මනම්පිටිය – නිමල් ජයරත්න –
මෙතෙක් බිහි වූ කිසිදු ජනාධිපතිවරයෙකු නැගෙනහිර පළාතේ ජනතාවගේ ගැටලු විසඳීමට ඍජුව ඉදිරිපත් නොවූ බවත්, වත්මන් ජනාධිපති අනුර කුමාර දිසානායක තම විහාරස්ථානයට පැමිණ පළාතේ ජනතාවගේ ගැටලු විසඳා දීමට පොරොන්දු වූ බවත් මඩකලපුව ශ්රී මංගලාරාමාධිපති පූජ්ය අම්පිටියේ සුමනරතන නාහිමි සඳහන් කළහ.
උන්වහන්සේ පෙන්වා දෙන්නේ නැගෙනහිර පළාතේ සියලු ජනතාවගේ ගැටලු විසඳීම වෙනුවෙන් පක්ෂ විපක්ෂ භේදයකින් තොරව සියලු දෙනා එක්ව ජනාධිපතිවරයාට සහයෝගය ලබාදිය යුතු බවය.
ජනාධිපති අනුර කුමාර දිසානායකගේ වැඩපිළිවෙළ අගය කරන බවත්, නැගෙනහිර පළාතේ ජීවත්වන ජනතාව මුහුණ දෙන ඉඩම් ගැටලුව ඇතුළු අනෙකුත් පොදු ප්රශ්න විසඳීමට ජනාධිපතිවරයාට ශක්තියක් පවතින බවත් උන්වහන්සේ කීහ. එම කටයුත්ත නිසි ලෙස ඉටු කිරීමට ජනාධිපතිවරයා මැදිහත් වනු ඇති බවට තමාට දැඩි විශ්වාසයක් පවතින බවද සුමනරතන හිමි වැඩිදුරටත් ප්රකාශ කළහ.
මඩකලපුව මංගලාරාමාධිපති අම්පිටියේ සුමනරතන හිමියන් මේ බව සඳහන් කළේ අද (23) පෙරවරුවේ මඩකලපුව ශ්රී මංගලාරාම විහාරස්ථානයේදී කැඳවා තිබූ ප්රවෘත්ති සාකච්ඡාවකදීය.
එහිදී වැඩිදුරටත් අදහස් දැක්වූ පූජ්ය අම්පිටියේ සුමනරත්න හිමියෝ මෙසේද පැවසූහ.
”මෛත්රිපාල ජනාධිපතිවරයා මඩකලපුවට ආවා. ඒත් පන්සලට ආවේ නැහැ. මහින්ද රාජපක්ෂ වගේම රනිල් වික්රමසිංහ ජනාධිපතිවෙලා හිටිය කාලෙත් පන්සල පැත්තේ ආවේ නැහැ. ගෝඨාභය රාජපක්ෂත් ඒ වැඩේමයි කළේ. නමුත් මේ ජනාධිපතිවරයාගෙන් මම සාකච්ඡාවක් ඉල්ලුවාම ඒක ලබා දුන්නා. නැගෙනහිර පළාතේ ගැටලු ගැන අනුර දිසානායක ජනාධිපතිවරයා එක්ක සාකච්ඡා කරන්න අවස්ථාවක් ලැබුණා. ඒක නැගෙනහිර පළාතේ ජනතාව ලබාගත් ලොකු ජයග්රහණයක්. අපි විශ්වාස කරනවා නැගෙනහිර පළාතේ ජනතාව වෙනුවෙන් යම් වැඩ කොටසක් අනුර කුමාර දිසානායක ජනාධිපතිවරයා ඉටු කරයි කියලා. ඒ සඳහා එතුමාට සියලු දෙනාගේම සහාය ලබාදිය යුතුයි. නැගෙනහිර පළාතේ සංඝරත්නය හැටියට අපි සියලු දෙනාම එකතුවෙලා ජනාධිපතිවරයාට හොඳ සහයෝගයක් ලබා දෙනවා.”
ඇත්ත ඇති සැටියෙන් දැකීමට තමන් කටයුතු කරන බව පෙන්වා දුන් සුමනරතන හිමියෝ, තමන් දේශපාලන පක්ෂ පස්සේ යන අයෙකු නොවන බවද මෙහිදී අවධාරණය කළහ.
”සමහරු මේවා දැකලා, මම මහින්ද රාජපක්ෂ පාර්ශ්වයෙන් අයින් වෙලා, අනුර කුමාර දිසානායක පාර්ශ්වයට සම්බන්ධ වුණා කියලා විවිධ සමාජ මාධ්ය ඔස්සේ අපට ප්රහාර එල්ල කරනවා. මඩ ප්රචාර යවනවා. නමුත් අපි හොඳ වැඩ කරද්දී පවතින රජයට වගේම ජනාධිපතිවරයාට හොඳ කිව යුතුයි. මම මාලිමාවටවත්, ජනතා විමුක්ති පෙරමුණටවත් කඩේ යන්නේ නැහැ. ජනාධිපතිවරයා කරන හොඳ වැඩපිළිවෙළක් තියෙනවා නම් අපි ඒකට උපරිම සහයෝගය ලබා දෙනවා.”
