සුදුස්සන් එළියේ තබා වෛද්‍ය පරිපාලන තනතුරු නුසුදුස්සන්නට ලබා දීමේ GMOA ප්‍රයත්නයට එරෙහිව සහෝදර වෛද්‍යවරුන්ගේ හා සෙසු සියලුම සෞඛ්‍ය වෘත්තීය සමිති දැනුවත් කරමින් විරෝධතාවයක් ගොඩනගන අතර තම වෘත්තීය අයිතීන් වෙනුවෙන් අධිකරණයවෙත යෑමට වෛද්‍ය පරිපාලනය පිළිබඳ විශේෂඥ වෛද්‍යවරු සූදානම් වෙති.
සුදුසුකමට සරිලන රැකියාවක් ඉල්ලා විශේෂඥ වෛද්‍යවරුන් පිරිසකට අධිකරණයට යෑමට සිදු වී ඇත්තේ ඉතිහාසයේ මුල්ම වරට බව මේ පිළිබඳ අදහස් දක්වන වෛද්‍ය පරිපාලනය පිළිබඳ විශේෂඥ වෛද්‍යවරු පෙන්වා දෙති.
දශක තුනකට ආසන්න කාල සීමාවක් තුළ පරිපාලන විෂය පථයට අදාළෙව විශේෂඥ පුහුණුව ලත් වෛද්‍යවරුන් රෝහල් පරිපාලන ශ්‍රේණිය සඳහා අනුයුක්ත කිරීම සම්බන්ධව මෙතෙක් පැවති විෂමතා නිවැරදි කරමින් රාජ්‍ය සේවා කොමිෂන් සභාවේ උපදෙස් පරිදි සෞඛ්‍ය ඇමතිවරිය විසින් පසුගිය දා ප්‍රකාශයට පත් කළ නව වෛද්‍ය සේවා ගැසට් පත්‍රයට එරෙහිව රජයේ වෛද්‍ය නිලධාරීන්ගේ සංගමය දිගින් දිගටම කරන ලද බලපෑම්වලට යටත්ව එය වෙනස් කරන්නේ නම් එසේ එල්ලවන්නේ වෛද්‍ය පරිපාලනයේ අනාගතයට මරු පහරක් බව ද වෛද්‍ය පරිපාලන විශේෂඥ වෛද්‍යවරු කියා සිටිති.
“ සාමාන්‍යයෙන් ඕනෑම රටක පශ්චාත් උපාධියක් ලත් වෛද්‍යවරුන් එම විෂය පථයට අදාල තනතුරුවල පිහිටුවීම සිදු කරනවා. ලංකාවෙ දැනට දශක ගණනාවක සිට පැවතෙන පැරණි වෛද්‍ය සේවා ව්‍යවස්ථාවට අනුව රෝහල් පරිපාලන විෂය පථය සම්බන්ධව නිසි ඇගයීමක් වෙලා නෑ. ඒ හින්දා නිසි දැනුමක් හෝ අධ්‍යයනයක් නැති පුද්ගලයන් වෛද්‍ය පරිපාලන තනතුරුවලට ඇතුළත් වීමේ ක්‍රමවේදයක් පැවතුනා. ඒ වකවානුවෙ වෛද්‍ය පරිපාලනය වෙනම විෂයයක් විදිහට තිබුණෙ නෑ. ඒත් 1996 සිට වෛද්‍ය පරිපාලනය පශ්චාත් වෛද්‍ය උපාධි ආයතනය විසින් විශේෂඥ වෛද්‍ය උපාධියක් ලෙස පිළිගත්තා. මේ නිසා වෛද්‍ය පරිපාලන විෂය සම්බන්ධව සෛද්ධාන්තික සහ ප්‍රායෝගික පුහුණුවක් සහිත විශේෂඥ වෛද්‍යවරු පිරිසක් බිහි උනා. එවැනි විශේෂ වෛද්‍යවරු 150 දෙනෙක් පමණ දැන් ඉන්නවා සුදුසුකමට සරිලන රැකියාවක් නැතිව.“
“ඒ අතරෙ තම විෂය පථයට අදාළව අධ්‍යාපනයක් හා ප්‍රායෝගික පුහුණුවක් ලත් වෛද්‍ය පරිපාලන වෛද්‍යවරුන් එළියේ සිටියදී වෙනත් ක්ෂේත්‍ර සංවර්ධන සඳහා පුහුණු කළ වෙනත් පශ්චාත් උපාධිධාරීන් වෛද්‍ය පරිපාලනයට පත්කරගන්න රජයේ වෛද්‍ය නිලධාරීන්ගේ සංගමයම උත්සාහ කරනවා. ඛේදවාචකය තිබෙන්නෙ මෙතැන…
මේ වනවිට වෛද්‍ය පරිපාලන පුරප්පාඩු තනතුරු වලට ඇතුළත් වීමේ අවස්ථාවන් මගහැරීම නිසා රෝහල් පරිපාලන විෂය පථය පිළිබඳව විශේෂ අධ්‍යාපනය ලත් වෛද්‍යවරුන් රැසක් රාජ්‍ය සේවා කොමිෂන් සභාවේ අනුමැතිය නොමැතිව සෞඛ්‍ය අමාත්‍යංශයේ අවශ්‍යතාවය මත වැඩබලන තනතුරුවල රැඳී ඉන්නවා. අපි වසර ගණනාවක් තිස්සේ කාලය ධනය සහ ශ්‍රමය කැප කරලා ඉගනගත්තු විෂය පථයන් ගෙන් රටටවත් අපිටවත් වැඩක් නෑ… “වෛද්‍ය පරිපාලනය පිළිබඳ විශේෂඥ වෛද්‍යවරයෙක් පවතින තත්වය විග්‍රහ කරමින් ලංකාසරට පැවසීය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මේ තත්ත්වයන් සලකා බලා අලුතින් ඉදිරිපත් කරන ලද සේවා ව්‍යවස්ථාව ක්‍රියාත්මක කරනු වෙනුවට රජයේ වෛද්‍ය නිලධාරීන්ගේ සංගමයේ නියෝජිතයන් සමාජ මාධ්‍ය වල ප්‍රකාශ කරන පරිද්දෙන් නව සේවා ව්‍යවස්ථා ගැසට් නිවේදනය වෙනස් කිරීමට හෝ ඉවත් කිරීමට සෞඛ්‍ය අමාත්‍යාංශයේ ඉහළ පරිපාලකයන් සූදානම් වන්නේ නම්, තමන්ගේ සාධාරණ වෘත්තීය අයිතීන් වෙනුවෙන් තමන්ගේ වෘත්තීය සමිතිය වන රජයේ වෛද්‍ය නිලධාරීන්ගේ සංගමය ක්‍රියාත්මක නොවන්නේ නම්. මේ සම්බන්ධයෙන් ඉදිරියේදී අධිකරණමය ක්‍රියාමාර්ග ලබාගැනීමට බලාපොරොත්තු වන බව විශේෂඥ වෛද්‍ය පරිපාලක වෛද්‍යවරු පෙන්වා දෙති.