ජෛව ආරක්ෂක බුබුල බිඳ දමා තමන් නවාතැන්ගෙන සිටි ඩරම් හී රැඩිසන් බ්ලූ හෝටල් පරිශ්‍රයෙන් පිටත පැමිණ අයාලේ ගිය ශ්‍රී ලාංකික ක්‍රීඩකයන් තිදෙනා විසින් ඇතිකළ අනාරක්ෂිත තත්වය නිසා මුළු තරගාවලියම වියවුලකට පත් කර ඇති බවත් මේ සිදුවීම සම්බන්ධව එංගලන්තය පාර්ශවයෙන් පුද්ගලිකව සිය අප්‍රසාදය වී ඇති බවත් වාර්තා වේ.
ලංකාව තුළ බිහිසුණු ඉන්දියානු කොවිඩ් ප්‍රභේද පැතිරයන අවස්ථාවක කිසිම යුරෝපීය රටකට ලාංකිකයන්ට ඇතුළුවීමේ අවසර නොලැබෙන තත්වයක් තුළ ජෛව ආරක්ෂක බුබුලක ක්‍රීඩා කිරීමට අවස්ථාව සලසා දීම අන්තර්ජාතිකව ලැබුණු වැදගත් තීන්දුවක් බවත්, ඊට ගෞරව කළ හැකි විනයක් මේ ක්‍රීඩකයන්ට නොතිබුණු ආකාරයත් විවේචනයට ලක් වෙමින් ඇත.
ජෛව ආරක්ෂක බුබුලක් තුළ ක්‍රීඩා කිරීමේ දී තමන් ගැන, තම කණ්ඩායම ගැන පමණක් නොව, තමන් හැසිරෙන පරිසරයේ ද ආරක්ෂාව පිළිබඳ වගකීම ක්‍රීඩකයන් සතුවන බවත්, ඒ විනය නීති මොනතරම් තියුණු දැයි දක්වතොත් ක්‍රීඩා කරන අතර තුර ක්‍රීඩා පිටියෙන් ඉවතට යන පන්දුව යළි විනිසුරුවරුන් වෙත ලබා දීමෙන් පසු එය ලබා දුන් ක්‍රීඩකයාගේ දෑත් සහ එළියට ගිය පන්දුව විෂබීජ හරණය නොකර තරගය ආරම්භ නොකරන බවත් ශ්‍රි ලංකා ක්‍රිකට් ආරංචි මාර්ග පෙන්වා දුන්නේය.
බොහෝ ක්‍රීඩකයන් පන්දුව විනිසුරුවරයා වෙත පාදයෙන් ගෙන යන අවස්ථා පෙනෙන්නේ ඒ නිසා බව ඔවුන් කියන්නේය.
එවැනි දැඩි නීති සමුදායකට යටත් කොට ජෛව බුබුලක් සදා රටක් නියෝජනය කරන්නට යන ක්‍රීඩකයන් අවිනීතව අයාලේ යෑම ජාත්‍යාන්තර ගැටලුවක් තෙක් දිවෙන තත්වයක් නිර්මාණය කළ හැකි බව එම ආරංචි මාර්ග පැවසුවේය. ක්‍රීඩකයන් විෂයෙහි බලපැවැත්වෙන මූලික නීති ප්‍රකාරව රාත්‍රී 10න් පසුව සිය නේවාසික කාමර තුළ රැඳී සිටීම මෙම ක්‍රීඩකයන්ට අනිවාර්ය විය.
මේ වනවිට මෙම ක්‍රීඩකයන් වෙත පස් අවුරුදු ක්‍රීඩා තහනමක් පැනවීමට සඳහා ක්‍රිකට් විධායක සභාව කටයුතු කරමින් සිටින බව වාර්තා වේ.
හෙට එංගලන්තයේ සිට පැමිණෙන විශේෂ ගුවන් යානයකින් ඔවුන් තිදෙනා ලංකාවට පැමිණීමට නියමිත බවත් එම ආරංචි මාර්ග කීවේය.
අයාලේ යන ශ්‍රී ලංකා ක්‍රීඩකයන්ගේ හැසිරීම වීඩියෝගත කර එරට සිටින ලාංකිකයෙක් විසින් සමාජ මාධ්‍යය වෙත මුදාහැරීමත් සමග රට තුළ ඇති වූ දැඩි විවේචනයන් හමුවේ කණ්ඩායම් කළමනාකාරවරයාගෙන් මේ පිළිබඳව වහාම වාර්තාවක් කැඳවීමට ශ්‍රී ලංකා ක්‍රිකට් බලධාරීන් කටයුතු කළේය. ඔවුන්ගේ ක්‍රිකට් තාවකාලිකව තහනම් කර ලංකාවට ගෙන්වනු ලබන්නේ ඉන් පසුවය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මෙම ක්‍රීඩකයන් තිදෙනා යළි යළිත් ජාතික කණ්ඩායමට ඇතුළත් කරගන්නේ ඔවුන් සම්බන්ධව බරපතල විනය චෝදනා ගොනු වී තිබිය දීය. නිරෝෂන් දික්වැල්ලට ජාත්‍යාන්තර තරගාවලි අතර තුර බීමතින් සාමාජ ශාලාවල හැසිරෙමින් කාන්තා ඇසුර සෙවීම සම්බන්ධව චෝදනා ගොනු වී තිබිණි. කුසල් මෙන්ඩිස් නීති විරෝධී ආකාරයෙන් රිය ධාවනය කර පුද්ගල ඝාතනයක් සිදුකිරීමෙන් පසු සැඟ වී සිට නීතිඥයන් මාර්ගයෙන් උසාවියට ඉදිරිපත් වී එතරම් කලක් නැත. ඇල්කොහොල් ශරීරගතව තිබුණා නම් ඒ ලකුණු මැකී යන්නට අවශ්‍ය වී යැයි සිතෙන කාලය ඔහු සැඟවී සිටි කාලයට සමාන යැයි තතු දත් අය කීහ. ධනුෂ්ක ගුණතිලක හෝටලයක දී ස්ත්‍රී දූෂණයක් කරන්නට උත්සාහ කර ඒ බලහත්කාරයට නතු වන්නට ගිය තරුණියගේ ඥාතීන්ගෙන් ගුටි කා රහසිගතව ප්‍රතිකාර ගනිමින් සිට ඉකුත් අප්‍රේල් මස 20 වැනිදා නීතිඥ පණ්ඩුක කීර්තිනන්ද ප්‍රමුඛ විනය කමිටුවක් මගින් මානසික උපදේශනය සඳහා නිර්දේශ කර සිටියෙකි.