ශ්‍රී ලංකා ක්‍රිකට් ආයතනයේ ප්‍රධාන පුහුණුකරු ලෙස චන්දික හතුරුසිංහ බඳවා ගැනීමට අදාළ ගිවිසුම දෝෂ සහිත වීම හේතුවෙන් නෛතික ක්‍රියාමාර්ග ගැනීම සඳහා මේවන විට වියදම් කර ඇති මුදල රුපියල් මිලියන 30 ක් බව ශ්‍රි ලංකා ක්‍රිකට් ආයතනයේ ගිණුම් පිළිබඳව විමසා බැලුණු පොදු ව්‍යාපාර ගිණුම් පිළිබඳ පාර්ලිමෙන්තු කාරක සභාවේදී (කෝප් කමිටුවේදී) හෙළි විය.
ශ්‍රි ලංකා ක්‍රිකට් ආයතනයේ නිලධාරීන් අඟහරුවාදා (06) කෝප් කමිටුව හමුවට කැඳවන ලද අතර එහිදී තවත් මූල්‍ය කළමනාකරණයේ දෝෂ සහිත තැන් ගණනාවක්දම එම කමිටුවේ විමර්ශනයට ලක් විය.
කෝප් කමිටු සභාපති මන්ත්‍රි අචාර්ය චරිත හේරත්ගේ ප්‍රධානත්වයෙන් රැස්වු මෙම කමිටුවේදී හෙළි වූ පරිදි 2019 වසරේ මූල්‍ය ප්‍රකාශනවලට පැවැති උපචිත වියදම් රුපියල් එක් කෝටි අසූ අට ලක්ෂ පනස් හත් දහස් දාසයක් (1,88,57,016) ක් හා ගෙවිය යුතු ශේෂවල ඇතුළත් ක්‍රීඩාංගන ණය හිමියෝ දෙකෝටි හැට හය ලක්ෂ (2,66,64,834) ක් හා වෙනත් ගෙවිය යුතු ශේෂ රුපියල් තුන්කෝටි අසූ එක් ලක්ෂ පනස් දෙදහස් හයසි හයක් (3,81,52,606) ක් සහ වෙනත් ණය ගැතියෝ රුපියල් නව ලක්ෂ තිස් හත් දහස් හයසිය හතලිස් පහක් (9,37,645) ක් මූලාශ්‍ර ලියවිලි නොමැති වීම හේතුවෙන් 2020 වසරේදී ගිණුම් වලින් කපා හැර තිබීම සම්බන්ධයෙන් කෝප් කමිටුව ශ්‍රී ලංකා ක්‍රිකට් ආයතනයට දෝෂාරෝපණය කළේය.
මීට වගකිව යුතු නිලධාරීන් ඇතුළු අදාළ පාර්ශ්ව වෙනුවෙන් කඩිනමින් නෛතික ක්‍රියාමාර්ග ගත යුතු බවටද කාරක සභාව නිර්දේශ කළේය.
පොළොන්නරුව හිඟුරක්ගොඩ ප්‍රදේශයේ ජාතික ක්‍රිකට් ක්‍රීඩාංගණයක් සහ බහු ක්‍රීඩා සංකීර්ණයක් ඉදි කිරීම වෙනුවෙන් මේ වන විට රුපියල් මිලියන 132 ක් වියදම් කර තිබුණද ඊට අදාළ ඉඩම සඳහා මෙතෙක් හිමිකම් ඔප්පුවක් ලබා නොගැනීම සම්බන්ධව කාරක සභාවේ විශේෂ අවධානය යොමු විය.
කඩිනමින් එම ගැටලුව විසඳා ගැනීමට පියවර ගන්නා ලෙස කාරක සභාව ක්‍රීඩා අමාත්‍යාංශයට දැන්වීය. මෙවැනි කාරණා මඟින් පෙනී යන්නේ ශ්‍රී ලංකා ක්‍රිකට් ආයතනයේ අවධිමත් වැඩපිළිවෙළ බව ද කාරක සභාවේ සභාපතිවරයා කීවේය.
