යුක්රේනයේ කුපියැන්ස්ක් විශ්ව විද්‍යාලයේ වෛද්‍ය විද්‍යාව හදාරමින් සිටියදී රුසියානු හමුදා ග්‍රහණයට හසු වූ ශ්‍රි ලාංකික සිසුන් හත් දෙනෙකු එරට කාර්කිව් ප්‍රදේශයේදී මුදාගත් බව යුක්රේන ජනාධිපති වොලොද්මීර් සෙලෙන්ස්කි පවසා ඇති බව විදේස මාධ්‍ය සඳහන් කරයි.
පසුගිය මාර්තු මාසයේ සිට ඔවුන් රුසියානු හමුදා විසින් රඳවාගනු ලැබ සිට ඇතැයි ද යුකරේන ජනාධිපතිවරයා සඳහන් කර ඇත. යුක්රේන ජනාධිපතිවරයා අනාවරණය කරන පරිදි මෙම සිසුන් පසුගිය මාර්තු මාසයේදී ඔවුන් රුසියානු සොල්දාදුවන් විසින් අල්ලාගෙන පසුව පහළම මාලයක තබා ඇත.
“කාර්කිව් ප්‍රදේශය මුදාගැනීමෙන් පසුව තමයි මේ අය බේරා ගත්තේ. ඔවුන්ට නිසි වෛද්‍ය ප්‍රතිකාර ලබා දෙනවා,” ජනාධිපති සෙලෙන්ස්කි උපුටා දක්වමින් Ukraynska Pravda වාර්තා කර ඇත.
සැප්තැම්බර් 15 වැනි දින, යුක්රේනයේ නියෝජ්‍ය අභ්‍යන්තර කටයුතු අමාත්‍ය, යෙව්හෙන් යෙනින් වාර්තා කළේ, සාමකාමී විදේශීය සිසුන් වූ ආසියාතික රටක පුරවැසියන් යුක්රේන රජය විසින් පාලනය කරනු ලබන භූමියට යාමට උත්සාහ කළ නමුත් රුසියානු හමුදා නිලධාරීන් විසින් ඔවුන්ව නවතා, නීති විරෝධී ලෙස රඳවා තබාගෙන, වධහිංසා පමුණුවනු ලැබූ බවයි.
යුක්රේනයේ ජාතික පොලිස් ප්‍රධානී ඉහෝර් ක්ලිමෙන්කෝ පැවසුවේ, කාර්කිව් ප්‍රදේශයේ යළි අත්පත් කරගත් නගර සහ ගම්වල “වධකාගාර” සොයාගෙන ඇති බවයි. එසේම මෙම ප්‍රෙද්ශවල සමූහ මිනීවළවල් දක්නට ඇති බවටද වාර්තා කර ඇත. ශ්‍රි ලාංකික සිසුන් හත් දෙනාද මෙසේ රඳවාගෙන හිරිහැර කළ බව පවසා ඇති බව යුක්රේන ජනාධිපතිවරයා පවසා ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වුවද මේ පිළිබඳව විදේශ අමාත්‍යංශය මෙතෙක් කිසිදු නිල ප්‍රකාශයක් නිකුත් කොට නැත.