තම ජාත්යන්තර ක්රිකට් දිවියට සමුදෙන අවසන් මොහොතේදී පවා තමන්ට වාර්ගික ඒකාකෘති සහ අගතිගාමී විවේචන සමඟ සටන් කිරීමට සිදුව ඇති බව ප්රවීණ ආරම්භක පිතිකරු උස්මාන් කවාජා පැවසුවේය.
2011 වසරේදී ජාත්යන්තර වරම් දිනූ කවාජා, ලොව දක්ෂතම ආරම්භක පිතිකරුවෙකු ලෙස අවසන් කාලසීමාවේදී විශිෂ්ට දක්ෂතා දැක්වූයේය. දශකයකට වැඩි කාලයක් ඕස්ට්රේලියානු පිතිකරණ බලඇණියේ ප්රමුඛයෙකු වූ උස්මාන් කවාජා සිඩ්නිහිදී අනිද්දා (4) ආරම්භවන ‘අළු බඳුන’ තරගාවලියේ 5වන හා අවසන් තරගයෙන් පසු ජාත්යන්තර ක්රිකට් පිටියෙන් සමුගන්නා බව නිල වශයෙන් නිවේදනය කරමින් මේ බව ප්රකාශ කළේය.
අළු බඳුන කුසලානය සඳහා සිඩ්නි හි පැවති 04වැනි ටෙස්ට් තරගයෙන් අනතුරුව සිය ජාත්යාන්තර ක්රිකට් දිවිය නිමා කිරිම සම්බන්ධව මාධය වෙත අදහස් දක්වමින් කවාජා අවධාරණය කළේ, තමන් කෙරෙහි එල්ල වූ ඇතැම් විවේචන පිටුපස පැහැදිලි වාර්ගික පදනමක් ඇති බවය.
පර්ත් ටෙස්ට් තරගයට පෙර තමන් ගොල්ෆ් ක්රීඩා කිරීම සහ ඉන්පසු ඇති වූ ආබාධය සම්බන්ධයෙන් මාධ්ය සහ හිටපු ක්රීඩකයින් එල්ල කළ විවේචන දැඩි ලෙස හෙළා දුටු කවාජා, එය තම කැපවීම ප්රශ්න කරන ‘පුද්ගලික පහරදීමක්’ බව පැවසීය.
“මම කම්මැලියි, ආත්මාර්ථකාමීයි, කණ්ඩායමට කැපවී නැහැ වැනි දේවල් ඔවුන් කීවා. මේවා මා හැදී වැඩුණු වාර්ගික ඒකාකෘතිමයි. වෙනත් සුදු ජාතික ක්රීඩකයින් මෙලෙස ආබාධවලට ලක් වූ විට ඔවුන්ව හඳුන්වන්නේ ‘ඕස්ට්රේලියානු ලැරිකින්ලා’ (Australian Larrikins) ලෙසයි. නමුත් මගේ විශ්වාසනීයත්වය ප්රශ්න කෙරුණා,” යැයි ඔහු සංවේදීව ප්රකාශ කළේය.
ඉස්ලාමාබාද්හි උපත ලබා ඕස්ට්රේලියාව නියෝජනය කළ පළමු මුස්ලිම් ටෙස්ට් ක්රීඩකයා වන 39 හැවිරිදි කවාජා, ක්රිකට් ක්රීඩාව තුළ පවතින “සුදු ආධිපත්යය” සහ බහු සංස්කෘතික ප්රජාවන්ට ඇති බාධාවන් ගැන විවෘතව කතා කළේය.
2023 දී ක්රිකට් ඕස්ට්රේලියා (CA) හඳුන්වා දුන් බහු සංස්කෘතික වැඩසටහනට ඔහු ප්රධාන දායකත්වයක් ලබා දුන්නේය. පසුගිය කාලසීමාවේදී දේශපාලන සහ මානව හිමිකම් ප්රශ්න සම්බන්ධයෙන් (පලස්තීන අර්බුදය වැනි) තම මතය ප්රකාශ කිරීම නිසාද උස්මන් කවාජා දැඩි විවේචනයට ලක් විය.
ක්රිකට් ක්රීඩාව වසර 15කට පෙර තිබූ තත්ත්වයට වඩා අද යහපත් මට්ටමක පවතින බව පිළිගන්නා කවාජා, තම අරමුණ පැහැදිලි කළේය. “මගේ බලාපොරොත්තුව ඊළඟට පැමිණෙන ‘උස්මාන් කවාජා’ කෙනෙකුට ඇති ගමන ‘ජෝන් ස්මිත්’ කෙනෙකුට වැනිම සමාන සහ පහසු එකක් බවට පත් කිරීමයි.”
කවාජා පැවසුවේ ක්රීඩකයෙකු ලෙස පමණක් නොව, ක්රිකට් ක්රීඩාව තුළ සමාජ සාධාරණත්වය සහ විවිධත්වය වෙනුවෙන් පෙනී සිටි පුද්ගලයෙකු ලෙස තමන්ව මතකයේ තබා ගනු ඇතැයි බලාපොරොත්තු වන බවය.
ක්රිකට් ඕස්ට්රේලියා ප්රධාන විධායක නිලධාරී ටොඩ් ග්රීන්බර්ග් ද කවාජාගේ අදහස් අනුමත කරමින් කියා සිටියේ, ක්රීඩාව තුළ සහ ප්රජාව තුළ තවදුරටත් වෙනස්කම් සිදු කිරීමට ඇති බවත්, ඒ සඳහා කවාජා විශාල කාර්යභාරයක් ඉටු කර ඇති බවත්ය.
