අමායා උඩුවැරැල්ල –
ගාසා තීරයේ අවසන් හමාස් බලකොටුව ලෙස සැලකෙන රෆා නගරය යටත් කර ගැනීමට ඊශ්‍රායල හමුදාව අවශ්‍ය සියලු සූදානම් කිරීම් සිදු කර ඇති අතර රජයේ අනුමැතිය ලැබුණු මොහොතේම මෙහෙයුමක් දියත් කළ හැකි බව ඊශ්‍රායල ජ්‍යෙෂ්ඨ ආරක්ෂක නිලධාරියෙක් විසින් අද විදෙස් මාධ්‍ය වෙත ප්‍රකාශ කර තිබෙනවා.
ඊශ්‍රායල ආරක්ෂක බලකාය (IDF) මගින් අද උදෑසන නිකුත් කල නිවේදනයක ද ඔවුන්ගේ 99 වන සේනාංකයේ අණ යටතේ ගාසා තීරයේ ආරක්ෂක සහ ප්‍රහාරක මෙහෙයුම් දිගටම කරගෙන යාම සඳහා බලකායන් දෙකක් බඳවා ගත් බව සඳහන් වනවා.
මානුෂීය ව්‍යසනය පිළිබඳ ජාත්‍යන්තර අනතුරු ඇඟවීම් නොතකා, ඊශ්‍රායල හමුදාව, රෆා නගරය වෙතින් පලස්තීන සිවිල් වැසියන් ඉවත් කර ගැනීමට ද සූදානම් වන අතර ඊශ්‍රායල ආරක්ෂක අමාත්‍යාංශය ප්‍රහාරයකට පෙරාතුව රෆා නගරයේ සිට නැවත පදිංචියට යන පලස්තීනුවන්ට නවාතැන් ගැනීම සඳහා පුද්ගලයන් 10 දෙනෙකු සිට 12 දෙනෙකු දක්වා සිටිය හැකි කූඩාරම් 40,000 ක් පමණ මිලදී ගෙන ඇති බව ද වාර්තා වනවා.
අන්තර්ජාලයේ සංසරණය වන වීඩියෝ පටයක රෆා නගරයේ සිට කිලෝමීටර් 5ක් පමණ දුරින් පිහිටි ඛාන් යූනිස් නගරයේ හතරැස් සුදු කූඩාරම් පේළියක් පෙන්නුම් කරන බවත් එම කූඩාරම් සහිත ඉඩම මීට සති කිහිපයකට පෙර හිස් ව තිබූවක් බවත් විදෙස් මාධ්‍ය වාර්තා කර තිබෙනවා.
ඊශ්‍රායල රජයේ මූලාශ්‍රයක සඳහන් වන්නේ මාසයක් පමණ ගතවනු ඇතැයි අපේක්ෂා කරන සිවිල් වැසියන් ඉවත් කිරීමට අවසර දීම සඳහා නෙතන්යාහුගේ යුද කැබිනට් මණ්ඩලය ඉදිරි සති දෙක තුළ රැස්වීමට සැලසුම් කර ඇති බවයි.
හමාස් සංවිධානය මේ දක්වා ඒ සම්බන්ධයෙන් අදහස් දක්වා නැත. යුද්ධයේ 200 වැනි දිනය සනිටුහන් කරමින් අඟහරුවාදා දිනයේ කළ කතාවක දී හමාස් සන්නද්ධ අංශයේ ප්‍රකාශක අබු උබයිඩා කියා සිටියේ මේ දක්වා ඊශ්‍රායලය අත් කර ගෙන ඇත්තේ නින්දාව සහ පරාජය පමණක් බවයි. ඊශ්‍රායල ගණන් බැලීම්වලට අනුව පසුගිය ඔක්තෝබර් 7 වැනිදා හමාස් සංවිධානය විසින් පුද්ගලයන් 1200 ක් පමණ ඝාතනය කර පුද්ගලයන් 250 කට ආසන්න සංඛ්‍යාවක් පැහැරගෙන ගොස් තිබුනා. එම ප්‍රාණ ඇපකරුවන්ගෙන් 129 දෙනෙකු පමණ ගාසා තීරයේ රැඳී සිටින බව ඊශ්‍රායල බලධාරීන් පවසනවා. එමෙන්ම පසුගිය ඔක්තෝබර් 20 වන දා සිට ඊශ්‍රායල හමුදා භටයන් 260 කට වැඩි පිරිසක් ගොඩබිම් සටන් වලින් මිය ගොස් ඇති බව සඳහන් වනවා.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
රෝයල් යුනයිටඩ් සර්විසස් ආයතනයේ ජාත්‍යන්තර ආරක්ෂක අධ්‍යයනයන්හි ජ්‍යෙෂ්ඨ සහායකයකු වන එච්.ඒ. හෙලියර් පවසන පරිදි ප්‍රාණ ඇපකරුවන් මුදාගැනීමේ සහ හමාස් සාමාජිකයන් මරා දැමීමේ ප්‍රකාශිත අරමුණු ඉටුකර ගැනීම සම්බන්ධයෙන් නෙතන්යාහු පීඩනයට ලක්ව සිටින නිසා රෆා නගරයට පහරදීම ඉක්මනින් බලාපොරොත්තු වන බවයි. එසේම හමුදාව රෆා නගරය වෙත යැවුවහොත්, බොහෝ ජීවිත හානි සිදුවනු ඇති බවත් ඔහුගේ ප්‍රකාශයේ සඳහන්. කෙසේ වෙතත් මේ සම්බන්ධව අදහස් දක්වමින් ඊජිප්තුව පවසා ඇත්තේ රෆා නගරය වෙත ගමන් කිරීමට එරෙහිව ඔවුන් ඊශ්‍රායලයට අනතුරු ඇඟවූ බවයි. ඊජිප්තුවේ රාජ්‍ය තොරතුරු සේවය පවසන්නේ එවන් පියවරකින් දැවැන්ත මිනිස් සංහාරයක් සහ පුලුල් විනාශයක් සිදුවනු ඇති බවයි.