රංජිත් රාජපක්ෂ –
- අම්මා එක්ක දර කඩන්න ගියා…. අම්මව මග හැරුණා…
- රක්ෂිතය මැද්දෙ පාරවල්වල ඇවිද්දා… යන එන මං නොදැන අතරමං වුනා…
- රෑට එක තැනකට වෙලා හිටියා. මහ වැස්ස සිතල දරා ගත්තා… පුලුවන් වෙලාවට කෑ ගැහුවා… හොයාගත්තෙ කෑ ගහන සද්දෙට…
සිය මව සමග නුවරඑලිය ඩන්සිනන් රක්ෂිතයට දර කැඩිමට ගොස් අතුරුදහන්වූ 26 හැවිරිදි තරුණිය නුවරඑලිය කිකිලියාමාන රක්ෂිතයේ අතරමංව සිටියදි දින පහකට පසු සොයාගත් බව නුවරඑලිය පොලිසිය පවසයි.
මෙසේ සොයාගනු ලැබුවේ නුවරඑලිය වත්තපහල කොටසේ පදිංචි ජෙයබාලන් කර්පුගධාරණි නැමති (26) හැවිරිදි තරුණියයි.
අතුරුදහන්ව සිටි තරුණිය ඉකුත් (05) දින සිය මව සමග නුවරඑලිය ඩන්සිනන් රක්ෂිතයට දර සෙවිමට ගිය අවස්තාවේ තරුණිය රක්ෂිතය තුළදී අතුරුදහන් විය.
නුවරඑලිය යුධ හමුදා කදවුරේ නිලධාරින්, නුවරඑලිය පොලිසියේ නිලධාරින් සහ ඩන්සිනන් වතු යායේ වතු කම්කරුවන් (05) දින සිට දින පහක් තිස්සේ පැය 96 ක් අතුරුදහන් තරුණිය සොයා මෙහෙයුමක් ආරම්භ කළහ.
යුද හමුදා නිලධාරින් රක්ෂිතය අසල ගම්මානවල පදිංචිකරුවන්ද දැනුවත් කර තිබිම හේතුවෙන් එම තරුණිය සොයා නුවරඑලිය ශාන්තිපුර ප්‍රදේශවාසින් නුවරඑලිය කිකිලියාමාන රක්ෂිතයේ සිදු කළ මෙහෙයුමකදි එම තරුණිය රක්ෂිතය තුළ කැගසමින් සිටියදී සොයගෙන ඇත.
දින ගණනාවක් නිරආහාරව කුසගින්නේ සිට ඇති එම තරුණියට ගම්වාසින් විසින් ආහාරපාන ලබා දි පසුව නුවරඑලිය යුද හමුදා කඳවුරේ නිලධාරින්ට සහ නුවරඑලිය පොලිසියේ නිලධාරින්ට භාර දි ඇත.
අතුරුදහන්ව සිටි තරුණිය කියා සිටින්නේ ඩන්සිනන් රක්ෂිතයේ මව සමග දර කැඩිමට ගිය අවස්තාවේ සිය මව මග හැරුණු බවත්, ඉන් අනතුරුව රක්ෂිතයේ මාර්ගවල කිහිපයක ගමන් කළ තමන් අතරමං වු බවයි.
මහා වරුසාව සහ සීතල දරාගත් බවත් රාත්‍රි කාලයේ රක්ෂිතය තුළ එක් තැනකට වි සිටි බවයි එම තරුණිය සිටියාය. පුලුවන් වෙලාවට කෑ ගැසූ බවත් ඇය කීවාය.
රක්ෂිතයේ අතරමංව සිට සොයාගත් තරුණිය නුවරඑලිය මහ රෝහල වෙත ඇතුළත් කර ඇති අතර, සිද්ධිය සම්බන්ධයෙන් නුවරඑලිය පොලිසිය අංශ කිහිපයක් ඔස්සේ පරික්ෂණ පවත්වයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
ලංකාදීප –