ගොවි ජනතාව මුහුණ දෙන ඉන්ධන ගැටලුව විසඳීම සඳහා ගොවි සංවිධාන සෘජුව මැදිහත් කරගනිමින් නව ක්රමවේදයක් හඳුන්වා දීමට රජය පියවර ගෙන ඇති බව නියෝජ්ය කෘෂිකර්ම ඇමති නාමල් කරුණාරත්න අද (19) පාර්ලිමේන්තුවේ දී ප්රකාශ කළේය.
ඒ අනුව මින් ඉදිරියට ගොවි සංවිධානවල මැදිහත්වීම මත ගොවීන්ට අවශ්ය ඉන්ධන තොග වශයෙන් ලබාගෙන බෙදා හැරීමට අවස්ථාව හිමිවන බව ඇමතිවරයා කීවේය.
ඇමතිවරයාට අනුව මීට පෙර පැවති සංකීර්ණ නීතිමය පටිපාටිය ලිහිල් කරමින්, ප්රාදේශීය ලේකම් හෝ දිස්ත්රික් ලේකම්වරයාගේ සහතික කිරීම් අවශ්ය නොවන පරිදි මෙම ක්රියාවලිය සරල කර ඇත.
නව තීරණයට අනුව කෘෂිකර්ම පර්යේෂණ හා නිෂ්පාදන සහකාර සහ අදාළ ගොවි සංවිධානයේ සහතිකය පමණක් ප්රමාණවත් වන අතර, ඕනෑම භාජනයකට හෝ බැරල්වලට ඉන්ධන ලබාගැනීමේ අවසරය ද ගොවී සංවිධාන වෙත හිමි වේ.
මෙමඟින් ගොවීන්ට ඉන්ධන පිරවුම්හල් අසල කාලය වැය කිරීමට සිදු නොවන අතර, ප්රවාහන වියදම් අවම කරගනිමින් ගැටුම්වලින් තොරව අවශ්ය ඉන්ධන ලබාගත හැකි බව රජය අවධාරණය කරයි.
මේ සඳහා අවශ්ය පූර්ණ සහයෝගය ලබා දෙන ලෙස රජය සියලුම ගොවි සංවිධානවලින් ඉල්ලා සිටියි.
