාන් ප්රදේශයේ පිහිටි ඉඩමක් සම්බන්ධයෙන් ඇති වූ දැඩි මතභේදාත්මක තත්ත්වයකි. අදාළ ඉඩම තමන් සතු බව පවසමින් මන්ත්රීවරයා එදින එහි පිරිසිදු කිරීමේ කටයුතුවල නිරත වෙමින් සිට ඇත. එම අවස්ථාවේදී කාන්තාවන් දෙදෙනෙකු එම ස්ථානයට පැමිණ ඉඩමෙන් කොටසක් තමන්ට අයත් බව පවසමින් මන්ත්රීවරයා සමග වාදයකට පැටලී තිබේ.
එම උණුසුම් වචන හුවමාරුව දුරදිග ගොස් ඇති අතර, එහිදී මන්ත්රීවරයා සන්තකයේ තිබූ ගිනි අවියක් එළියට ගෙන එක් කාන්තාවකට තර්ජනය කර ඇති බවට පොලිස් පරීක්ෂණවලදී අනාවරණය වී ඇත. අදාළ ඉඩම සම්බන්ධයෙන් දැනටමත් මහේස්ත්රාත් අධිකරණයේ නඩුවක් විභාග වෙමින් පවතින අතර මන්ත්රීවරයා මෙන්ම අනෙක් පාර්ශවය ද එහි අයිතිය ඉල්ලා සිටින පසුබිමක මෙම ගැටුම හටගෙන තිබේ.
සිද්ධිය සම්බන්ධයෙන් තර්ජනයට ලක්වූ කාන්තාව විසින් ඉලවාලෙයි පොලීසියට කරන ලද පැමිණිල්ලකට අනුව වහාම පරීක්ෂණ ආරම්භ කෙරුණි. ඒ අනුව අද උදෑසන මන්ත්රීවරයා අත්අඩංගුවට ගෙන අධිකරණයට ඉදිරිපත් කිරීමෙන් පසු මෙලෙස රිමාන්ඩ් භාරයට පත් කෙරුණි. පොලීසිය මේ පිළිබඳව වැඩිදුර විමර්ශන මෙහෙයවයි.
