කොළඹ වරායට වයඹ දෙසින් නාවික සැතපුම් 9.5ක් දුර මුහුදේ නැංගුරම් ලා තිබූ රසායනික ද්‍රව්‍ය සහිත X-PRESS PEARL නැමති භාණ්ඩ ප්‍රවාහන නෞකාවේ ඊයේ (20) දිවා කාලයේ ඇති වූ ගින්න නිවා දැමීමට ශ්‍රී ලංකා නාවික හමුදාව මෙහෙයුමක් අරඹා තිබේ.
ගින්න පිළිබඳ ලද තොරතුරකට අනුව වහාම ප්‍රතිචාර දැක්වූ නාවික හමුදාව, එම මුහුදු ප්‍රදේශය වෙත ශ්‍රී ලංකා නාවික නෞකා සාගර සහ සිඳුරළ යන ගැඹුරු මුහුදු නිරීක්‍ෂණ නෞකා 02 සහ වේග ප්‍රහාරක යාත්‍රාවක් පිටත් කර හැරීමට කටයුතු කර තිබිණි.
මේ වන විට වරාය අධිකාරියට අයත් ටග් යාත්‍රාවක් (01) ද මෙම මුහුදු ප්‍රදේශයේ නෞකාවේ ඇති වී තිබෙන ගින්න පාලනය සඳහා යොදවා ඇත.
සිංගප්පූරු ධජය යටතේ ලියාපදිංචි වී ඇති මෙම නෞකාව 2021 මැයි මස 15 වන දින ඉන්දියාවේ හසීරා වරායේ සිට නයිට්‍රික් ඇසිඩ් (Nitric acid) ටොන් 25ක් සමඟ වෙනත් රසායනික ද්‍රව්‍ය සහ රූපලාවන්‍ය ආලේපන ද්‍රව්‍ය සහිත බහාලුම් 1486ක් රැගෙන යාත්‍රා කර තිබේ.
නෞකාව 2021 මැයි මස 19 වන දින කොළඹ වරාය ආසන්නයට පැමිණ වරාය වෙත ඇතුළු වීම සඳහා නාවික සැතපුම් 9.5ක් දුර මුහුදේ නැංගුරම් ලා තිබියදී මෙම ගින්න හටගෙන ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
නෞකාවේ කාර්ය මණ්ඩලය පිලිපීන, චීන, ඉන්දීයනු සහ රුසියානු ජාතිකයින් 25ක ගෙන් සමන්විත වේ.
ඊයේ සවස් කාලයේ ශ්‍රී ලංකා වරාය අධිකාරියේ සහ ශ්‍රී ලංකා නාවික හමුදා විශේෂඥයින්ගෙන් සමන්විත කණ්ඩායමක් නෞකාවට ඇතුළුවී එහි තත්වය පරීක්‍ෂා කරන ලද අතර, නෞකාවේ ප්‍රවාහනය කරමින් තිබූ රසායනික ද්‍රව්‍ය කාන්දු වීමෙන් සිදුවූ යම් ප්‍රතික්‍රියාවක් හේතුවෙන් මෙම ගිනි ගැනීම ඇති වී ඇති බවට සැක කෙරේ.
තවද, හදිසි අවස්තාවකදී ක්‍රියාත්මක වීම සඳහා නාවික හමුදා විශේෂ කණ්ඩායම් සහ වෙරළාරක්‍ෂක දෙපාර්තමේන්තුව සූදානමින් සිටින අතර මේ වන විට ශ්‍රී ලංකා වරාය අධිකාරියේ ටග් යාත්‍රා ගින්න පාලනය කරමින් සිටී.
