රුසියානු වෛද්‍ය විශ්ව විද්‍යාල තුනකින් පිරිනමන වෛද්‍ය විද්‍යාව උපාධිය මෙරට තුළ පිළිනොගැනීමට ශ්‍රී ලංකා වෛද්‍ය සභාව ගත් තීරණය අත්වැරැද්දකින් සිදු වූ බවට අද සවස ශ්‍රී ලංකා වෛද්‍ය සභාවේ සභාපති මහාචාර්ය හරේන්ද්‍ර ද සිල්වා මහතා විසින් කරන ලද ප්‍රකාශය පිළිබඳ එම සභාවේම ඇතැම් සාමාජිකයන් විමතිය පළ කරති. මහාචාර්යවරයා එහිදී සඳහන් කළේ මෙම අත්වැරැද්ද නිවැරදි කිරීමට කටයුතු කරන බව සහ අවසන් තීරණය අමාත්‍යවරයා විසින් ගනු ලබන බවය.
රුසියානු රජය මගින් මෙරට සිසුන්ට නොමිලේ ශිෂ්‍යත්ව පිරිනමන සුප්‍රකට ලුලුම්බා සරසවිය, නිරෝගොව් රුසියානු ජාතික පර්යේෂණ වෛද්‍ය විශ්ව විද්‍යාලය, වර් රාජ්‍ය විශ්ව විද්‍යාලය යන මෙම වෛද්‍ය විශ්ව විද්‍යාල තුලින් පිරිනමන වෛද්‍ය විද්‍යා උපාධිය මේ අනුව පිළිනොගැනීමට වෛද්‍ය සභාව තීරණය කර තිබිණි.
මේ පිළිබඳ පුළුල් කතාබහක් නිර්මාණය වූ අතර මීට ප්‍රතිචාර දැක්වූ රුසියානු තානාපති කාර්යාලය පසුගිදාය මෙම තීරණය පිළිබඳ තම නොසතුට පළ කළේය.
මේ පිළිබඳව නිවේදනයක් නිකුත් කළ රුසියානු තානාපති කාර්යාලය ප්‍රකාශ කළේ ශ්‍රී ලංකා වෛද්‍ය සභාව රුසියානු විශ්වවිද්‍යාල බලධාරින් බලධාරීන් සමඟ සාකච්ඡා කරන අතරතුර මේ ආකාරයෙන් කිසිදු පූර්ව දැනුම් දැනුම් දීමකින් තොරව රුසියානු විශ්වවිද්‍යාලය 3 ක වෛද්‍ය විද්‍යාව උපාධි පිරි නොගැනීමට තීරණය කර ඇති බවයි.
වසර 50 ක පමණ කාලයක් තිස්සේ රුසියාව හා ශ්‍රී ශ්‍රි ලංකාව අතර පවතින සබඳතා මත මෙම ශිෂ්‍යත්ව පිරිනමන බවත් ශ්‍රී ලංකාවේ වෛද්‍ය ශිෂ්‍යයන් ඇතුළු වෛද්‍ය ශිෂ්‍යයන් ගණනාවකට පූර්ණ ශිෂ්‍යත්ව ලබා දෙන බවද එහි වැඩිදුරටත් සඳහන් කර තිබුණි .
මේ පිළිබඳව ශ්‍රී ලංකා වෛද්‍ය සභාවේ ලේඛකාධිකාරී වෛද්‍ය ආනන්ද හපුගොඩ මහතාගෙන් ලංකාසර කළ විමසීමකදී ඔහු සඳහන් කළේ මෙම විශ්ව විද්‍යාල පාඨමාලා අන්තර්ගතය ශ්‍රී ලංකාවේ නවතම සෞඛ්‍ය පරාමිතීන් සමඟ නොගැලපෙන හෙයින් වෛද්‍ය විශේෂඥයන්ගෙන් සමන්විත ශ්‍රී ලංකා වෛද්‍ය සභාවේ විදේශ අධ්‍යයන කමිටුව මගින් වාර්ෂිකව සිදු කරනු ලබන ඇගයීම් ක්‍රියාවලියේ දී මෙම රුසියානු විශ්වවිද්‍යාල ත්‍රිත්වය ලබාදෙන වෛද්‍ය උපාධිය මෙරට පිළිනොගැනීමට නිර්දේශකර තිබු බවය.
එම නිර්දේශය සම්බන්ධයෙන් ශ්‍රී ලංකා වෛද්‍ය සභාව සාකච්ඡා කොට එහි බහුතර සාමාජිකයන් ඊට එකඟතාව පළ කළ බව ඔහු පැවසීය.
එසේ වුව ද මෙම තීරණය සම්බන්ධයෙන් පසුගිය දින දෙක තුළ රට තුළ විවිධ අදහස් ද පැන නැගුණු අතර ඊයේ සවස සිරස නිවුස් ෆස්ට් වෙත ප්‍රකාශයක් දෙමින් ශ්‍රී ලංකා වෛද්‍ය සභාවේ සභාපති මහාචාර්ය හරේන්ද්‍ර ද සිල්වා පැවසුවේ මෙය අත්වැරැද්දකින් සිදු වූ දෙයක් බැවින් එය වහා යළි සකස් කිරීමට කටයුතු කරන බවයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වුවද වුවද මහාචාර්ය වරයාගේ මේ හදිසි ප්‍රකාශය සම්බන්ධයෙන් විමතිය පළ කළ ශ්‍රී ලංකා වෛද්‍ය සභාව නියෝජනය කළ වෛද්‍යවරයෙක් සඳහන් කළේ එය කිසිසේත් අත්වැරැද්දකින් නොවන ඉතා පුළුල් ලෙස ඇගයීමට ලක් කොට ගත් තීරණයක් බවයි.