ක්‍රිඩා අමාත්‍යාංශය විසින් පත් කරන ලද අතුරු කමිටුවේ කාල සීමාව තුළ අදාළ බලධාරීන්ගේ අනුමැතිය නොලැබුණු රුපියල් මිලියන 26 ක් අගය වූ ව්‍යාපෘති 04 ක් ශ්‍රී ලංකා ක්‍රිකට් ආයතනය අතහැර දමා තිබෙන බවද කාරක සභාවේදී අනාවරණය විය.
2015 වසරේ සිට 2019 වසර දක්වා වූ කාල පරිච්ඡේදයකට අදාළ රු. 10,292,337 ක් වූ තරඟ අත්තිකාරම් සහ 2007,2008,2016 හා 2017 යන වසරවල ක්‍රිකට් සංගම්වලට දෙන ලද රු.7,764,050 ක ඉදිකිරීම් අත්තිකාරම් නිරවුල් කිරීමකින් තොරව දිගින් දිගටම පවත්වා ගෙන යාම සම්බන්ධයෙන් ද කාරක සභාවේ විශේෂ අවධානය යොමු විය.
එමෙන්ම 2014,2015,2016 සහ 2017 වසර වලට අදාළ එකතුව රු. 18,785,305 ක් වූ ගෙවිය යුතු ණය හිමි ගිණුම් 69 ක් 2020 වසරේදී මූල්‍ය ප්‍රකාශන වලින් කපා හැර තිබීම සම්බන්ධයෙන් ද කාරක සභාවේදී අනාවරණය විය. මේ පිළිබඳව වහාම සොයා බලන ලෙස ද කාරක සභාවේ සභාපති පාර්ලිමේන්තු මන්ත්‍රී මහාචාර්ය චරිත හේරත් ක්‍රීඩා අමාත්‍යාංශයේ ලේකම්වරයාට දැනුම් දුන්නේය.
දේශීය ක්‍රීඩා පිටි සහ ජාත්‍යන්තර ක්‍රිකට් ක්‍රීඩාංගන ඉදි කිරීම සහ වැඩිදියුණු කිරීම සඳහා 2010 වසරේ සිට පැවැත එන රු.මිලියන 16 ක් වූ අත්තිකාරම් ගෙවීම් ගිණුම් ශේෂ 01 ක් 2020 වසරේ වසරේ ගිණුම්වලින් කපාහැර තිබීම සම්බන්ධයෙන් ද කාරක සභාව සිය නොසතුට පළ කළේය.
ප්‍රසම්පාදන මාර්ගෝපදේශ නිසි පරිදි ක්‍රියාත්මක නොකිරීම හේතුවෙන් ශ්‍රී ලංකා ක්‍රිකට් ආයතනයේ මෙවැනි ගැටලු රැසක් මතුව ඇති බවත්, පිළිගත් රාමුවක් තුළ ආයතනය ක්‍රියාත්මක විය යුතු බවත් කාරක සභාවේ මතය විය.
මෙම කාරක සභා රැස්වීමට ක්‍රීඩා අමාත්‍යාංශයේ නිලධාරීහු මෙන්ම ශ්‍රී ලංකා ක්‍රිකට් ආයතනයේ නිලධාරිහු ද සහභාගි වූහ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මෙම රැස්වීමට සහභාගී වීමට ශ්‍රී ලංකා ක්‍රිකට් විධායක කමිටුවේ හිටපු නිලධාරීන් කිහිප දෙනෙක් ද පාර්ලිමේන්තු පරිශ්‍රයට පැමිණ සිටියද ඔවුන්ගේ ධූර කාලය සඳුදා (05) අවසන් වීම හේතුවෙන් එම නිලධාරීන් රැස්වීමට සහභාගී කර නොගැනිණි.