කොවිඩ් 19 වසංගතයෙන් බලපෑමට ලක් වූ ශ්‍රි ලංකාවේ ආර්ථිකය යළි ගොඩ නැගීම සඳහා විධිමත් පියවර නොගත් බවට ජනාධිපතිවරයාගේ දැඩි දෝෂාරෝපණයට ලක් වූ ශ්‍රි ලංකා මහ බැංකුවේ මූල්‍ය මණ්ඩලය ඊයේ (16) සවස් යාමයේ හදිසියේ රැස් වූ අතර එහිදී නව ණය සහ සහන වැඩ සටහනක් ක්‍රියාත්මක කිරීමටත් බලපත්‍ර ලාබී බැකු සඳහා ව්‍යවස්ථාපිත සංචිත අනුපාත සියයට දෙකකින් අඩු කිරීමටත් තීරණය කර ඇත.
ඊයේ රැස් වූ මහ බැංකුවේ මුදල් මණ්ඩලය මේ අනුව නව සහන වැඩසටහන් සහ ව්‍යවස්ථාපිත සංචිත පොලී අනුපාත අඩු කිරීම පිළිබඳව තීරණවලට එලඹ තිබේ.
මේ පිළිබඳව මාධ්‍ය නි‍වේදන දෙකක් නිකුත් කර ඇති ශ්‍රි ලංකා මහ බැංකුව පවසන්නේ ආර්ථිකය නගා සිටුවීම සඳහා රජයේ ප්‍රයත්නයන්ට සහාය දීමක් වශයෙන්, 1949 අංක 58 දරන මුදල් නීති පනතෙහි 83 වගන්තිය යටතේ නව ණය වැඩසටහන් හඳුන්වා දීමට මුදල් මණ්ඩලය තීරණය කරන ලද බවයි.
2020 මාර්තු මස 27 වැනි දින හඳුන්වා දුන් ප්‍රතිමූල්‍යකරණ යෝජනා ක්‍රමය යටතේ දැනටමත් ලබා දී ඇති රුපියල් බිලියන 27.5ට අමතර ව ශ්‍රී ලංකා මහ බැංකුව විසින් බලපත්‍රලාභී වාණිජ බැංකුවලට සියයට 1.00ක සහන පොලී අනුපාතිකයක් යටතේ පුළුල් පරාසයක ඇපකර පොරොන්දු මත අරමුදල් ලබා දෙනු ඇත.
එම පහසුකම දේශීය ව්‍යාපාර බොහොමයක් සඳහා බෙදී යෑම සහතික කරමින් බලපත්‍රලාභී වාණිජ බැංකු විසින් එම අරමුදල් 4.00ක පොලී අනුපාතිකයක් යටතේ ව්‍යාපාරවලට ලබා දෙනු ඇත.
මෙම යෝජනා ක්‍රමය සහ දැනට පවතින ප්‍රතිමූල්‍ය යෝජනා ක්‍රමය මගින් කොවිඩ්-19 වසංගතයෙන් බලපෑමට ලක්වූ ව්‍යාපාර සඳහා සම්පූර්ණ වශයෙන් රුපියල් බිලියන 150ක් සැපයෙනු ඇත.
මීට අමතර ව, ඉදිකිරීම් අංශයේ ව්‍යාපාර විසින් අතීතයේ සිදු කරන ලද කොන්ත්‍රාත් ව්‍යාපෘති සඳහා ලැබිය යුතු මුදලට සමාන ව රජය විසින් නිකුත් කෙරෙන ඇපකරයක් මත ඉහත සඳහන් සහනදායී පොලී අනුපාතික යටතේ ණය ලබා ගැනීම සඳහා ශ්‍රී ලංකා මහ බැංකුව විසින් අරමුදල් සම්පාදනය කෙරෙමින් එම ව්‍යාපාර සඳහාම වෙන් වූ ණය යෝජනා ක්‍රමයක් හඳුන්වා දෙනු ලැබේ.
මීට අමතර ව බලපත්‍රලාභී වාණිජ බැංකුවල සියලු රුපියල් තැන්පතු වගකීම් සඳහා අදාළ ව්‍යවස්ථාපිත සංචිත අනුපාතය 2020 ජුනි 16 වන දිනෙන් ආරම්භ වන සංචිත පවත්වා ගෙන යෑමේ කාල පරිච්ඡේදයේ සිට ක්‍රියාත්මක වන පරිදි සියයට 2.00 දක්වා පදනම් අංක 200කින් අඩු කිරීමට තීරණය කර ඇත.
ව්‍යවස්ථාපිත සංචිත අනුපාත යනු බලපත්‍රලාබභී මූල්‍ය ආයතන තමන් ගනුදෙනුකරුවන්ගෙලන් ලබා ගන්නා තැන්පතුවලට සමානුපාතිකව මහ බැංකුවේ මුදල් තැන්පත් කළ යුතු ප්‍රතිශතයයි.
මෙම ප්‍රතිශතය අඩු කිරීම තුළින් කැන්පතුවලට සාපෙක්ෂව මූල්‍ය ආයතනවල ශේෂ වන මුදල වැඩි වන අතර එය දේශීය මුදල් වෙළෙඳපොළ වෙත රුපියල් බිලියන 115ක අතිරේක ද්‍රවශීලතාවක් සැපයේ.
එමගින් බලපත්‍රලාභී වාණිජ බැංකුවල අරමුදල් පිරිවැය අඩු කිරීමටත් ආර්ථිකයේ ණය ප්‍රවාහ ගලා යෑම වේගවත් කිරීමටත් මූල්‍ය පද්ධතියට හැකියාව ලබා දෙයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මෙම තත්ත්වය යටතේ අඩු පිරිවැයක් යටතේ ව්‍යාපාර සහ කුටුම්භ වෙත ණය ලබාදීම ඉහළ නංවමින් මූල්‍ය අංශය විසින් ඉහළ මට්ටමේ ද්‍රවශීලතාව සහ අරමුදල් පිරිවැය පහළ යෑමෙහි ප්‍රතිලාභය ආර්ථිකය වෙත ප්‍රමාදයකින් තොර ව ලබා දීම සඳහා කටයුතු කරනු ඇතැයි අපේක්ෂා කෙරේ.